Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> نیلسن منڈیلا۔۔۔ تے اوہدے مگروں

نیلسن منڈیلا۔۔۔ تے اوہدے مگروں

وچار ڈیسک
February 27th, 2014

سچائی‘ نیکی تے حسنِ عمل کِسے خاص زمانے‘ عقیدے یاں قوم دی میراث نہیں۔ مولانا ازاد نے کہیا اے۔ ’’سچائی اصل وچ اِک اے‘ شروع توں موجودا اے‘ تے سارے انساناں تے قوماں لئی اِکو جہی آندی رہی اے۔ دنیا دا کوئی ملک‘ کوئی چَپّا نہیں‘ جِتھے خدا دے سچے بندے پیدا نہ ہوئے ہون تے اوہناں نے سچائی دی تعلیم نہ دِتی ہووے‘‘۔
بیشک انساناں وچکار ہر دور وچ برگزیدا انسان پیدا ہوندے رہے نیں تے ایس حوالے توں پرانیاں تے نویاں وچ کوئی فرق نہیں۔ مہاتما بدھ‘ کنفیوشش‘ سقراط‘ حضرت مسیح‘ آنحضرت تے گورو ناناک دا شمار یقیناًپرانے دور دے اوہناں برگزیدا انساناں وچ ہوندا اے جہناں نے سچائی‘ حق تے صداقت‘ امن تے محبت دا علم اُچا کر کے انسان دوستی‘ بے لوث انسانی خدمت تے قربانی دی عظیم تاریخ رقم کیتی تے ایسے راہ وچ پیش آن والیاں بے پناہ آزمائشاں تے مصیبتاں دا مقابلا وی انتہائی صبرو استقامت تے برداشت نال کیتا۔ ایہناں ساریاں برگزیدا انساناں دیاں تعلیمات دا خلاصا ایہہ سی کہ دنیا وچ سچائی ای ایہو جہی اسمانی قدر اے جہدے ساہمنے جھک جان دے سوا کوئی چارا نہیں۔ ایہہ سن پرانے دور دے برگزیدا‘ ایس دور وچ مہاتما گاندھی‘ رابندر ناتھ ٹیگور‘ خان عبدلغفار خان‘ مولانا ابولاکلام آزاد‘ جواہر لعل نہرو‘ ڈاکٹر البرٹ شوٹزر‘ مارٹن لوتھر‘ مدر ٹریسا تے نیلسن منڈیلا ایسے راہ اُتے ٹُردیاں ہویاں حاضر دور دے عظیم نجات دہندا بنے۔ ایہناں ساریاں دا آدرش اِک سی‘ سچائی تے حسن دے نال مضبوط پیمانِ وفا اُستوار رکھنا تے انسانی فلاح تے بھلائی لئی وقف ہونا۔ ایس توں علاوہ ایہناں ساریاں برگزیدا بندیاں نے بلند نصب العین دے حصول لئی وی بلند وسائل تے راہ دا انتخاب کیتا۔ نیلسن منڈیلا بِلا شُبہ ایسے سلسلے دے آخری برگزیدا انسان سن جیہناں نُوں بالکل صحیح 20 ویں صدی دا آخری عظیم نجات دہندا تے تاریخ دا عالمی ہیرو کہیا گیا۔
نیلسن منڈیلا نے 27 ورھے قید کٹن تے پُر امن جدو جہد نال جِس طرحاں جنوبی افریقا وچ سفید فام قوم دے پنج سو سالا سیاسی پندار دے بُتاں نُوں توڑیا اے‘ اوہ جاری دور وچ افریقی تاریخ دا اِک تقلید جوگ تاریخی کارناما اے۔ ایہو وجہ اے کہ 27 سال جیل وچ قید تنہائی لنگھان دے بعد جدوں اوہ اپنے ملک دا حکمران بنیا‘ تے پوری دنیا نے ایہدی سیاست‘ قربانی تے بے لوث خدمتاں دا اعتراف کیتا۔ اوہناں نے 1999 وچ عدالت نُوں خطاب کردیاں ہویاں کہیا سی ’’میں جدوجہد سفید فام تے سیاہ فام غلبے دے خلاف کیتی اے۔ میں اِک جمہوری تے ازاد انسانی معاشرے دے قیام دا خاہاں آں جِتھے سارے لوک کٹھے تے اِکو جیہیاں سہولتاں نال زندگی گزارن گے۔ ایہو میری حیاتی دا نصب العین اے‘ جہنوں حاصل کرن لئی میں جینا چاہنا آں۔ پر مائی لارڈ! جے ضرورت پئی تے ایس نصب العین خاطر میں اپنی جان دین لئی وی تیار آں۔
تاریخ نے سانوں دسیا کہ حق دی اواز دنیا وچ اِک ای انداز نال بُلند ہوندی رہی اے۔ نیلسن منڈیلا نے 20 ویں صدی دے مُکن اُتے حق دی جہڑی اواز بُلند کیتی اوہ دنیا لئی کوئی نویں اواز نہیں سی۔ حق تے سچائی دی ایہو اواز نویں تے پرانے زمانے وچ مشرق و مغرب وچ دوہاں وچ وقتاً فوقتاً بُلند ہوندی رہی اے۔ ایہو اوہ اواز سی جیہڑی صدیاں پہلاں سقراط نے یونان دی عدالت وچ بُلند کیتی سی۔ حاضر دور وچ مہاتما گاندھی‘ ٹیگور‘ پنڈت جواہر لعل نہرو‘ ڈاکٹر امبید کر‘ اربندو گوش‘ رادھا کرشنا‘ ستیاجیت رے تے امریتا سین ورگے روشن فکر سیاسی قائدین تے اہلِ دانش نے جنم لِتا۔ ایہہ ایہناں ای باکمال لوکاں دی محنت دا صلا اے کہ ہندستان نُوں اج قوماں دے عالم وچ اِک قدر جوگ مقام حاصل اے تے دنیا ایہنوں ساریاں نالوں وڈی جمہوریت دے ناں نال جاندی اے۔ ایہو حال یہودیت دے ناں لین والیاں دا وی اے جیہڑے صدیاں لمے ظلم و ستم سہن دے بعد اج دنیا دی ساریاں نالوں وڈی طاقتور اواز تے اِک زندہ حقیقت اے۔
جدید دور وچ مولانا ابوالکلام ازاد تے خان عبدالغفار خان ورگے مردانِ صدق و صفا نے جنم لیا جہناں نے ساریاں نالوں مشکل گھڑی وچ اپنے ہم وطناں تے ہم مذہباں دی خدمت کر کے لازوال قربانیاں دی تاریخ رقم کیتی پر بدلے وچ اوہناں دے ہم مذہباں نے اوہناں نال جیہڑا سلوک کیتا‘ اوہ مسلماناں دی تاریخ دا ساریاں نالوں وڈا المناک باب اے۔ اُردو دی آخر اوہ کہڑی گالھ سی جہڑی ایہناں دوہاں دے حصے وچ نہیں آئی پر ایہناں دوہاں دی عظمت نُُُوں داد دوو کہ گالھاں کھا کے وی ایہہ بقول غالب بے مزا نہ ہوئے۔
دوہاں دیاں زندگیاں مسلسل جدو جہد نال عبات رہیاں۔ دوہاں نُوں مسلماناں دے مسئلیاں نے مردے دم تک چین نال بہن نہیں دِتا۔ ہندستان دی تقسیم دے بعد آزاد دے ابتلا دا دور ختم ہو گیا پر خان عبدالغفار خان دا فیر وی جاری رہیا۔ آزاد دی باقی زندگی ازاد ہندستان لئی تعلیمی خدمتاں سرانجام دین وچ لنگھی جد کہ ایہدے اُلٹ خان عبدالغفار خان کدی مملکت خداد وچ پسِ دیورِ زندان تے کدی بھرے بازار وچ رُسوا ہوئے۔ اپنی مشقت بھری تے مصبیتاں بھری زندگی بارے خان صاحب لکھدے نیں: ’’میری رفاقت وچ مصیبتاں تے تکلیفاں نیں‘ میرا راہ کنڈیاں نال بھریا ہویا اے۔ میرے نال صرف اوہ لوک ٹُر سکدے نیں جہڑے اپنے ملک تے قوم لئی اپنے آپ نُوں مٹی نال مِٹی کر سکدے ہون۔ ایس راہ وچ صدارت‘ جرنیل بننا یاں ممبر بننا اے‘ نہ وزیر بننا اے۔ ایس راہ وچ قربانی اے‘ بس تکلیفاں تے مصیبتاں نُوں سہنا اے۔
20 ویں صدی دے عظیم رہنماواں دے ذکر وچ پنڈت جواہر لعل نہرو دا ناں وی ناقابلِ فراموش رہوے گا۔ اوہ کوئی ولی نہیں سی پر تحریک ازادی ہند دورا اوہناں نے جہڑیاں بے مثال قربانیاں دِتیاں تے اوہدے بعد ہندستان وچ جمہوریت دے قیام دے حوالے توں اوہناں نے جہڑا کردار ادا کیتا اوہ بِلا شُبا جدید تاریخ دا اِک ناقابلِ فراموش باب اے۔ رسل جہدی قلم توں خدا وی محفوظ نہیں رہیا‘ نہرو دے حکمرانی دے انداز دی تعریف کیتیوں بغیر نہیں رہ سکیا۔
(چلدا)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels