Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> لہور وچ لٹریری فیسٹیول جاری: لوکاں دی رلت۔پنجاب تے پنجابی دی گل۔دوجا دیہاڑ

لہور وچ لٹریری فیسٹیول جاری: لوکاں دی رلت۔پنجاب تے پنجابی دی گل۔دوجا دیہاڑ

وچار ڈیسک
January 14th, 2018

تازے وچاراں دے بھنڈار پاروں اساریا لٹریری اتے فکری میلہ الحمرا وچ جاری جے اتے کل دے بھرنویں پروگراماں بعدوں اج وی ایس وچ بہوں پروگرام ہون گے۔پرانے لٹریری میلیاں توں الٹ، ایس میلے وچ پنجاب تے پنجابی بارے پروگراماں پاروں ایس دا رنگ وکھرا کہ دھرتی بارے گل توں بغیر گل اگے نہیں ودھ سکدی۔اج سوا بارہ وجے 1947دی ونڈ بارے پیپاوردی دی کیمرج یونیورسٹی توں چھپی نویں کتاب توں سیشن شروع ہون گے کہ ایس توں پہلاں برطانیہ رہن والے مسلماناں بارے پردھان سیشن چلدا سی جس وچ سعیدہ وارثی گل بات کر رہے نیں۔ ونڈ بارے پروگرام افضل ساحر چلا سی اتے قائداعظم یونیورسٹی دے سعید اعوان گل بات وچ رلت کرن گے۔ایس دے نال نال دوجے ہال وچ مولانا بھاشانی تے پروگرام ہو سی کہ مولانا بھاشانی نوں چیتے رکھ کے ایس میلے والیاں ہک ہور وڈا کم کیتا ہے۔پچھے لہور دے جمہوری پبلشر عوامی لیڈر مولانا بھاشانی بارے چھاپی ہے۔پاکستان بنن دی لہر وچ کم کرن والے مولانا بھاشانی دی سیاستاں نوں حسین شہید سہروردی دی آگوائی وچ اگے ودھن دی تھاں ملی سی اتے اوہ نیشنل عوامی پارٹی دے موڈھیاں وچوں سن۔ جداں1966وچ مولانا تے ولی خان وچ پاڑ ودھیا تے نیپ بھاشانی دے دھڑے دا ناں وڈا سی اتے میجر اسحاق تے سی آر اسلم ورگے کھبے دے پکے بندے مولانا نال رل گئے سن۔اگلے سیشناں وچ فرح ناز اصفہانی دی اقلیتاں بارے کتاب دا پروگرام وی ہے اتے یونیورسٹیاں وچ ودھدی ہوئی انتہا پسندیاں خلاف پروگرام وی ہے جس وچ اکبر زیدی،نظام الدین، طاہر امین تے جی سی لہور دے حسن شاہ رلت کرن گے۔پونے تن وجے دے سیشن وچ گریژن سٹیٹ دے حوالے نال وڈا سیشن ہو سی جس وچ نجم سیٹھی،پروفیسر اشتیاق، سجاد نصیر تے پرویز اقبال چیمہ گل بات کرن گے۔ایس دے نال نال دوجے ہال وچ بھگت سنگھ باے پروگرام وچ یونیورسٹی آف ٹورنٹو توں آئے پروفیسر ڈینیل ایلام گل چھون گے۔ چاروجے نویں پنجابی کہانیاں دی کتاب آئی پرے دی واء بارے سیشن ہو سی کہ ایس کتاب وچ دادا امیر حیدر ورگے پنجابی کیمونسٹ دی کہانی وی ہے،انگریز خلاف لڑن والے سیاسی دانشور مولانا عبید اللہ سندھی دی کہانی وی ہے اتے تھلڑی پدر تے چوڑیاں تے مصلیاں وچ کم کرن والے آغا خاں سہوترا دی کہانی وی کہ ترے بندے20ویں صدی دی ترقی پسند لہر دے ترے پردھان پکھ جنہاں نوں چیتے نہیں رکھیا جاندا پر لوکائی وچ انہاں دا بھار کوئی گھٹا نہیں سکیا۔ایہہ ترے لوک نہیں سگوں کھبے دی تواریخ دے ترے پکھ نیں کہ بالشویک پارٹی نال رل کے سدھا سدھا کم کرنا،دھرم دے ترقی پسند حوالیاں اتے عوامی سیاستاں دی ٹیک نال کم کرنا اتے سماج دے سب توں تھلڑے طبقیاں وچ کم کرنا اوہ ترے رستے نیں جنہاں دی منزل، ٹیچا تے ہک سی پر تجربے وکھرے وی سن۔ نین سکھ ہوراں جنج تواریخ تے سیاستاں نوں رلا ملا چلایا ہے اوہ ایس لہر دے انسانی تے سیاسی پکھاں دا بھنڈار۔اخیری سیشناں وچ قدیمی ہندو رسم ستی بارے گل بات ہو سی جس وچ جے این یو توں تنیکا سرکار ہی نہیں سگوں پی پی پی دی نفیسہ شاہ اتے سٹیٹس آف ویمن دی فوزیہ وقار گل بات کرن گیاں۔ جے ساڈی یونیورسٹیاں پورے ملک وچ اجہے میلے کروان تے پاکستان وچ گل بات دا کلچر مڑ ودھ سکدا ہے اتے سفورا چورنگی تے مشال خان ورگے وقوعیاں توں گل اگے ودھ سکدی ہے کہ ایہو ساڈی جوگی صوفی ریت ہے کہ گیریژن سٹیٹ توں واپسی دا سفر ہی سانوں کسے بنے لاون وچ مدد دے گا۔
پہلا دن
http://www.wichaar.com/news/117/ARTICLE/33803/2018-01-13.html
ریڈیو پروگرام، نین سکھ دی کتاب بارے جس وچ تساں ترقی پسندیاں دے وکھرے وکھرے پکھ ویکھدے ہو
http://www.wichaar.com/news/153/ARTICLE/33691/2017-11-22.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels