Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> چین مخالفتاں: امریکہ،برطانیہ تے سعودی عرب اتے فیصلے دی کھلبلی

چین مخالفتاں: امریکہ،برطانیہ تے سعودی عرب اتے فیصلے دی کھلبلی

وچار ڈیسک
August 1st, 2017

سعودی عرب نوں نواز شریف دے یمن واسطے فوجی نہ گھلن دا گلہ ہے ۔ امریکہ تے برطانیہ چین دی مخالفت وچ پاکستان نوں کمزور ویکھنا چاہندے نیں تے ساڈی اسٹبلشمنٹ نوں اونجھ ہی سیاسی لوک کمزور ہوندے ای چنگے لگدے نیں۔۔۔۔۔پاکستان وچ ہن سیاستداناں نے جے 1973 دے آئین نوں سدھا نہ کیتا گیا تے جمہوری عمل نہیں چل سکے گا۔

نواز شریف دے خلاف سپریم کورٹ دا فیصلہ آیا ہے تے کئی تاریخی گلاں وماغ وچ کھلبلی مچارہیاں نیں۔ بھٹو صاحب نے اپنے دور وچ مخالفاں نوں قابو کرن لئی اک آئینی ترمیم کیتی سی تے قتل دے قنون وچ 302/109 دا وادھا کیتا سی۔ جیہدا مطلب سی کہ قتل دے Nominate توں ہووے گی۔ جیہدا مطلب سی کہ قتل کرن والے دے نال قتل دی سازش کرن والے نوں وی اوہی سزا دتی جائے گی جیہڑے قتل کرن والے کجھ باغی سن جیہناں نوں اوہ سبق سکھانا چاہندے سن۔ قدرت دی کرنی ویکھو کہ ایس ترمیم دے تھلے سب توں پہلے بھٹو صاحب آپ ہی آئے۔ عدالتاں نے اوس ہی نویں شق دا فیدہ لے کے سزائے موت دتی۔ جنرل ضیا نے آئین وچ 63/62 دی شق پائی تے اوس ویلے نواز شریف جنرل ضیا وی کابینہ دا حصہ سی۔ اے صادق تے امین ہون دی شق جنرل ضیا نے وی بد نیتی نال پائی سی۔ کیونکہ صادق تے امین دا رتبہ تے پیغمبراں دا ہندا ہے۔تے پاکستان وچ سیاست کرن والا کوئی وی ایس رتبے تے پورا نہیں اتر سکدا۔ ایس جنرل ضیا دی آئینی بچی کھچی ترمیم نوں نہ تے پیپلز پارٹی ختم کرسکی۔ اوہناں نے اک وار کوشش وی کیتی سی پر نواز شریف نے اوہدی حمایت نہیں کیتی سی۔ اج ایس دفعہ دے تھلے نواز شریف تے اوہدا خاندان آگیا۔ ایسی طراں مینوں لگدا ہے کہ آئین وچ توہین رسالت دا وی قنون جنرل ضیا دے زمانے دا بنیا ہویا ہے تے کئی سیاستدان تے سیاسی پارٹیاں اوہدا وی آئین وچوں خاتمہ چاہندیاں نیں۔ ہر پاکستانی سوسائٹی وچ مولوی دا دابہ تے پریشر منیا ہے کہ کوئی ایس پاسے جرات نہیں کردا۔ ایتھے تے سلمان تاثیر دا جنازہ پڑھان والا نہیں لبھدا تے ممتاز قادری نوں ہیرو بنان والیاں تے کوئی انگلی نہیں چک سکدا سی۔ خیر اوہ اک وکھرا موضوع ہے۔ گل نواز شریف دے لتھن تے جشن منان والیاں دی ہے جیہناں وچ پی ٹی آئی دے نال جماعت اسلامی وی سِر کڈھ پھردی ہے۔ جتھوں تک نواز شریف دی کرپشن دا سوال ہے تے اوہ 3 واری وزیراعظم تے دو واری پنجاب دا وزیر اعلیٰ رہیا ہے، تے کسی سسٹم نوں 35 سال بعداو ہنادی کرپشن نظر آئی ہے؟۔ کلا نواز شریف ای نہیں سارا سسٹم ای کرپٹ ہے۔ تھلے توں لے کے اوتے تیکر کیہڑا ہے جیہڑا صادق تے امین دے پیغمبر ی معیار تے پورا اتر سکدا ہے؟ عدالتاں اپنے آپ توں لے کے ہر ادارے تے ہر بندے نوں ایس معیار تے پورا اترن بارے جھات پاون۔ بڑے دھیان نال ایہہ شق جنرل ضیا نے انتقامی خیال نال پائی سی تے اوہدے پیدا کیتے نواز شریف دے اگے آگئی۔ بھٹو نوں ایٹم بم بنان تے ہندی کسنجر نے آکھیا سی کہ تینوں عبرت دا نشان بنا دیاں گے تے جنرل ضیا دے ذریعے اوہناں ایسا کرکے وکھا دتا۔ مینوں ہن نواز شریف ایس توں پہلے الطاف حسین تے ہن اگے آن والے دناں وچ عمران خان فیر زرداری دی لائن لگدی جاپدی ہے ۔اہدے پچھے کئی سازشاں وی جاپدیاں نیں۔ کدھرے امریکہ تے برطانیہ، تے کدھرے سعودی عرب ولوں ایہناں سازشاں دی ٹریل ملدی ہے جیہڑے اسٹبلمشمنٹ دے ذریعے اپنے اپنے نشانے لارہے نیں۔ سعودی عرب نوں نواز شریف دے یمن واسطے فوجی نہ گھلن دا گلہ ہے ۔ امریکہ تے برطانیہ چین دی مخالفت وچ پاکستان نوں کمزور ویکھنا چاہندے نیں تے ساڈی اسٹبلشمنٹ نوں اونجھ ہی سیاسی لوک کمزور ہوندے ای چنگے لگدے نیں۔ خاص طور تے سی پیک دی 45 بلین توں شروع ہوئی 100 بلین تک اپڑن والی سرمایہ کاری اوتے اسٹبلشمنٹ آپ بغیر کسی چون وچرا توں کنٹرول رکھنا چاہندی ہے۔ ایس لئی اوہناں نوں پارلیمنٹ تے جلسے جلوساں وچ سی پیک تے گل چنگی نہیں لگدی۔ ہن عدالتاں اتے جے آئی ٹی دیاں پھرتیاں سب ویکھ رہے نیں۔ کدی اینج پھرتی نال تفتیشاں تے مقدمے نہیں چلے۔ کدی ہائی کورٹ تے سپریم کورٹ دے ججاں نے اینج معاملیاں دی نگرانی نہیں کیتی۔ اونج وی جے آئی ٹی دی پرفارمنس توں صاف پتہ لگدا ہے کہ ایدھے پچھے’’ تگڑے‘‘ ہتھ سن جیہڑے ایہنوں طاقت تے حوصلہ دے رہے سن۔ عدلیہ نے وی پچھے پورا زور رکھیا ہویا سی تے عدلیہ اسٹبلشمنٹ دی تھپکی توں بغیر ایڈھے پر پرزے نہیں کڈھ سکدی۔ سب نے ویکھیا۔ 3 ججاں دے بینچ نے مقدمہ سنیاں تے 5 نے آکے فیصلہ سنا دتا۔ سب حیران ہوکے بس ویکھ رہے نیں۔ مینوں نواز شریف دی کرپشن دا دفاع کرن دی لوڑ نہیں۔ نہ ہی میں نواز شریف دی سیاست دا حمایتی ہاں ۔میں تے چھ مہینیاں توں جیہڑی اسٹبلشمنٹ دی منصوبہ بندی نظر آرہی ہے اوہدے تے اپنا خیال دے رہیاہاں۔ اونج تے اے سارا سسٹم ای بس ہوچکیا ہے۔ اینوں نہ تے نواز شریف وی سیاست ایس کھوبے وچوں کڈھ سکدی ہے تے نہ ہی عمران خان دوالے بیٹھے سرمایہ دار، پیر تے دڈیرے کڈھ سکدے نیں۔ ہن پیپلز پارٹی نوں تے ویسے ہی کسے دشمن دی لوڑ نہیں رہی۔ اوہناں لئی تے زرداری کلا ہی کافی ہے۔ اک زرداری سب تے بھاری دا نعرہ اصل وچ اوہناں دی پارٹی تے ہی لاگو ہوندا ہے۔ ایس لئی پاکستان وچ ہن سیاستداناں نے جے 1973 دے آئین نوں سدھا نہ کیتا گیا تے جمہوری عمل نہیں چل سکے گا۔ ایہہ اسٹبلشمنٹ تے اونج ہی سب لوکاں نوں کسے پیار دی اکھ نال نہیں ویکھدی۔ ایس گنجل وچوں نکلن دا صرف اک ہی حل ہے کہ عدالتاں صرف عدل تے انصاف کرن ناکہ سیاستاں۔ ہورے میں اجہی چیزاں منگ رہیاواں جیہڑیاں مل نہیں سکدیاں۔ جے ایہہ نہیں ہویا تے اگے چلنا مینوں بہوں اوکھا لگدا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels