Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> ’’دیو بند‘‘ دا پرانا ناں ’’دیورند‘‘ مڑ آسی:بریجیش سنگھ بی جے پی۔پرانے جھوٹ مکاؤ، نویں گھڑو

’’دیو بند‘‘ دا پرانا ناں ’’دیورند‘‘ مڑ آسی:بریجیش سنگھ بی جے پی۔پرانے جھوٹ مکاؤ، نویں گھڑو

March 19th, 2017

اتر پردیش (یوپی) وچ پھیلائی کانگرس دی گنگا جمنی تہذیب بی جے پی نوں وارا نہیں کھاندی تاں اوہ اوس دی وڈی نشانیاں نوں مکانا، اپنی سیاستاں پاروں ضروری سمجھدے نیں۔ ہن تے اوہ یو پی دی چوناں وی جت چکے نیں تاں مارے ہن ’’جت دے نشے‘‘ وچ دیو بند توں جت چکے بی جے پی دے ممبر اسمبلی بریجیش سنگھ ہوراں دیو بند دا پرانا ناں بحال کرن دا اعلان کر چھڈیا ہے۔ یو پی دے ہندو بنیاد پرست اجہیا مطالبہ کرچکے نیں اتے ایس وچ ’’بجرنگ دل‘‘ پیش پیش سی۔ دیو بند تے ہندواں دی پرانی مقدس تھاں ہوندی سی اتے مہا بھارت وچ وی ایس دا ذکر ہے۔ پانڈو جداں جنگ ہار دے سن تے اوہ دیو بند آکے ہی بیٹھدے سن۔ دارا العلوم دیو بند تے کل دی گل ہے جداں کہ دیورند تے پرانا ناں ہے اتے ساڈی نوجوان نسل نوں ایس پرانے ناں نوں یاد رکھنا چاہیدا ہے۔ تسی سب جاندے ہو پئی ایتھے دیوبند دے علاقے وچ پرانی آبادیاں اج وی موجود نیں۔ رن کھنڈی، جھک والہ،جرودا پنڈا وچ پرانے کھنڈرات ہر کوئی ویکھ سکدا ہے۔ ایہہ سب ساڈا ورثہ ہے۔ ایہہ گلاں سنگھ ہوراں میڈیا نوں دسیاں۔ایہہ بریجیش کافی نہیں سی سگوں اک بنیاد پرست ہندونوں ہن یوپی دا وزیراعلی لا دتا گیا ہے۔یوپی دے مسلماناں جے اپنی اعلی تہذیب نوں چھڈ کے کانگرس دی تھاں نچلی ذاتاں دے عام بھارتیاں نال رل کے جدوجہداں کیتیاں ہوندیا تاں اج ایہہ دن نہ ویکھنے پیندے۔
کانگرس والیاں جیہڑا گنگا جمنی تہذیب دا ’’گھما‘‘ بنایا سی اوس دی لیڈر وی کانگرس سی اتے ہن بی جے پی والیاں نواں ’’گھما‘‘ تیار کرلتا ہے اتے ایس دا وی بی جے پی نوں ہی ہوئے گا۔تاں مارے اوہ یوپی دے ہندو بوتھے نوں چک رہے نیں اتے ایس نوں لیڈ بی جے پی کرسی۔ پرانے جھوٹ مکاکے نویں جھوٹ بناون دے ایس کم نوں مودی ہوراں ’’نواں بھارت‘‘ آکھیا ہے۔ ایس نویں گھمے وچ پرانے کھڈاریاں دی تھاں گھٹ ہے اتے نہرو تے اوس دے سہولت کاراں دی تھاں تے بالکل نہیں کیونجے مودی آکھیا ہے نویں بھارت دا بوتھا مہاتما تے پٹیل ہون گے۔بھارتی سیاست وچ کمیونسٹ پارٹی آف انڈیا وانگ دارلعلوم دیوبند نے وی اپنا سارا وزن کانگرس دی جھولی وچ پا کے جو غلطی کیتی سی اج اوس دا دان دین دا ویلہ آیا ہے کہ جت ایہہ اپنے گھاٹیاں تے مڑ جھات پا سکن تے زحمت وچوں رحمت نکل سکدی ہے۔بی جے پی کتھوں اْتوں نہیں اتری سگوں ایہہ کانگرس دے اوہی ’’اثاثے‘‘ نیں جنہاں نوں کدی سیکولر کانگرس سرعام اپنے ویریاں خلاف ورتدی سی اتے کانگرس دے حواری اوس تے در وٹی رکھدے سن۔اج ایہہ اثاثے ’’طالبان‘‘ وانگ آزاد ہو گئے نیں تاں اوہ اپنا ایجنڈا تے چلاون ہی گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels