Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> ہالینڈ دا سبق:لبرل انکاری صورتحال توں نکلن،یورپ تے امریکہ وچ ونڈ بہوں وڈی ہے

ہالینڈ دا سبق:لبرل انکاری صورتحال توں نکلن،یورپ تے امریکہ وچ ونڈ بہوں وڈی ہے

March 18th, 2017

ہالینڈ وچ و لندیزیاں (ڈچ لوک) نسلی قوم پرستاں نوں شکستاں تے دے دتیاں اتے سجے پکھ دا نسلی قوم پرست’’ گریٹ ویلڈرز‘‘ ہارگیا پر اک وڈی گنتری وچ لوک اوس دے نال وی نیں۔ اساں ویکھیا پئی بریگسٹ وچ وی نرے 2% نال نسلی قوم پرست جت گئے سن۔ فرانس، اٹلی، جرمن، وچ ہوسکدا ہے نسلی قوم پرست ہار جاون پر اعداد و شمار دسدے نیں پئی نسلی قوم پرستاں دی حمائیتاں دی گنتری وی وادھو ہے۔کل وائٹ ہاوس وچ امریکی تے جرمن پردھان دو وکھرے پکھاں پاروں دنیا نوں ویکھن بارے جھات پا رہے سن۔یورپ تے امریکہ دا جیہڑا بوتھا پچھلے 70 سال توں وکھایا جا رہیا سی اوہ لبرل، جمہوری تے رنگا رنگیاں نوں منن والا سی۔ پر جیہڑے لوگ اج ٹرمپ، لی پن، ویلڈرز دی حمائتی نیں انہاں دی وادھو گنتریاں ویکھ کے پتہ چلدا ہے پئی کتھے نہ کتھے، یورپ، امریکہ وچ بہوں وڈی گڑبڑ وی ہے۔ سویت یونین تے کمیونزم نوں فاتحہ پڑھے بغیر دفناون دا اعلان کرن والے لبرل معاشرے اج نسلی انتہاپسندیاں تے گھٹیا قوم پرستیاں دا کیوں شکار نیں؟ پناہ گیراں خلاف اجہی زبان کون بول رہیا ہے؟ اتے ایس زبان بولن والے پاپولر کیوں نیں؟ جداں امریکہ وچ ٹرمپ جتیا سی تے اوس دی اہم وجوہات وچ اک وڈی وجہ انہاں چار امریکی ریاستاں دا غصہ دسیا گیا سی جتھے نوکریاں تے کارو بار مک رہے سن۔ پر یورپ وچ کیہ ہورہیا ہے؟تجزیاں نوں نری طبقاتی عینکاں نال نہ ویکھو سگوں وجودی تے پوسٹ سرد جنگی حالات پاروں وی ویکھنا ہوسی؟ کیہ وطن پرستیاں تے وطنی ریاستاں نوں چلاون والیاں Deep States گلو بلائزیشن توں ڈردے نیں؟کیہ اسلحہ دے تاجر جنگاں دے مکن نوں بھیڑا شکون سمجھدے نیں اتے گلوبائزیشن نوں رگیدنا چاہندے نیں؟ یا کوئی ہور گل ہے؟ جتھے 192 وچوں ترے درجن ملکاں وچ بالغ رائے دہی دا بندبست ہوئے گا اوتھے تساں کس عالمی جمہوری رویے دی گل کررہے ہو؟ پہلے کمیونسٹاں دا ناں لے کے ملکاں خلاف چڑھائیاں ہوندیاں سن تے اج اسلام دی آڑ لے کیہہ اوہی کھیڈ نہیں ہورہیا؟حقیقت تے ایہہ ہے پئی اصل وچ وڈے ملک اپنے مفاداں پاروں بادشاہتاں تک دے حمائیتی نیں۔ جے امریکہ یورپ دے ملک انسانی حقاں تے سمجھوتے کرن گے، بادشاہتاں دے مددگار بنن گے تاں فیر اوہ پنے ملک دے وچ وی ایہو پیغام دیندے نیں پئی ایتھے قنون دی نہیں طاقت دی حکمرانیاں نیں۔ جے دنیا وچ غربتاں وادھو رہن گیاں تے یورپ امریکہ وچ پناہ گیر تے آون گے۔ایہو اوہ گل ہے جیہڑی کل جرمن پردھان نے ٹرمپ دے سامنے وی کیتی۔ جے دنیا دے وڈے ملکاں اسلحہ دے انبار لاون دی تھاں انساناں وچ سرمایہ کاری کیتی ہوندی تاں غربت دے خاتمے دی امید ہوندی۔ دنیا وچ پھیلی نا برابری نری G20 بناون نال نہیں سگوں ساریاں انساناں نوں اک حد تک معیاری زندگی دین نال دور ہوئے گی۔ لبرل ایہہ سمجھدے سن پئی سویت یونین تے کمیونزم نوں ہرا کے اوہ ہن لوکاں نوں ہمیش لئی تھلے لالین گے۔ پر لوکاں دا ایہہ غصہ ہور تھاواں توں نکل رہیا ہے۔ یورپ تے امریکہ وچ نسلی قوم پرستاں دے پاپولر ہون نوں سمجھنا لوڑی دا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels