Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> اج کشمیر ڈے ہے۔کشمیر بارے پتہ کجھ نہیں؟

اج کشمیر ڈے ہے۔کشمیر بارے پتہ کجھ نہیں؟

وچار ڈیسک
February 5th, 2018

کشمیر ڈے نرا بھارت دی نکمی پالیسیاں نوں ایکسپوز نہیں کردا سگوں سانوں اپنی کوڑ پالیسیاں ول جھات پاون دا وی آکھدا ہے۔قبائلی جتھے گھلن توں جبرالٹر تے کارگل اتے چناب فارمولے تیک اساں کشمیر دے مسلے نوں آپ کنج رگیدیا ایہہ کہانی بھارتی کوڑ پالیسیاں دی آڑاں وچ لکائی جاندی ہے۔کشمیر تے نکا تبت ورگی تھاواں پنجاب تے کابل نال صدیاں توں، اسلام آون توں وی پہلاں توں کس سانگے پاروں جڑیاں نیں ایس بارے کوئی گل نہیں ہوندی۔اکبر لہور وچ بیٹھ کے اٹک، کشمیر تے ٹھٹے نیڑے لہوری بندر دی مہماں کیوں کیتیاں، سانوں کجھ پتہ نہیں۔ اٹھارویں صدی وچ پنجاب دی انہاں پہاڑی تھاواں تے کون، کون اٹھیا تے کنج ایہہ تھاواں بھنگی، سکر چکیا تے کھنیہ مثلاں نال نبھا کیتا ایس بارے اساں جاندے ہی نہیں۔ 
مہاراجہ رنجیت سنگھ دے دور وچ دو شیخ بھرا کشمیر دے راجہ سن اتے ایس دور وچ ہی لداخ(نکا تبت) وی کشمیر دا حصہ بنیا کہ زورآور سنگھ دی دھائیاں پئے گیاں۔پشمینے دی تجارتاں ودھ گیاں تے اوس دی دھماں پیرس تیک وادھو کہ برائن ہیوگل ایس بارے ڈھیر لکھیا۔مورکرافٹ نوں لندنی سرکار کس مشن تے کشمیر گھلیا تے اوہ کنج جنوراں نوں کشمیر توں کلکتے اتے فیر لندن لے کے گیا ایہہ ساڈی پشمنے دی تجارتاں تے برٹش نظر دی گواہیاں۔پرسانوں کیہہ؟ رنجیت دے دور وچ کشمیر دے راجے دو شیخ بھرا ہی رہے، پر انگریزاں1846وچ کیوں انہاں نوں کڈہیا تے کشمیر نوں لہور دربار توں توڑ کے وکھرا کیتا تے جموں دے گلاب سنگھ نوں حکمرانیاں دتیاں؟اتے جموں تے کشمیر دی ریاست بنا دتی۔جموں تے سری نگر وچ کیہڑی سانجھ تے کیہڑا پاڑ، ایس بارے کون جان سی۔1929وچ انگریزاں کیوں اک خفیہ معاہدے پاروں گللگت تے بلتستان نوں کشمیر دے ڈوگرے مہاراجہ توں پٹے(لیز)تے لتا پورے50سالاں لئی۔ فیر جداں ایتھوں جانا پیا تے 12اگست1947وچ پٹے نوں مکا دتا۔ انہاں اٹھارہ سالاں وچ انگریزاں اتھے کیہہ کیتا،کیہڑے نویں کھڈاری ایتھے پیدا کیتے، کس نوں چکیا، کس نوں رگیدیا؟ اساں جانن دی کوششاں کیتیاں؟ہورے ایس لیز دی خبر کتھے نہ کتھے لگ پتہ گئی سی تاں مارے1931دی وڈی کشمیری لہر چلی ڈوگرے راجہ خلاف جس نوں اک نویں پنجابی جماعت احرار لیڈ کیتا۔جماعت علی شاہ، گولڑہ شریف، فیض الحسن، ظفر علی خان،داود غزنوی،مولانا مظہر علی اظہر،چوہدری افصل حق سب احرار نال سن اتے جلندھر، ہشیارپور،امرتسر،نارووال، سیالکوٹ،گرداس پور توں جموں ، راجوڑی، بارہ مولا، سری نگر تے پنچھ تیک وڈا پڑ لگیا سی تے گرفتاریاں پاروں جیلیاں بھر گیاں سن۔ایہہ لوکاں دی پدر تے ریاست کشمیر وچ پہلی وڈی جاگرتی دی لہر سی پر ایتھے کسے نوں نہیں پتہ۔اج دی کشمیری لہر دے سارے کھڈاری اوسے پرانی لہر توں پنگرن والے لیڈراں دے پچھلگ جے پر اوس لہر نوں کوئی کیوں یاد نہیں رکھنا چاہندا۔
اوس لہر دے جواب وچ یونینسٹ پارٹی کیہہ کیتا سی تے ایس توں بعدوں پنجابی مسلماناں اندر وی اتے سکھ ، مسلم سانگیاں وچ کنج پاڑ ودھائے گئے ایس بارے اج گل نہیں ہوندی۔سن47 وچ کس قبائیلاں نوں گھلیا سی تے انہاں نوں کیہہ لوبھ دتے سن؟ ائیرمارشل اصغر خان سنے بہوں لوک کوکدے رہے پئی قبائلی جے بارہ مولا دے بازار لٹن وچ مست نہ ہوندے تاں بھارت سری نگر ائیرپورٹ تے مل نہیں مار سکدا سی۔ ایہہ کوئی نہیں پچھدا پئی انہاں نوں لیڈ کون کر رہیا سی؟ جے انہاں نوں مال عنیمت پاروں لیایا گیا سی فیر ایہہ گلہ کس نال؟1919وچ افغان فوج دے پردھان تے ظاہر شاہ دے پیو نادر خان نے اینج دے جہادی قبائلی دستے کوہاٹ تے حملے لئی بنائے سن پر جداں انہاں ٹل نیڑے ہندواں دا وڈا کپڑے دا بازار ویکھیا تے اوہ اوس نوں لٹ کے مڑ پرت گئے سن کیونجے انہاں نوں مال عنیمت ملن دی امیداں تے اساریا گیا سی۔ آزاد جموں تے کشمیر نوں پہلا چونواں صدرپاکستان بنن توں بارہ سال بعدوں کیوں ملیا؟ کشمیریاں ایس لئی کیہڑی لہر چلائی سی۔ پہلے چونویں صدر کے ایچ خورشید، لون ہوراں نوں اگست1964وچ کیوں استعٖفی دینا پیا؟ اوہ سمجھدے سن پئی کشمیر مسلے دا حل فوجی نہیں سیاسی ہے۔ فیر جبرالٹر تے ہن اج تیک مسلہ ہور وگڑ چکیا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels