Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> عالمی زنانی دیہاڑ:کڑیاں دے ہوسٹلاں وچ سختیاں لوڑی دیاں نیں ۔مانیکا گاندھی

عالمی زنانی دیہاڑ:کڑیاں دے ہوسٹلاں وچ سختیاں لوڑی دیاں نیں ۔مانیکا گاندھی

وچار ڈیسک
March 7th, 2017

زنانیاں دے عالمی دیہاڑ تے مشہور بھارتی چینل این ڈی ٹی وی اُتے گل بات کردیاں زنانیاں دی وزیر اتے اندر گاندھی د ی نہو کڑیاں دے ہوسٹلاں نوں شام توں پہلے بند کرن اتے سختیاں کرن دی بی جے پالیسی دی حمائیتاں کیتیاں۔ ویسے تے سنجے گاندھی تے وی ہندوبنیاد پرستاں نال گوڑھے سانگیاں دے الزام سن پر بی جے پی وی جان بعدوں مانیکا ہوری ایہہ وی بھل گیاں نیں پئی انہاں اپنی جوانی کنج گذاری سی۔ انہاں نوں جواہر لال یونیورسٹی (جے این یو) وچ گذاریا ویلہ ضرور چیتے رکھنا چاہیدا سی۔ انہاں دلیلاں دیندے ہوئے دسیا پئی مٹیاراں تے پابندیاں تاں مارے لوڑی دیاں نیں کیونجے انہاں دے شریر وچ تبدیلیاں دا ویلہ ہوندا ہے اتے ہارمونز دی ایہہ اتھل پتھل زنانیاں نوں بے چین رکھدی ہے۔ پرمانیکا بھل گئی پئی 12 توں 22 سال دے منڈیاں وچ وی ہارمونز دی تبدیلیاں آندیاں نیں۔ مسئلہ ہارمونز دا نہیں سگوں اک مائنڈ سیٹ دا ہے۔ عورتاں دے دیہاڑ تے کنج دیاں خبراں آندیاں نیں اتے بھارت پاکستان وچ زنانیاں نوں کیہ کیہ سننا پیندا ہے ایہہ’’ اندر دی کہانی‘‘ دس دیندا ہے۔ سوال کرن والیاں وزیر نوں پچھیا پئی جے ہوسٹلاں دی سیکورٹی سخت کرن بعدوں وی ٹیچا پورا نہ ہویا تاں کیہ کرو گے؟۔ ایس تے مانیکا ہوراں جو جواب دتا اوس توں ضیا الحق یاد آگیا۔ انہاں آکھیا پئی کڑیاں نوں قابو کرن لئی نرے دوبہاری چوکیدار تے اک ڈنڈا کافی نہیں، اساں زنانیاں نوں سکولاں، کالجاں وچ دساں گے پئی انہاں وی ’’حدود‘‘ کیہ نیں۔ جداں اینکر ں انہاں نوں زچ کردتا اتے آکھیا پئی منڈیاں تے کڑیاں لئی وکھری پالیسیاں کیوں؟ تے وزیر ہوراں جواب وچ آکھیا ’’اساں منڈیاں نوں وی چھ وجے بعدوں ہوسٹلاں وچ رکھن دی پالیسی بناواں گے‘‘۔ پچھلے سال کیرالہ وچ دو پلس والیاں نوں گرفتار کرن دی خبر بڑی چلی سی کیونجے پلس والیاں اک پبلک پارک وچ بیٹھے جوڑے نوں ہراساں کیتا سی۔ اوس جوڑے نوں جداں پلساں تنگ کیتا تے انہاں ایس دی ویڈیو بناکے سوشل میڈیا تے چاڑھ دتی سی۔ ریاست اخلاقیات دی چوکیدار بنن دی تھاں جے منڈیاں تے کڑیاں تے اعتماد کرے تاں گل ہور ہوسکدی ہے۔ پر مشرق دی ’’تقدیس‘‘ دے ٹھیکے دار چین نہیں لیند دیندے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels