Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> ناول نگار گبریل گارسیا مارکیز دی حالت ماڑی، کینسر کھلر گیا

ناول نگار گبریل گارسیا مارکیز دی حالت ماڑی، کینسر کھلر گیا

وچار ڈیسک
April 15th, 2014

میکسیکو سٹی: کولمبیا دے ناول نگار گبریل گارسیا مارکیز دی حالت انتہائی نازک اے تے پچھلے دنیں ہسپتال وچ داخل کیتے جاون مگروں اپنے گھر وچ آرام دوران اوہنوں کئی اوکڑاں دا ساہمنا کرنا پے رہیا اے۔ ایہہ گل اوہناں دے گھر والیاں نے بیتے دن دسی۔ اوہناں دے گھر والیاں نے ایہہ بیان نوبل انعام جیتو 87 سال دے لکھاری نوں میکسیکو سٹی دے ہسپتال توں ویلھے کیتے جاون دے اک ہفتے بعد جاری کیتا۔ مارکیز نوں پھپھرے تے پیشاب دی نالی دے انفیکشن پاروں اٹھ دن تائیں ہسپتال رکھیا گیا سی۔ ایس بیان وچ میکسیکو دے اخبار الیونیورسل دی اوس رپورٹ دا کوئی ذکر نہیں جیہدے وچ دسیا گیا سی کہ گارسیا مارکیز کینسر نال لڑ رہے نیں تے وڈی عمر پاروں اوہناں دا سکون والیاں دواواں نال علاج کیتا جا رہیا اے۔ الیونیورسل نے وساہ جوگ وسیلیاں نال دسیا اے کہ کینسر اوہناں دے پھپھریاں تے جگر تائیں کھلر گیا اے۔ بیتے ہفتے ہسپتال توں ویلھے کیتے جاون مگروں گارسیا مارکیز نوں اک ایمبولینس وچ میکسیکو دی راجدھانی وچ اوہناں دے گھر لے جایا گیا جتھے اوہ کئی دہاکیاں توں رہ رہے نیں۔ اوہناں دے انفیکشن دا اینٹی بایوٹک دواواں راہیں علاج کیتا گیا تے بعد وچ صحت بحالی لئی اوہناں نوں گھر شفٹ کر دتا گیا۔ کولمبیا دے رسالے الٹائمپو وچ چھپے اوہناں دے گھر والیاں دے بیان وچ آکھیا گیا اے کہ گابو (مارکیز دا پیار دا ناں) گھر وچ ای چنگی صحت لئی رکھے جاون گے۔ بیان مطابق اوہناں دی حالت بہتر اے پر کمزوری بہت اے تے عمر کئی اوکڑاں دے ساہمنے دا خطرہ اے۔ اوہناں دی بیوی مرسیڈس تے پتراں روڈ ریکو تے گونزیلو نے میڈیا توں اپیل کیتا اے کہ اوہناں دی رازداری دا اخترام کیتا جاوے۔ کولمبیا دے شہر میگدالینا والے لکھاری نے کہانی کار، ناول کار تے سکرین رائٹر دے نال نال پرچا کار وجوں وی ناں کمایا اوہناں نوں ویہویں صدی دے مقبول ترین لکھاریاں وچ گنیا جاندا اے۔ اوہناں نوں 1982ء وچ نوبل پرائز دتا گیا سی۔ اوہناں دے ناول ’’اکلاپے دے سو سال‘‘ ، ’’کرنل نوں کوئی خط نہیں لکھدا‘‘، ’’ہیضے دے دناں وچ پریم‘‘، ’’پہلاں دس دتی گئی موت دا روزنامچا‘‘ بہت مقبول ہوئے۔ اوہناں دے ناول ’’موت دا روزنامچا‘‘ نوں افضل احسن رندھاواں نے پنجابی چ ترجمہ کیتا سی جد ’’کرنل نوں کوئی خط نہیں لکھدا‘‘ تے کجھ ہور کہانیاں وی پنجابی وچ ترجما ہو چکیاں ہین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels