Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> بلوچستان حکومت۔عمر چار مہینے، گوادر پراجیکٹ تے جھیڑے، شک وادھو۔ایجنڈا کیہہ ہے؟

بلوچستان حکومت۔عمر چار مہینے، گوادر پراجیکٹ تے جھیڑے، شک وادھو۔ایجنڈا کیہہ ہے؟

وچار ڈیسک
January 26th, 2018

وائس آف امریکہ دی ہشیار خبر وچ ایہہ نہیں دسیا گیا پئی بلوچستان وچ کنج حکومت بنائی گئی۔ایس توں شک ودھدا ہے پئی ایرانی باڈراں تے چینی سرمایہ کاریاں والی تھاواں تے کجھ ہور تے نہیں ہو رہیا؟سٹیبلشمنٹ تے زرداری بارے بلوچستان وچ کھیڈ دی خبراں بارے کیہہ وائس آف امریکہ بے خبر ہے؟جس صوبے وچ ڈھائی سال قوم پرستاں دی سرکار رہی ہوئے اتے اجیہا کوئی فیصلہ نہ ہویا ہوئے جس پاروں ووٹاں دے حق نوں مکاون دی گل کیتی گئی ہوئے اتھے ہشیاریاں نال بنائی بلوچستان دی نویں سرکار اک اجیہا فیصلہ کرے جیہڑا ملک وچ طوفاناں نوں واجاں دے اوہ کیہہ ہے؟ ایسی سرکار جس دی عمر نری پنج مہینے ہے ؟ کیہہ ایسے ایجنڈے لئی ایہہ سرکار بنوائی گئی ہے؟ جے ایس تے جھیڑا ودھیا تے ایرانی باڈراں تے چینی سرمایہ کاریاں دے مرکزی صوبے وچ انتشاری سیاستاں ودھن گیاں؟ کیہہ ایجنڈا ہے جس پاروں ق لیگ دا وزیر اعلی بنوایا گیا اتے زرداری اگے بلوچستان کابینہ حاضریاں بھریاں۔ووٹاں دے حق نوں ڈکن دا فیصلہ کسی تصفیہے نال ہوندا تے گل ہور سی پت ایہہ فیصلہ اوہ صوبائی سرکار کرن جا رہی ہے جس دی حیاتی نری پنج مہینے ہے۔وائس آف امریکہ جنج بلوچستان وچ سرکار دی تبدیلی تے چپ ہے اوہ شک ودھاون لئی کافی۔ ہن لہور وچ اندرون شہر دے پرانے لہوریے اقلیتاں بن چکے نیں تے کل نوں اوہ وی ایس فیصلے پاروں کجھ سوچن؟ اجہے نویں کٹے کھلن نالکس نوں فیدہ ہو سی؟ ہن تساں وائس آف امریکہ دی ہشیار خبر پڑھو۔چیتے رہے پئی بلوچستان دے ایہہ نویں وزیراعلی ہورے پاکستان دے پہلے وزیر اعلی نیں جیہڑے نرے پنج سو ووٹاں نال ایس عہدے تے اپڑے نیں۔
پاکستان دے جنوب مغربی صوبے بلوچستان دی حکومت نے اعلان کیتا ہے کہ پاک چین اقتصادی راہداری تے گوادر بندرگاہ دی تعمیر دے بعد گوادر دی مقامی آبادی نوں اقلیت وچ تبدیل ہون توں بچان لئی صوبائی اسمبلی قنون سازیاں کرسی۔ بلوچستان دے نویں چنے وزیراعلیٰ میر عبدالقدوس بزنجو نے بدھ نوں کوئٹہ وچ اک پریس کانفرنس دے دوران دسیاکہ نویں قنون سازی پاروں گھٹ و گھٹ 20 سالاں لئی صوبے دے باہر توں گوادر آن والیاں نوں ووٹ دا حق نہ دین دا فیصلہ کیتا جاسکدا ہے تانجے مقامی آبادی دے تحفظات دا ازالہ کیتا جاسکے۔ وزیراعلیٰ نے دسیا کہ انہاں نے وزارت قنون نوں آکھیا ہے کہ پاکستان دے آئین تے قنون دی روشنی وچ صوبے وچ ایسا قنون بنایا جائے جو مسلے پیدا کرن دی تھاں گوادر دی مقامی آبادی دے حقاں دے تحفظاں دا ضمانتی ہوئے۔ انہاں نے آکھیا بلوچستان دی آبادی گھٹ ہے جس پاروں ایہہ خدشہ ہے کہ جداں وڈی گنتری وچ لوک باہر توں صوبے وچ آن گے تے گوادر دے نال بلوچستان دے مقامی لوک وی اقلیتاں وچ تبدیل ہون گے۔ انہاں نے آکھیا کہ جے انج ہویا تے ایس توں صوبے لئی وادھو مسلے پیدا ہون گے جس دی وجہ توں صوبائی حکومت دی کوشش ہے کہ ایہہ معاملہ وفاق دے نال چُکن۔ وزیراعلیٰ نے آکھیا کہ ایس مسئلے دا اک حل ہوسکدا ہے کہ آون والے کجھ سالاں یا گھٹ و گھٹ 20 سال لئی باہر توں آن والیاں نوں ووٹ دا حق نہ دتا جائے جس دے بعد انہاں دے بقول آن والی نسل خود ایس مسئلے نوں مناسب طریقے نال طے کرے گی۔ بلوچستان دی قوم پرست جماعتاں گوادر بندرگاہ دی تعمیر تے پاک چین اقتصادی راہداری دے اعلان بعدوں خدشیاں دا اظہار کررہیاں جے کہ انہاں منصوبیاں پاروں دوجے صوبیاں توں لوکاں دی اک وڈی گنتری روزگار لئی ساحلی شہر گوادر وس جا سی جس توں گوادر دی مقامی آبادی دے متاثر ہون دے نال نال صوبے دی آبادی تے وی بھیڑا اثر پئے گا۔ انہاں جماعتاں دا مطالبہ رہیا ہے کہ وفاق ایس سلسلے وچ قنون سازی کرکے صوبے دے لوکاں دے تحفطاں نوں دور کرے۔ پریس کلب کوئٹہ دے صدر تے تجزیہ کار رضا الرحمان دا کہنا ہے کہ صوبائی حکومت ولوں گوادر دے حوالے توں قنون سازیاں کرن دا فیصلہ بہوں ودھیا ہے کیونجے ایس دا مطالبہ کافی چرتوں کیتا جارہیا ہے سی۔ وائس آف امریکہ نال گل بات کردے ہوئے انہاں نے آکھیا کہ ایس پاروں صوبے دے عوام دے حقاں دی راکھیہوئے گی۔ بدھ نوں اپنی پریس کانفرنس وچ وزیراعلیٰ میر عبدالقدوس بزنجو نے شکوہ کیتا کہ وزیراعظم شاہد خاقان عباسی نے ہلے تک انہاں نوں وزیراعلیٰ دا منصب سنبھالن دی مبارکاں نہیں دتیاں تے جداں انہاں نے وزیراعظم نوں فون کیتا تے انہاں فون وی اٹینڈ نہیں کیتا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels