Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> سرخ ویب: انٹرنیٹ چور (Hacker):روسی ڈپلومیسیاں دا چوکھا ہتھیار

سرخ ویب: انٹرنیٹ چور (Hacker):روسی ڈپلومیسیاں دا چوکھا ہتھیار

December 31st, 2016

زمانہ لنگیا جدوں لڑائیاں پہاڑاں، میداناں وچ ہوندیاں سن۔ فیر لڑائیاں سمندراں وچ ہون دا زمانہ آیا اتے 20 ویں صدی وچ لڑائیاں وچ ائیر پاور دا ورتارا وادھو ہو گیا۔ پر اج کل دی لڑئیاں تے سائبر سپیس (Cyber Space) وچ ہوندیاں نیں اتے ماسکو نیوز تاں مارے میتھیو بونڈر ہوراں دا آرٹیکل وی چھاپیا ہے تانجے تساں 2017 وچ وڑن توں پہلاں نویں صف بندیاں ول دھیان کرسکو۔
امریکیاں الزام لایا ہے پئی روسی ہیکراں (سائبر چوراں) انہاں دی چوناں وچ مداخلتاں کیتیا نیں اتے ٹرمپ نوں جتوا دتا جے۔ دنیا خش، پئی کوئی تے ہے جیہڑا چوہدری امریکہ دی چوری وی کرسکدا ہے۔ روسیاں 1975 وچ اک کانفرنس ماسکو وچ کروائی سی اتے اس دا ناں سی سائنٹفک اینڈ ٹیکنالوجیکل انقلاب یعنی -STR پر روس دے خفیہ اداریاں اتے برزنیف ہوراں نے دوجا رستہ پھڑ لیا اتے روسی ایس ٹی آر دی حمایئتی لابی نوں پچھلی سیٹاں تے بیٹھنا پئے گیا سی۔ اس کانفرنس وچ جیہڑے آرٹیکل پڑھے گئے سن اوس وچ ٹیکنالوجیدے حصہ وچ سائبر سپیس نوں قابو کرن دی بصیرتاں شامل سن۔ روس وچ لمیرے چرتوں ایس تے کم کر ہورہیا سی اتے کمپیوٹر نال جڑے نوجواناں دی کھیپاں وی تیار ہوندیاں رہیاں،زیادہ زور سیکورٹی نال جڑیاں ٹیکنالوجیاں تے سی ۔ سویت یونین ترٹن بعدوں ایہہ کھیپاں انج ہی مادرپدر ہوگیاں جنج افغان جہاد بعدوں جہادی، انہاں نوں تساں روس دے نان سٹیٹ ایکٹرآکھ سکدے ہواتے جنج ہر نان سٹیٹ ایکٹر دا کسی نہ کسی سیاست اتے ریاست نال تعلق رہندا ہے اینج انہاں دا وی سانگا روسی سرکار نال رہیا۔
1992 بعدوں ایہو سمجھیا جارہیا سی پئی روس ہن عالمی پدر تے وڈی طاقت نہیں رہیا۔ پر ای میلاں والے الزام بعدوں روسی اک وار فیر عالمی پدر تے آپدی پرانی تھاں ول ودھ رہے نیں۔ ایس سارے کم وچ روسیاں نوں سائبر چوراں پہنچایا جے۔ کجھ چر پہلاں ہی روسیاں اک نامی گرامی ہیکر جوسہوا سیمویل آرون (Joshua Aron) نوں امریکہ دے حوالے کیتا سی جس نوں سائبر چوریاں پاروں امریکہ دا سٹیٹ ڈیپاٹمنٹ لبھ رہیاسی۔ جوسہوا ہوری 1990 دے دہاکے توں اجہے کماں وچ رجھے ہوئے 7 وڈے سائبر چوراں وچ اک نیں۔ پہلاں پہلاں تے انہاں چوراں نے ملٹی نیشنل کارپوریشناں نوں آپسی مقابلیاں وچ رجھی کمپنیاں دے ڈیٹا دی چوریاں وچ مدد دتی اتے لمیرے ڈالر کمائے۔ روسی ملٹری کمپلیکس دی ڈگن بعد سامنے آون والے ایہہ ہیکر پہلاں ایجنسیاں دے ہرکارے سن اتے ہن آپوں ایجنسی بن گئے۔
ولادی میر لیون دا ناں وی دنیا جاندی ہے جس سائبر چوریاں وچ بڑا ناں کمایا۔ انہاں حضرت نے تے 1994 وچ سٹی بینک دا ڈیٹا ’’ہیک‘‘ کیتا سی اتے 10 ملین ڈالر (اک ارب توں وادھو روپئے) آپدے اکاوئنٹ وچ منٹاں وچ ٹرانسفر کر چھڈے سن۔ ایس نوں بعد وچ پھڑیچ لتا گیاسی پر اوہ کوئی اکلا سائبر چور تھوڑی سی۔ سائبر چوری دے کماں وچ روسی بولن والے ہیکراں دی حکمرانیاں نیں اتے انہاں دا عالمی پدر تے مقابلہ جرمن تے ہسپانوی زبان بولن والے سائبر چوراں نال ہوندا ہے۔ جنج جہادیاں آپدی جتھے بندیاں بنائیاں ہوئیاں نیں اینج ہی ہیکراں دی وی جتھے بندیاں نیں اتے روس وچ بہوں کھلے عام کم کردے رہے نیں۔ دیمترے والکو (Volkov) سائبر کرائم دے وڈے ماہر نے اتے انہاں دسیا پئی ایہہ روسی ہیکراں ماسکو وچ وی ارباں ڈالراں دی چوریاں کتیاں نیں۔
منی لانڈرنگ وچ انہاں نوں خاص مہارتاں نیں تاں مارے انہاں نوں عالمی امیراں دی پشت پناہیاں وی ملدیاں رہندیاں نیں۔ 2012 وچ اک وڈے روسی ہیکر ٹروجن (Trojan) وائیرس بنایا سی اتے لمیرا مال کمایا سی۔ آرٹیکل وچ ایہہ وی دسیا گیا ہے پئی عالمی طاقتاں مختلف ملکاں نوں آپس وچ لڑان لئی وی ہیکراں نال رابطے رکھدیاں نیں۔ اینج جاپدا ہے امریکہ برطانیہ والیاں 20 ویں صدی وچ جہادی پیدا کیتے اتے روسیاں ہیکر، اتے دوناں ہی ہن اجہے ’’نان سٹیٹ‘‘ ایکٹر نیں جیہڑے عالمی پدر تے سیاستداناں تے کاروباراں وچ وی رلتی نیں، ریاستاں تے سیکورٹیاں دا انہاں نوں چوکھا تجربہ جے۔ انہاں دی دنیا سامری جادوگر وانگ پرسرار تے یہودیاں توں وادھو ہشیار جے۔ روسی ریاست ایس نوں ورت رہی ہے۔ پر کیہ اوہ ایس کم وچ اکلے نیں؟ ایس بارے ویسٹرن میڈیا خموش۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels