Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> فیدل نوں جیویں میں جاننا آں گبرئیل گارسیا مارکیز

فیدل نوں جیویں میں جاننا آں گبرئیل گارسیا مارکیز

November 26th, 2016

(اج فیول کاسٹرو ساڈے توں وداع ہو گیااے۔ ایہہ لیکھ میں 2006 وچ اُلتھا کیتا سی۔اج وچار دے نویں پڑھیاراں لئی ورتاندے پئے آں۔فیدل دیاں ہور لکھتاں وی ورتانواں گے۔) اوہدا صدق اکھر نال اے۔ اوہدی طاقت اے بھر مانا، پٹو پانا۔ اوہ اوکڑاں دی بھال کریندا اے جتھے وی ہوون۔ترکھی پریرنا دینی اوہدا سبھا اے۔ کتاباں اوہدے سواداں دے وشال نوں دسدیاں نیں۔ اوہنے سگٹ چھکنے چھڈ دِتے تاں جو اوہ اخلاقی اختیار لے سکے جیہڑا تماکو دی لعنت دے خلاف لڑائی لڑن وِچ اوس نوں چاہیدا سی۔ اوہ سوادلے کھانے پکاندا اے سائنٹفک جوش نال۔ اوہ آپنے آپ نوں شاندارسریرک حالت وِچ رکھدا اے جس وِچ روز کئی گھنٹے دی جمناسٹک تے نالوں نال تاریاں لائی رکھنا شامل اے۔ نہ ہارن والا صبر۔ لوہے رتا ضبط۔ اوہدی خیال اُڈاری شکتی اوہنوں ان ڈِٹھ ول کھچدی اے۔ جوز مارٹی اوہدا من بھاندا لکھاری اے تے اوس وِچ ایہہ گُن اے پئی اوہ مارٹی دے وِچاراں نوں مارکسی انقلاب دے لال ہڑھ وِچ رلا لیندا اے۔ اوہدی اپنی سوچ دا تت ایس پکیائی وِچ اے پئی لوکائی دا کم کردے ایہہ وی مُڈھلا کم اے پئی اِک اِک جی دا وی دھیان رہوے۔ ایہہ گل دسدی اے اوہدے اوس یقین نوں جیہڑا اوہ سدے واہ لوکاں نال میل کرن وِچ ورتدا اے۔ اوس کول ہر موقعے لئی اِک بولی ہوندی اے تے اِک خاص وسیلہ اگلے نوں راضی کرن دا جیہناں نال اوہ گلیں پیندا اے۔ اوس نوں سار اے پئی ہر اِک نال کس پدھر تے رہنا اے تے اوہدا وشال تے وکھو وکھرے کھیتراں دا علم اوہنوں بڑی سوکھ نال ہر قسم دے میڈیا نال نجٹھن جوگ کر دیندا اے۔ اِک گل اُکا پکی اے، اوہ اوتھے ای رہندا ہے جتھے اوہ کھلا ہووے، جنج دا اے تے جیہدے نال اے۔ فیدل کاسٹرو بس جتنا جاندا اے ۔ ہار ساہویں اوہدا سبھا روز دیہاڑے دی حیاتی دے نکے نکے کماں وِچ اِک نجی نکے نکے کماں وِچ اِک نجی منطق دے تابع نظریں آوندا اے۔ اوہ ایس ہار نوں مندا نہیں تے اوس نوں اِک پل چین نہیں آونا جد تیک حداں نوں اُلٹا کے اپنی فتح وچ وٹا نہیں لیندا۔ اوہدے کول سبھ توں وڈی مدد اوہدا چیتا اے تے اوہ ایس دی بھیڑی ورتوں تیک کریندا اے۔ لمیاں تقریراں یا نجی گل بات، جس وِچ ڈاڈھیاں دلیلاں تے نہ منن آلی بڑی حسابی ترِکھ ہوندی اے۔اوس نوں اِکسار جانکاری لوڑیندی اے، پیہہ کے چنگی طرحاں ملیدہ بنائی ہوئی تے ہضم ہون والی۔ اوہ 200صفحیاں دیاں خبراں نال ناشتہ کردا اے۔ جواب اُکا ٹھیک ہونے چاہیدے نیں۔ ایس گل نوں ویکھدے ہوئے پئی اوہ بالکل اتفاقی گل بات وِچ وی نِکا جیہا پاڑ وی پھڑ لیندا اے۔ اوہ انتاں دا پڑھاکُو اے۔ اوہ ہر چیز پڑھن لئی تیار ہوندا اے جیہڑی کسے پل وی اوہدے ہتھ آندی اے۔ اوہ اپنے آپ نوں جانوں کران دا کوئی موقعہ نہیں کھساندا۔ انگولا دی لڑائی ویلے اوس اِک سرکاری استقبالیے وِچ لڑائی نوں اینے ویروے نال دسیا کہ پئی اِک یورپین ڈپلومیٹ نوں ایس گل اُتے راضی کرنا اوکھا ہو گیا کہ اوس اصلوں لڑائی وِچ حصہ نہیں پایا۔ لاطینی امریکا دی بھلک بارے اوہدی نظر اجیہی اے جیہڑی بولیوار تے مارٹی دی اے، جس وِچ اِک آپسی جُڑت تے خودمختاری رکھن آلی ٹابری، جیہڑی جگ دی ہونی اگانہہ لے جاون جوگ ہووے۔ اوہ ملک جس بارے اوہ کیوبا توں مگروں سبھ توں ودھ جاندا اے امریکا اے۔ اوہناں دی فطرت بارے، طاقت دیاں بنتراں بارے تے سرکاراں دیاں گجھے ارادیاں بارے۔ اتے ایس گل نے اوہنوں مدد دِتی اے اِک تار لگن آلے تسیہے ڈکے نوں۔ اوہنے کدے کسے سوال دے جواب توں انکار نہیں کیتا، اوہ جِنا وی اُشکل دین والا ہووے، نہ ای اوس کدی صبر ونجایا اے۔ اوہناں نال گل بات وِچ جیہڑے سچ دسن وچ گھٹ اکھر ورتدے نیں تاں جے اوہ اوس نوں ہور فکراں نہ دین جیہناں نوں ہُن اوہ جاندا اے۔ ایس طرحاں کرن والے افسر نوں آکھیا’تُوں میرے توں سچ چُھپا رہیا ایں تاں جو میں فکر نہ کراں، پرجد اخیر مینوں پتہ لگنا ایں میں ایس گل پاروں ای مر جانا ایں پئی مینوں اینے سچاں دا ساہمنا کرنا پوے گا جیہڑے مینوں دسے ای نہیں گئے‘۔ پر سبھ توں گھمبیر اوہ سچ ہن جیہڑے گھاٹے لکون لئی چھپائے جاندے ہن، کیوں جے اوہ ساریاں کامیابیاں جیہڑیاں انقلاب نوں قائم رکھدیاں نیں، سیاسی، سائنسی، کھیڈاں تے رہتلی کامیابیاں۔ پر اوہدے نال نکمی افسر شاہی وی اے، روز دیہاڑے دی حیاتی تے گھروکی خوشی تے اثر پاوندی ۔ جد اوہ لوکائی نال گلی وِچ گلاں کردا اے تے اوہدی گل بات وِچ اوہ بھرپورتا تے کھروی کُھل دِلی پرت آوندی اے، اوہ اوہنوں فیدل دے ناں توں سداندے نیں۔ اوہ اوس نوں غیر رسمی ڈھنگ نال سددے نیں، اوس نال دلیل بازی کردے، اوس اُتے حق جتاوندے نیں۔ اسیں تد اِک اوّلا جی لبھ لینے آں جیہدے آپنے روپ دا پرتو سانوں اوس نوں ویکھن نہیں دیندا۔ ایہہ اوہ فیدل کاسترو اے جس نوں میں سمجھنا میں جانناں آں۔ فقیری عادتاں تے نچنت بُھلاویاںں آلا اِک جی، چوکس اکھری تے ہولے لہجے آلے پرانی فیشنی رسمی تعلیم دا چھنڈیا تے جیہڑا کوئی وی اجیہا خیال خیالن جوگ نہیں جو مہان نہ ہووے۔ میں اوہنوں جذباتی رنگ وِچ چیزاں نوں کردے سُنیا اے جو اوہ کسی ہور ڈھنگ نال کر سکدا سی جے اوہ کجھ اُڈیک کر لیندا۔ اِک واری دُراڈیاں ہونیاں دے ڈاڈھے بھار ہیٹھ دبے ہوئے نوں میں پُچھیا اوہدی جگ وِچ سبھ توں وڈی سدھر کیہ اے تاں اوس تُرت جواب دِتا ’نُکرے لگ کھلونا‘۔ (گبریل گارسیا مارکیز اِک نوبل انعام جیتو ناول کار اے۔ ایہہ اِک سودھیا ٹوٹا اوس لیکھ دا اے جیہڑا کیوبا دے اخبار ’گرانمہ‘ وِچ چھپیا۔ فیول آپے ہُن 80ورھیاں دا اے) 17اگست 2006


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels