Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> جنرل باجوہ کیہ سوچ رہے نیں؟ وائس آف امریکہ دا ہشیار گھما

جنرل باجوہ کیہ سوچ رہے نیں؟ وائس آف امریکہ دا ہشیار گھما

وچار ڈیسک
January 11th, 2018

چور نوں آکھو چوری کر تے سعد نوں آکھو اتوں پھڑکہ امریکی لمیرے چر توں پاکستان وچ آمریتاں تے جمہوریتاں دی مدد دا ڈرامہ رچا رہے نیں۔میڈیا امریکہ، برطانیہ دا ہوئے یا ساڈا، گھمے بنانا ایس دا مرنا۔پہلاں تے خبر نما آرٹیکل بناون والے نے پاکستان وچ سول تے ملٹری نوں وکھ وکھ کر دتا۔ پر جداں امریکہ دی گل کردے نیں سب نوں اک ہی آکھدے نیں حلانکہ ٹرمپ بعدوں امریکہ وچ تے سب اڈواڈ نیں۔ فیر بڑی ہشیاریاں نال اج دی صورتحال نوں نو گیارہ نال جوڑ کے من مرضیاں والے اٹھ و اٹھ تجزیے کیتے۔ نو گیارہ ویلے تے پوری دنیا اک پاسے سی پر اج تے ٹرمپ پاروں امریکہ دے بھارت، برطانیہ تے سعودی عرب ورگے پکے اتحادی وی اقوام متحدہ وچ امریکہ دا ساتھ نہ دے سکے۔اج پاکستان بارے جو ٹرمپ آکھ رہیا ہے اوس نال بہوں امریکی وی نہیں منیندے۔ ایہہ وی شک ہے پئی امریکہ ایران تے چین خلاف پاکستان نوں لانا چاہندا ہے۔ات گردیاں مکاون دے حوالے نال پاکستان خلاف جو کجھ ٹرمپ آکھدا ہے کیہہ چین، ایران، ترکی، روس اوس نوں ٹھیک سمجھدے نیں؟ کتھے رام رام تے کتھے ٹیں ٹیں پاروں اج دی صورتحال نوں نو گیارہ نال ملانا ہشیار گھمے توں اڈ ہور کجھ نہیں۔ کیہہ پاکستان وچ سول تے ملٹری نوں وکھ وکھ کر کے امریکہ ات گرداں نوں تگڑا کر رہیا ہے؟گاجر تے ڈنڈے والے گھمے پاروں خبر وچ دوناں دا ورتارا کریندے ہوئے لکھاری محنت تے کیتی ہے پر ایس نال آپ نوں ایکسپوز وی کیتا ہے۔1950دے دہاکے توں امریکہ پاکستان وچ سول ملٹری جھیڑیاں پاروں اپنے مفاداں نوں چلا رہیا ہے ۔کدی ڈکٹیٹراں نال کھلوندا ہے تے کدی جمہوریتاں دا ماما بن دا ہے۔ایہہ سب دے سامنے ہے۔جے اوہ مشرف دی امریکہ دی حمائیتاں کرن دی مثال دیندے نیں تے مشرف دے انجام دی مثال وی دین۔سگوں ایوب تے ضیا دے جان دی مثالاں وی دین۔ہن تساں ایہہ ہشیار خبر آپ پڑھو۔
واشگٹن: خبراں پاروں پاکستانی فوجی دی پردھان قیادت امریکی صدر تے انہاں دی انتظامیہ ولوں پاکستان ، حقانی نیٹ ورک تے دوجیاں ات گرد جتھے بندیاںں نوں پکی پناہ گاواں دین دے غیر متوقع تے شدید الزاماں دے حوالے توں سوچ وچار وچ رجھے نیں۔ پکی سورس پاروں پتہ چلیا ہے پئی بند کمرے وچ جاری ایہہ سوچ وچار ایس گل بات توں وکھری ہے جو کھلے عام کیتی جاندی ہے۔ پاکستان دے ٹی وی چینلاں دے پروگراماں وچ سیاستدان تے سوجھوان امریکی امداد تے امریکی دوستی نوں اوتاولے ہو کے رگیدے نظر آندے نیں اتے اسلامی جماعتاں سڑکاں تے امریکی پرچماں نوں ساڑدے ہوئے رانجھا راضی کریندے نیں۔ پر ایہہ سارے روایتی نوعیتاں دے کم کسے متھے ٹیچے تیک اپڑان پاروں ناکام نیں۔ اصل گل تے ایہہ ہے کہ پاکستان دی فوجی قیادت ایس بارے وچ کیہ فیصلہ کردی ہے۔ ایس سلسلے وچ ہن تک فوج ولوں جو ردعمل سامنے آیا ہے اوہ وڈی حد تک درمیانہ رستہ ہے تے پاکستان دے وزیر دفاع خرم دستگیر خان نے امریکہ دے نال نرا انٹیلی جنس معلومات شیئر کرن دا سلسلہ بند کرن دا اعلان کیتا ہے، پر امریکہ نال سانگے رکھن دا آکھیا ہے۔ پاکستان نے ہلے تک افغانستان وچ امریکی فوج لئی لاجسٹک سپورٹ ڈکن ورگا اونترا قدم نہیں چکیا۔ ایدھر امریکی وزیر دفاع جیمز میٹس نے وی آکھیا ہے کہ امریکہ دی فوجی اسٹیبلشمنٹ جنرل باجوہ دے نال مستقل رابطیاں وچ ہے۔ سوال ایہہ ہے کہ امریکہ دے نال حالیہ محاذ آرائیاں دی کیفیتاں ختم کرن لئی پاکستان فوج دی حکمت عملیاں کیہ ہون گیاں۔ ہورے ویکھن وچ جنرل باجوہ لئی امریکی امدادنوں ڈکنا کوئی وڈا مسئلہ نہیں ہے سگوں اصل مسئلہ انہاں دہشت گرداں خلاف فوری ایکشن دا امریکی مطالبہ جے۔ انہاں ات گرداں بارے شک ہے پئی ایہہ افغانستان وچ کاروائیاں کردے نیں۔ امریکہ نے اشارے دتے نیں کہ جے پاکستان ایس امریکی مطالبے نوں اہمیتاں نہیں دیندا تے اوہ پاکستان تے دبا ودھاندے ہوئے ایس نوں اک نویں پدر تے لیجاون دا ارادہ رکھدے نیں۔ امریکہ دے مشہور تھنک ٹینک یونائٹیڈ انسٹی ٹیوٹ آف پیس دے ایسوسئیٹ نائب صدر معید یوسف دا کہنا ہے کہ امریکہ اگے اگے ورلڈ بینک تے آئی ایم ایف راہیں پاکستان نوں ملن والے قرضیاں نوں محدود کرسکدا ہے، تجارتی پابندیاں لاسکدا ہے، سفارتی پدر تے پاکستان نوں اکلا کرن دی کوششاں کر سکدا ہے ا تے یک طرفہ طور تے پاکستان دے اندر کوئی وڈی یک طرفہ فوجی کاروائی وی ہوسکدی جے تے ایس حوالے نال پکے فیصلے غالباً امریکہ نے پہلاں توں تیار کررکھیا ہے۔ معید یوسف کہندے نیں کہ صدر ٹرمپ ایہہ سمجھدے نیں کہ افغانستان وچ امریکی فوجیاں دی کامیابی وچ پاکستان وڈی رکاوٹ ہے۔ کجھ تجزیہ کاراں دی رائے وچ پاکستانی فوج دے سپاہ سالار جنرل باجوہ خود نوں اونج دی ہی کیفیتاں وچ محسوس کررہے نیں جس توں سابق فوجی صدر پرویز مشرف نائن الیون دے فوراً بعدوں لنگھے سن۔ ایس وقت دے امریکی نائب وزیر خارجہ رچرڈ آرمٹیج نے جنرل پرویز مشرف نوں دھمکی دتی سی کہ جے پاکستانی فوج نے افغانستان وچ القاعدہ نوں ختم کرن وچ امریکہ دا ساتھ نہ دتا تے پاکستان نوں ایسے بماں دا نشانہ بنایا جائے گا جس توں پاکستان پتھر دے زمانے ول اپڑ جائے گا۔ امریکی الٹی میٹم دے بعد پرویز مشرف نے افغانستان وچ امریکی فوج دی مدد کرن دا فیصلہ کیتا سی۔ ایس وقت پرویز مشرف نے آکھیا سی کہ امریکہ توں محاذ آرائیاں پاروں پاکستان دی سا لمیتاں خطریاں وچ پئے سکدیاں نیں۔ مشرف دا کہنا سی کہ جے سانوں دو دشواریاں چوں اک نوں چننا ہوئے تے بہتر ہے کہ اسی دوناں چوں ایسی دشواری نال نبڑن دا بندوبست کرئیے جو گھٹ اوتاولی ہوئے۔ ہن اجوکی صورت حال وچ جنرل باجوہ دو چوں کیہڑی دشواری نوں دور کرن دا فیصلہ کردے نیں؟ کیہ اوہ امریکہ دے نال لمبے عرصے دی عداوتاں جاری رکھن دا فیصلہ کردے نیں یا فیر طالبان تے حقانی نیٹ ورک خلاف ایسے کم کرن دا فیصلہ کردے نیں جیہناں دا مطالبہ امریکہ نے کیتا ہے۔ دفاعی ماہراں دا خیال ہے کہ اوہ اپنے پہلے والے پردھاناں جنرل راحیل شریف، جنرل مشرف تے جنرل کیانی وانگ امریکہ دے نال کجھ لو تے کجھ دو دی بنیاد تے سمجھوتہ کرن دا فیصلہ کرن گے تے ایسے سمجھوتے وچ اوہ افغانستان وچ موجود دہشت گرداں دی محفوظ پناہ گاواں دے خاتمے تے بھارت دے نال کشمیر دے تنازعے ورگے معاملیاں نوں وی شامل کران دی کوشش کرن گے۔ اوہ امریکہ نوں آکھن گے کہ اوہ اپنے مطالبیاں نوں نرم کرے تے ایس دے بدلے پاکستان امریکہ لئی کجھ کرن تے راضی ہوئے گا۔ ایس ویلے امریکہ ولوں ایس حوالے نال کوئی اشارے نہیں مل رہے۔ امریکہ وچ بہت سارے سیاسی مبصراں ایہہ آکھیا ہے کہ امریکہ ولوں پاکستان دے خلاف کم کرن دے رزلٹ امریکہ لئی چنگے نہیں ہون گے۔ پر امریکی صدر ٹرمپ پاکستان نوں متھے ٹیچے پورے کرن تے مجبور کروان لئی اخیری حداں تک جاندے ہوئے وکھائی دیندے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels