Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> بھارتی پنجاب دی پہلی مسلم وزیر: ملیرکوٹلہ دی رضیہ سلطانہ

بھارتی پنجاب دی پہلی مسلم وزیر: ملیرکوٹلہ دی رضیہ سلطانہ

وچار ڈیسک
March 17th, 2017

1947 دی ونڈ توں بعدوں دھرمی بنیاداں تے پنجابیاں دی ونڈ دے بعد 2017 وچ اک وارفیر بھارتی پنجاب مسلم وزیر نوں ویکھ رہیا ہے۔ بھلا ہوئے ایہہ وزیر اوسے کانگرس پارٹی نے بنائی ہے جس مارچ 1947 وچ دلی وچ بیٹھ کے پنجاب دی مسلم،غیر مسلم دھرمی ونڈ لئی قرار داد منظور کیتی سی، تن جون دے منصوبے توں80دن پہلاں۔ جداں بی جے پی نے کانگرس نوں اوس دا’’دھرمی بوتھا‘‘ وکھایا تاں جاکے کانگرس نوں اپنے گھاٹیاں دا پتہ چلیا۔ 1947 بعدوں جے نہرو اتے اوس دے حواریاں ہندو بنیاد پرستاں نوں ریاست دا کل پرزہ نہ بنایا ہوندا تاں اج بی جے پی وی نہ ہوندی۔
تازی خبر موجب بھارتی پنجاب توں چوناں جتن والی کانگرس پارٹی نے 8 وزیراں نوں حلف چکوائے نیں اتے انہاں وچ رضیہ وی رلتی ہے۔ رضیہ سلطانہ تیجی وار ممبر اسمبلی بنی ہے اتے ایس دا تعلق ملیر کوٹلہ نال ہے۔ لدھیانہ نیڑے پرانی ریاست ملیر کوٹلہ دی اپنی وڈی تواریخ ہے اتے ایہہ 500 سال توں اک مسلم اکثریتی ریاست سی۔ اج کل ایس نوں نویں اسارے ضلع ’’سنگسرور‘‘ دا حصہ بنایا ہویا ہے۔ ایہہ سکھ مسلم اتحاد دی اخیری علامتاں وچوں اک ہے اتے گروگوبند سنگھ دے بچیاں نوں چغتیاں (مغل حکمراناں) توں ایسے ریاست بچایا سی۔ ایس ریاست تے 1947 دا اثر وی نہ ہویا اتے اج ایہہ مڑسکھ مسلم اتحاد لئی کوکاں پئی ماردی ہے۔کپتان امریندر سنگھ مڑ توں پنجاب۔پنجاب پروجیکٹ شروع کر سکدا ہے۔
رضیہ دا خصم ڈائریکٹر جنرل آف پلس ہے اتے اوس دا ناں محمد مصطفی ہے۔ چوناں وچ انہاں دا مقابلہ اکالی دل دے محمد اویس نال ہویاجس نوں بی بی رانی نے پورے12,700 ووٹاں توں ہرایا۔ ایس حلقہ وچ 85.17 فیصدی ووٹ پئے۔ کپتان امریندر سنگھ نے پنجاب دے دو فیصدی مسلماناں وچوں اک زنانی نوں وزیر بناکے پرانی کانگرس ریت توں وکھ ہون دا اعلان کیتا ہے۔ ذرا غور کرو ایس وار یوپی وچوں بی جے پی نے اک وی مسلمان نوں چوناں وچ سیٹ نہیں دتی تے دوجے پاسے کانگرس مسلم زنانی نوں وزیر بنا چھڈیا۔ ایہہ وی آکھیا جاسکدا ہے پئی کانگرس جداں اپوزیشن وچ ہوندی ہے تاں فیر اوس دی اقلیتاں نال ہمدردی ودھ جاندی ہے۔ ایہہ دسیا گیا ہے پئی انہاں چوناں وچ پنجابی مسلماناں نوں کراہے پاون لئی بھارتی پنجاب وچ کجھ ات گرداں مسلماناں دی مقدس کتاب دے ورقے شہید کرکے سٹے سن اتے اک ہور ممبراسمبلی فرزانہ عالم دے گھر حملہ وی کیتا سی پر بھارتی پنجاب دے مسلماناں طیش وچ آون دی تھاں بنیاد پرستاں نوں ایکسپوز کیتا۔
ایہہ کم پاوان والے ملیر کوٹلے دی پرانی سکھ مسلم ریت نوں رگیدنا چاہندے سن پر ایہہ نہ ہوسکیا۔ جیہڑے بندے پھڑے گئے انہاں دا تعلق عام آدمی پارٹی نال جڑیا سی اتے انہاں تے وی مقدمہ چل رہیا ہے تے انہاں دی سہولت کار نریش یادو تے وی۔ جے کانگرس ونڈ ویلے توں کیتے جرائم تے عام بھارتیاں اتے پنجابیاں توں معافی منگ لے تے اوہ پنجاب توں دلی تیک دا سفر تیز کرسکدی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels