Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> اقوام متحدہ:پیسہ ہار گیا، فلسطین جت گیا۔ٹرپ امریکہ نوں ’’اسرائیل‘‘بنا دتا

اقوام متحدہ:پیسہ ہار گیا، فلسطین جت گیا۔ٹرپ امریکہ نوں ’’اسرائیل‘‘بنا دتا

December 22nd, 2017

جداں ٹرمپ اونترے بیاناں پاروں چوناں جتن توں پہلاں اپنا ناں بنایا سی تے اوس دے حامیاں وچ امریکہ مخالف وی رل گئے سن۔انہاں دا آکھنا سی پئی اجیہا بندہ امریکہ نوں ڈیگن وچ وڈا کردار ادا کرے گا تاں مارے اجہے بندے دی سپورٹ لوڑی دی ہے۔ہورے ہشیار روسیاں آپدے ہیکراں راہیں تاں مارے ٹرمپ دی مدد کیتی ہوئے۔پر کل انہاں دا تھیسس پورا ہو گیا جداں امریکہ نوں پوری دنیا توں نرے نو ووٹ ہی ملے۔اسرائیل تے امریکہ توں اڈ جیہڑے ست ملکاں حمائیتاں کیتیاں انہاں دے ناں وی کسے کدی نہیں سنے۔امریکہ دا ہشیار یار برطانیہ وی اج اوس دے نال نہیں،فرانس ، جرمنی تے پہلاں ہی اعلان کر چکے سن اتیجاپان تے سعودی عرب ورگے امریکی اتحادی وی امریکہ دی حمائیتاں وچ نہیں آئے۔اٹلانٹک چارٹر وانگ جیہڑا 1941دی14اگست نوں ہویا سی ہن21دسمبر نوں وی یاد رکھیا جائے گا۔ایہہ اوس بدل چکی دنیا دا بوتھاہے جس بارے لکھاری تے لکھ رہے سن پر ملکی پدر تے ایس ول اْلار کل سب ویکھ لتا۔یروشلم اتے بیت المقدس دا مسئلہ نرا اسلامی یا دھرمی مسئلہ نہیں کہ جے پاکستانی ایس نوں سمجھ لین تاں کشمیر بارے وی انہاں دے خیالاں نوں جاگ لگ سکدی ہے۔اقوام متحدہ وچ امریکی بلارن نکی ہیلی اتے ٹرمپ ہوراں ایس قراداد دی منظوریاں توں پہلاں دھمکیاں تے رقماں کٹن دے حوالیاں نال جیہڑے بیان دتے سن اوہ پٹھے پئے گئے۔جنج اوبامہ ’’ساداتی‘‘عزتاں بچا ندا بچاندا اگے ودھ رہیا سی اوس نوں یہودی انتہا پسنداں اتے ٹرمپ لانبھے کر کے کیہہ کھٹیا؟ ایس سوال دا جواب کل آ گیا جے۔ہن جے امریکہ کیہہ184ملکاں نال لڑے گا؟جنہاں ملکاں در وٹیا اتے چپ رہے انہاں وچ کنیڈا، آسڑیلیا، چیک ریپبلک،پولینڈ، ہنگری،کروٹیا، جنوبی سوڈان اتے میکسیکو ورگے رلتی سن۔نکی ہیلی ولوں انہاں65ملکاں نوں ترے جنوری دا دعوتی کارڈ گھلیا گیا ہے جنہاں امریکی فیصلے دی یا تے حمائیتاں کیتیاں نیں یا فیر مخالفتاں کرن دی تھاں چپ رہے نیں۔ایہہ ہک انکاری صورتحال ہے جس پاروں امریکہ ہور اکلا ہو سی۔ٹرمپ دے فیصلے خلاف نرے باہرلے ہی نہیں سگوں ٹرمپ دے ٹیم سنے دانشواراں ،سیاستداناں، میڈیا اتے پرانے امریکی افسراں دا اک بھنڈار ٹرمپی پالیسیاں خلاف ہے۔سابقی سی آئی اے پردھان جان برینن آپدی ٹوئیٹ وچ ایس ہار بعدوں ٹرمپ نوں آکھیا ہے پئی اوہ دنیا نوں ہور امریکہ مخالف نہ کرے تے آپدی غلطی من لے۔وینز ویلا دے بلارے آکھیا پئی اج ٹرمپ نوں پتہ چل گیا کہ دنیا بکاؤ مال نہیں ہے۔ترکی دے طیب اردگان وی آکھیا پئی امریکہ اپنے پیر تے کوہاڑا چلایا ہے۔ اج اسرائیل وانگ امریکہ وی تنہا ہو گیا۔پاکستانی بلارن ملیحہ لودھی آکھیا پئی امریکی فیصلہ نہ قنون پاروں ٹھیک ہے نہ اخلاقی اپیل رکھدا ہے۔امریکہ دی میری لینڈ یونیورسٹی پہلی دسمبر نوں اک پول کروایا سی جس وچ دسیا گیا سی پئی63%امریکی ایس فیصلے نوں غلچ سمجھدے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels