Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> شام: مسئلہ اسد نوں کڈنا نہیں سگوں ات گردی ہے، جلد صلح ہوسی ۔ترکی، روس، ایران

شام: مسئلہ اسد نوں کڈنا نہیں سگوں ات گردی ہے، جلد صلح ہوسی ۔ترکی، روس، ایران

December 21st, 2016

ماسکو: ترکی وچ روسی سفیر دے دن دہاڑے قتل دے باوجود کل ماسکو وچ پہلے توں متھے پروگرام پاروں روس، ایران تے ترکی دے خارجہ امور دے وزیر اں رلت کیتی۔ میٹنگ بعدوں اک مشترکہ پریس کانفرس نال گل بات کریندے ہوئے روسی وزیر خارجہ’’ سیر جی لورو‘‘ ہوراں آکھیا پئی اگلے دو،ترے دناں وچ لوکاں نوں سکون ملنا شروع ہوجاسی۔ اساں شام وچ باغیاں تے حکومت وچ چھیتی چھیتی کوئی نہ کوئی سمجھوتہ کرا لواں گے۔روس آپدی ڈپلو میسیاں پاروں ایران تے ترکی نوں اک صفحہ تے لے کے آیا ہے جس نے شام نوں اک نویں سویر دی امیداں دتیاں نیں۔
ایہہ جنگ پچھلے 6 سالاں توں جاری ہے اتے اک انداز پاروں ایس وچ تن لکھ توں وادھوں لوک مرچکے نیں۔ ایس جنگ پاروں دنیا وچ پناہ گیراں دی گنتری وی بہوں ودھی ہے۔ اج وی شام وچ مرن تے بے گھر ہون والیاں بارے خبراں وی مسلسل آرہیاں نیں۔ پر ایہہ پہلی وار نظر آیا ہے پئی ترکی تے ایران رل مل کے روس دی مدد نال شام وچ امن تے راضی ہوئے نیں۔شام مڈل ایسٹ دا افغانستان ہے اتے ایتھے امن آون نال خطہ وچ نویں تبدیلیاں آون گیاں۔ ایس وچ نرا ایران دا فیدہ نہیں، لیوانٹ دے قدیمی سلک روٹ دے چلن دا وی ماملہ ہے اتے ایس نال مڈل ایسٹ وی ماردھاڑ دی تھاں کار دیہار ول ودھ سی۔شام توں پہلاں وی لبیا تے عراق بارے اجہی نکمی پالیسیاں نے خطہ دا بیڑا غرق کردتا سی۔ لبیا تے عراق وچ وی ایہو سمجھیا جاندا سی پئی حکمراناں نوں ہٹا دیو تاں سب ٹھیک ہوجاسی۔اس ویلے ایران وی عالمی طاقتاں دا ساتھ دتا سی جہیڑی وڈی غلطی سی۔ قذافی تے صدام حسین نوں ماریا گیا سی، تاں جو رزلٹ نکلیا اوہ سب دے سامنے ہے۔ قذافی بعدوں جو کجھ لبیا تے صدام بعدوں جو کجھ عراق وچ ہویا سی اوہی اسد نوں ہٹاون نال شام وچ ہون دا خطرہ سی۔ روسیاں دی ایس تے نظر سی تاں مارے انہاں شام وچ مختلف لڑاکا گروپاں نوں مدد دین والے ترکی اتے ایران نوں اک میز تے بلا کر شام بارے نویں پالیسیاں بنائیاں۔ جے ایس وچ اڑچلاں نہ پائیاں تاں شام اتے مڈل ایسٹ ہی نہیں سگوں سب نوں فیدے ہون گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels