Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> بنگالی مولوی نوں پھانسی‘ ساڈا تلملانا بے معنی اے

بنگالی مولوی نوں پھانسی‘ ساڈا تلملانا بے معنی اے

چاچا خامخواہ
February 28th, 2014

بیتے دنیں روزوار ’’لوکائی‘‘ وچ پیو دے انجام توں ناواقف حسینہ دے عنوان نال اک کالم شائع کیتا گیا اے جیہڑا بنگلہ دیش دے حوالے نال اے۔ ایس عقلمندانا لیکھ وچوں پہلاں کجھ مثالاں ویکھ لوو‘ فیر گل اگے چلاواں گے۔
’’پاکستان جدوں وجود وچ آیا اے اوس دِن توں اج تک ایہہ اپنے اسلامی ملکاں دی خیر خواہی چاہندا اے۔‘‘
’’ پاکستان تے بنگلا دیش دا وکھرا ہون دا واقعا اچانک ساہمنے نہیں آیا سگوں ایہدے پچھے ورھیاں دیاں محرومیاں تے شیخ مجیب دی غدارانا چال دی اِک لمی داستان اے۔‘‘
’’جنرل یحییٰ خان نے فوجی کارروائی راہیں امن و امان قایم کرن دا حکم دِتا۔ فوج نے شیخ مجیب نُوں گرفتار کر لِتا تے باغیاں دے خلاف سخت کارروائی شروع کر دِتی۔ کئی مہینیاں تک جاری رہن والی ایس کارروائی وچ وڈی گنتی وچ مجیب دے حامی ہلاک ہوئے۔ کیوں جے شیخ مجیب تے ایہدے سنگیاں پِچھے بھارت دا ہتھ سی‘ ایس لئی لکھاں بندے جان بچاون لئی سرحد پار کر کے بھارت چلے گئے۔‘‘
’’(حسینہ واجد دی پاکستان دشمنی دی مثال) عبدالقادر ملا دی پھانسی دے علاوہ کئی دُوجے جماعت اسلامی دے رہنماواں نُوں جیل وچ بند نیں۔ ایہناں دا قصور کیہ سی؟‘‘
’’ کیہ پاکستان اپنی حمایت یافتہ لوکاں نُوں بنگلا دیش وچ حسینہ 420 دے رحم و کرم اُتے ا کلیاں چھد دیوے گا یاں اوہناں لئی کوئی عملی پیر وی چُکے گا؟ ‘‘
ایہہ مثالاں ایہہ دسن لئی کافی نیں کہ نوے فیصد پاکستانیاں وانگوں کالم نگار وی مشرقی پاکستان وچ فوجی کارروائی‘ بنگلہ دیش دے قیام‘ پاکستان دی شکست تے اوہدے وچ فوج تے جماعت اسلامی دے کردار بارے کنفیوژن داشکار نیں۔ اوہناں نے شروع وچ ای مِتھ لیا اے کہ پاکستان نے ہمیشہ مسلمان بھرواں دا ساتھ دتا اے۔ سوال ایس گل دا اے کہ ایہہ ساتھ دینا تے ہر تھاں ماما بنن داشوق کیوں؟ کیہ باقی مسلمان بھرا وی اونے ای ’’چنگے‘‘ نیں؟ اج وی پاکستان اندر لگ بھگ 30 لکھ افغاناں توں وکھ لکھاں بنگلا دیشی‘ بھارتی‘ برمی تے خورے کون کون ’’اسلامی بھرا‘‘ رہندے نیں۔ کیہ ایس بنیاد اتے کوئی اک وی پاکستانی افغانستان یاں بنگلا دیش جا کے رہ سکدا اے؟ کیہ سعودی عرب جیہڑا اسلام دا گھر اے‘ تہانوں ایس بنیاد اتے اپنے کول مستقل رکھ لوے گا؟ اجے سو سال پورے نہیں ہوئے ’’تحریک ہجرت‘‘ پاروں ہزاراں مسلمان مونہہ چک کے افغانستان ٹر پئے سن۔ اوتھوں دا مثالی استقبال کتاباں وچ ویکھیا تے پڑھیا جا سکدا اے۔
جتھے تک شیخ مجیب دی ’’غداری‘‘ دا تعلق اے‘ اوہی بندا جیہڑامسلم لیگ دے جلسیاں وچ رلت لئی سایکل اُتے کلکتہ توں ڈھاکا آوندا تے جلسیاں وچ درِیاں وچھاندا ہوندا سی‘ کیہ راتو رات غدار بن گیا؟ کیہ مسلم لیگ بنان والے تے قرارداد پاکستان پیش کرن والے بنگالی غدار سن؟ جے ایس مہنے توں پہلاں اسیں اپنے گریبان وچ جھات پا لویے تاں زیادہ بہتر ہووے۔
جنرل یحییٰ دا فوجی کارروائی دا حکم ای اوہ حکم سی جہنے پاکستان دے سینے وچ چھرا گھوپ دتا۔ سیاسی مسئلے دا فوجی حل ہمیشہ مہلک ہوندا اے۔ بقول کالم نگار ایس کارروائی پاروں وڈی گنتی وچ مجیب دے حمایتی ہلاک ہوئے۔ کیہ قتل عام دے بعد توقع کیتی جا سکدی سی کہ بچ گئے بنگالی تہاڈے گل پھلاں دے ہار پاندے؟
ایس فوجی کارروائی وچ جماعت اسلامی دیاں بغل بچا تے فوج دیاں امداد یافتہ تنظیماں البدر تے الشمس نے بنگالیاں دا قتلام کیتا۔ 14 دسمبر نوں جدوں یقین ہو گیا سی کہ بنگلا دیش بن کے رہوے گا‘ قتلام دیہاڑ منایا گیا تے چُن چُن کے بنگالی دانشوراں‘ لکھارِیاں‘ پروفیسراں‘ ڈاکٹراں‘ وکیلاں تے ہورناں دا قتلام کیتا گیا۔ ایسے قتلام وچ ’’مظلوم‘‘ ملاں عبدالقادر نے کوئی سوا تن سو بندے مار کے ثواب کمایا۔ اینے بے گناہ لوکاں دے قاتل نال کیہ سلوک ہونا چاہیدا سی؟ جے قانون مطابق قاتل دی سزا پھانسی اے تاں کیہ ملاں عبدالقادر نوں پھلاں دے ہار پائے جاندے؟ بے گناہ بنگالیاں نوں قتل کرن نال اوہدی پاکستان نال کیہڑی حب ظاہر ہوندی اے؟ کیہ پاکستان نال پیار دا مطلب بیگناہ بندے قتل کرنا اے؟ کیہ بنگالیاں دا لہو پاکستانیاں نالوں زیادہ پتلا سی؟
پاکستان ولوں سوچ سمجھ کے قدم چکن دا مشورہ وی اک بے کار گل اے۔ بنگلہ دیش نے اپنے اک شہری تے اک قاتل نوں پھانسی دتی اے‘ ایہہ اوہناں دا اندرونی معاملہ اے‘ ایہدے وچ دخل دین دا سانوں کیہ حق اے؟ البتہ ماما بنن دا شوق اک وکھری گل اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels