Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> یمن: اقوام متحدہ دے جنگی ماہرین تحقیقاں کرن گے۔سعودی عرب نوں گل مننی پئی۔

یمن: اقوام متحدہ دے جنگی ماہرین تحقیقاں کرن گے۔سعودی عرب نوں گل مننی پئی۔

وچار ڈیسک
September 30th, 2017

اقوام متحدہ دی انسانی حقاں دی کونسل وچ لمیری بحثاں بعدوں یمنی تحقیقاں بارے راضی نامہ ہو نا اک وڈی سفارتی جت ہے۔سعودی عرب آپ ایس کونسل دا ممبر ہے اتے اوس دی کوشش سی پئی اجیہا کوئی کمیشن نہ ہی بنے۔سعودی عرب دا آکھنا ہے پئی کیونجے ایران پنگے کر رہیا ہے اتے حوثی قبائل نوں اسلحہ وغیرہ دیندا ہے تاں مارے سعودی عرب یمنی سرکار دی مرضیاں نال کاروائیاں کر رہیا ہے۔ہن تحقیقاں ہون گیاں تے پتہ چلے گا پئی سعودی کاروائیاں عام یمنیاں خلاف نیں یا نری حوثیاں خلاف۔ڈبلیو ایچ او دا آکھنا ہے پئی ڈیڑھ کڑوڑ یمنی انہاں سعودی حملیاں پاروں گھٹ خوراکاں تے بماریاں دا شکار نیں۔حوثی قبائل مسلکی حوالے نال شعیاں دے زیدیہ فرقے توں تعلق رکھدے نیں جیہڑا یمن وچ445% ہے۔سعودی عرب چاہندا ہے پئی کونسل ایرانی فیکٹر بارے بھرویں گل کرے تانجے یمنی کاروائیاں نوں اک ٹیک مل سکے۔ہن اقوام متحدہ دی انسانی حقاں دی کونسل نے جنگی ماہر گھلن دا فیصلہ تے کر لتا ہے پر ایس توں پہلاں اقوام متحدہ دے تحت یمن وچ مبینہ جنگی جرائم دی تحقیقاں لئی نیدر لینڈز نے جمعرات نوں قرار داد دا نظر ثانی شدہ مسودہ پیش کردتا سی تانجے سعودی عرب دی رضا مندی حاصل کیتی جاسکے۔ ایہہ نظر ثانی شدہ مسودہ ایسے وقت وچ پیش کیتا گیا ہے جداں قرار داد تے ووٹنگ ہونی سی۔ نیدر لینڈز نے اقوام متحدہ دی انسانی حقاں دی کونسل وچ جو نظر ثانی شدہ مسودہ جمع کرایا سی ایس وچ معروف ماہرین دے بین الاقوامی گروپ توں انکوائری کران دا مطالبہ کیتا گیا سی۔ ایس توں پہلے نیدر لینڈز نے بین الاقوامی انکوائری کمیشن دی تشکیل دا مسودہ پیش کیتا سی جو کہ اقوام متحدہ دے اصولاں دے مطابق سی۔ سعودی عرب تے ایس دے اتحادی یمن وچ ایران دی حمایت یافتہ حوثی تحریک دے حامیاں تے بمباری کردا رہیا ہے۔ ایس سلسلے دا آغاز 2015 وچ ایس وقت شروع ہویا جداں حوثیاں نے یمن دے شمالی حصے تے قبضہ کرنا شروع کیتا۔ اقوام متحدہ دے انسانی حقاں دے سربراہ زید رعد الحسین نے ادارے دے 47 ممبراں توں وعدہ کیتا ہے کہ اوہ جنگ دی آزاد تحقیقاں کران گے جس وچ ہزاراں افراد مارے گئے ،یمنی معیشت تباہ ہوگئی تے لکھاں بندے قحط دا شکار ہو چکے نیں۔ سعودی عرب دا کہنا ہے کہ ایس دا فوجی اتحاد دہشت گرداں دے خلاف لڑرہیا ہے تے یمن دی اصل حکومت دی مدد کررہیا ہے۔ پر زید رعد الحسین دے دفتر دا کہنا ہے کہ سعودی قیادت وچ بنن والے فوجی اتحاد دے فضائی حملیاں توں ہلاک ہون والیاں وچ اکثریتاں عام لوکاں دی نیں۔ یمن وچ شہریاں دی ہلاکت تے بنن والے سعودی اتحاد دے اک تحقیقاتی پینل دا کہنا ہے کہ ایس دے زیادہ تر فضائی حملے درست سن۔ نیدر لینڈز ولوں جمع کرائے جان والے مسودے دے بعد فرانس نے سمجھوتے لئی دباؤ پایا ہے جو خود ہلے کونسل دارکن نہیں ہے۔ فرانس دی وزارت خارجہ دی ترجمان دا کہنا ہے اسی خاص طور تے یمن وچ انسانی حقاں دی خلاف ورزیاں تے تحقیقاتی طریقہ کارنوں زیادہ بہتر کرن لئی کم کررہے نیں۔ فرانس دا ایہہ بیان برطانیہ تے امریکہ لئی اک پیغام ہے جو ایس معاملے وچ اک قرار داد تے اتفاق چاہندے نیں۔چیتے رہے پئی یہہ قرار داد نیدر لینڈز تے کینیڈا نے سانجھی جمع کرائی سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels