Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> جنگاں دا بھوت ٹل گیا؟ منڈلا رہیا ہے۔کیہہ کولڈ وار مڑ شروع ؟ماسکو گل بات

جنگاں دا بھوت ٹل گیا؟ منڈلا رہیا ہے۔کیہہ کولڈ وار مڑ شروع ؟ماسکو گل بات

April 13th, 2017

شام تے کروز میزائلاں نال امریکی حملہ بعدوں اج امریکی تے روسی خارجہ وزیراں دی ماسکو وچ ہون والی گل بات تیک سیاسی پارہ خطرے دے نشان تیک اپڑ چکیا سی۔ایس ودھ چکے پارے دا اثر بہوں ملکاں دی اندرونی سیاستاں تے وی پیندا ہے۔ٹیلرسن روس نوں شام بارے مسلسل گل بات تے راضی کر لتا ہے اتے روسی صدر پوتن نال وی مل لتا ہے پر روسیاں دے من وچ کیہہ ہے ایس بارے ہلے وی خدشے وادھو نیں۔دونون ملک اپنی اپنی الزاماں توں کجھ قدم پچھے ہٹے۔خارجہ وزیراں دی مشترکہ پریس گل بات دے چند گھنٹیاں بعدوں ہی شامی سرکار تے کیمیائی حملیاں پاروں مدد دین دا تاثر دین والی قرارداد سلامتی کونسل وچ روس ویٹو کر دتی۔شام دا محاذ گرم اتے کولڈ وار دے مڑ شروع ہون دا خطرہ وادھو۔ایہہ خطرہ دو ترے سال رہے گا۔
کیہہ دنیا اک وار فیر صدی دی دوجی دہائی وچ وڈی جنگاں دے دہانے تے آن کھلوتی ہے۔ امریکی تھنک ٹینک دے وڈکے سٹیفن کوہن ایس ملاقات توں پہلے سی این این تے آکھیا ہے پئی 1962 دے کیوبن کرائس بعدوں ایہہ دوجا وڈا خوفناک ویلہ جے اتے اساں اک وڈی جنگ دا نیڑے ہوچکے ہاں۔ امریکہ تے روس وچ اک وڈی لابی سرد جنگ نوں مڑ شروع کرن لئی تیار ہے۔ جنگ دے ایس خوفناک ماحول دے باوجود امریکی سیکٹری آف سٹیٹ ٹیلر سن ہوراں دا دورہ کینسل نہ ہوناایس گل دی دلیل سی کہ اجے اخیری فیصلے نہیں ہوئے۔ تریخی طور تے وی پچھلے 3 سوسال توں ہر صدی دے پہلے دو دہاکیاں وچ نواں بندوبست اساریا جاندا رہیا ہے۔ پاکستان نوں ایس دی کوئی پروا نہیں، ایہہ ایہو بحثاں جاری رکھن وچ پھسے نیں کہ سوئی دے ٹکے تے فرشتہ کھلو سکدا ہے یا نہیں۔ پر دنیا دے میڈیا وچ وڈے وڈے کھڈاریاں دی نظراں روس امریکہ سرد جنگ دے مڑاسرن تے نیں۔ عراق وچ شعیاں دے وڈے لیڈر مقتدا الصدر شام دے بشارالسد نوں ماسکو میٹنگ توں چند گھنٹے پہلاںآکھیا پئی اوہ شام دے وڈے مفاد وچ تحت توں اتر جائے۔ لگدا ہے اوہ نہیں چاہندے پئی مڑ سرد جنگی سیاستاں شروع ہون۔ دوجے بنے وڈکیاں دے سمجھاون دے باوجود سابق ایرانی صدر احمدی نجات اپنا ناں مڑ صدارتی چوناں لڑن والیاں وچ رلتی کروالتا ہے۔ کولڈوار دا سب توں بھیڑا حوالہ ایہو ہے پئی ایس وچ ہر وطنی ریاست وچ بنیاد پرست تگڑے ہوندے نیں اتے اوہ ریاست بیرونی سیاستاں دی ٹٹو بن کے رہ جاندی ہے۔ ایس ویلے وڈا سوال ایہو ہے پئی کیہ سرد جنگ مڑ واپس آسی؟ 1940 دے دہاکے اتے 2017 وچ بہوں فرق ہے اتے چین دے عالمی کھڈاری بنن نال کولڈ وار نوں مڑ چالو کرنا ایڈا سوکھا وی نہیں۔ کل تیک شام تے افغانستان بارے اوس چین رل مل اگے ودھ رہے سن پر اج گل روس امریکہ وچ آگئی ہے کہ روس کیہ سوچ رہیا ہے ایہہ وڈا مسئلہ۔ گارڈین دا آکھنا ہے کہ ٹیلر سن دی روسی صدر پوتن نال ملاقات ہوگئی تے ایہہ ایس گل دا شارہ ہوسی پئی روسی تے امریکی خارجہ وزیراں وچ کجھ نہ کجھ طے ہوچکیا ہے۔ہن ملاقات تے ہو چکی تے پتہ ایہہ لانا ہے کہ دوناں وچ طے کیہہ ہویا ہے۔ مقتدا الصدر دے بیان نال روس دی شام بارے پوزیشن کمزور ہوئی ہے اتے ایس بیان دی ٹائمنگ بہوں اہم سی۔ مقتد الصدر سرد جنگ دی بحالیاں تے نظر رکھے ہے اتے اوس ایس بیان وچ شام تے امریکی حملے دی وی مخالفتاں کیتیاں نیں۔ روسی صدر دا ایہہ آکھنا وی اہم ہے پئی اقوام متحدہ شام وچ ہوئے کیمیائی حملے بارے تحقیقاں کرے اتے دسے ایس وچ اصل کہانی کیہ ہے۔پر روس ایہہ نہیں چاہندا کہ شام نوں پہلے ملزم آکھیا جائے تے پھیر کھوجی گھلے جان۔ امریکہ روس وچ بہوں ساری لابیاں سرد جنگ نوں مڑ اسارن وچ وادھو دلچسپیاں رکھدیاں نیں پر دنیا دا نواں بوتھا بنن وچ ہلے گھٹ و گھٹ دوا ترے سال ضرور لگن گے۔ پاکستان جیسے ملک اوسے ویلے ایس توں فیدے چک سکن گے جداں ایتھے سول ملٹری قیادتاں اک صفحہ تے ہون اتے سیاسی انتشار نہ ہوئے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels