Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> اسلامی عسکری اتحاد دے ٹی او آربارے پچھن نال میں وی لاپتہ ہو سکدا ہاں: چیئرمین سینٹ

اسلامی عسکری اتحاد دے ٹی او آربارے پچھن نال میں وی لاپتہ ہو سکدا ہاں: چیئرمین سینٹ

وچار ڈیسک
December 16th, 2017

چیئرمیں سینٹ میاں رضا ربانی نے اسلامی عسکری اتحاد دے ضابطیاں توں دفتر خارجہ دی لاعلمیاں تے حیرانگیاں دا سندے ہوئے ایہہ پچھ لتا پئی ایس بارے اتھارٹی کون ہے؟ ایس طنز پاروں انہاں پاکستان دی پوری سیاستاں تے وادھو گل کر دتی۔پر انہاں نوں چنگا پتہ ہے پئی اپوزیشن والیاں پانامہ ڈرامہ وچ حاضریاں بھرن لئی کنج ایس مسلہ نوں پچھے پایا سی۔ایہہ تے سال ڈیڑھ پرانا مسلہ جے۔تحریک انصاف دی شیری مزاری اتے عمران خان نے تے بڑکاں وی وادھو ماریاں سن پرفیر کیوں انہاں ،کس حکم پاروں در وٹ لتا سی۔ایس بارے کون، کیوں چپ رہیا ایس بارے وی سب جاندے نیں۔پر سوال تے ایہہ وی ہے پئی جے خارجہ والیاں نوں نہیں پتہ تے فیر کھرا کتھے جاندا ہے؟چیف جسٹس نوں وی میاں رضا ہوراں دا ایہہ بیان پڑھنا لوڑی دا ہے۔جداں تیک اساں انکاری رواں گے کھوتا کھوہ وچ ہی رہے گا۔
میاں ربانی ہوراں آکھیا پئی اتحاد دے ٹرم آف ریفرنس دی اتھارٹی پچھ کے کیہ میں وی اپنی مدت 12 مارچ 2018 توں پہلے لاپتہ ہوجاواں۔ ایہہ آبزرویشن انہاں نے جمعہ نوں سینٹ وچ اسلامک کاؤنٹر ٹیررازم کولیشن المشہور سعودی اسلامی اتحاد بارے وچ پارلیمنٹ نوں اعتماد وچ لین پاروں وعدیاں توں متعلق تحریک تے بحث دے دوران دتی۔ فرحت اللہ بابر نے آکھیا کہ دفتر خارجہ دے رجمان ہوراں نے اسلامی عسکری اتحاد وچ پاکستان دے تعاون تے کردار دی تفصیلاں توں لاعلمیاں دسیاں نیں۔ ترجمان دفتر خارجہ نے نہیں دسیا کیہ اوہ ہورے ’’نظر نہ آون والی‘‘ اتھارٹی ہے۔ چیئرمین سینٹ ایس حوالے توں حکم جاری کرن۔ چیئرمین رضا ربانی نے آکھیا کہ کون ہے اتھارٹیْ؟ ایہہ پتہ کرکے کیہ میں وی اپنی مدت 12 مارچ 2018 توں پہلے لاپتہ کردتا جاواں۔ این این آئی دے مطابق اراکین سینٹ نے اک وار فیر مطالبہ کیتا ہے کہ اسلامی ملکاں دے فوجی اتحاد دے حوالے توں ایوان نوں اعتماد وچ لتا جائے۔ اسلامی دنیا دے مسائل حل کرن وچ او آئی سی دا کوئی کردار نہیں۔ سنیٹیر شیری رحمن دی تحریک تے بحث وچ حصہ لیندے ہوئے سینیٹر فرحت اللہ بابر نے آکھیا کہ اسلامی فوجی انسداد دہشت گردی اتحاد نال کیتے گئے وعدیاں دے حوالے توں پارلیمان وچ نوں کجھ نہیں پتہ۔ اسی مشرقی وسطی دے گرداب وچ پھس رہے ہا ں۔جداں صورت حال خراب ہوندی ایس ہاؤس نوں آکھیا جاندا ہے بہتری لئی اقدامات کیتے جان۔ انہاں نے چیئرمین توں ایس ضمن وچ رولنگ جاری کرن دا مطالبہ کیتا۔ سینیٹر شبلی فراز نے آکھیا کہ پارلیمان دی بالادستی دیاں محض گلاں کیتیاں جاندیاں نیں۔ میں اک بل لایا سی پر پیپلز پارٹی نے وی ایس نوں بلڈوز کیتا سی۔ سینیٹر سحر کامران نے آکھیا سانوں پتہ ہی نہیں کہ اسی کس دے مفاد وچ فیصلے کررہے ہاں۔ فوجی اتحاد دے ٹی او آرز دے بارے وچ کیوں نہیں دسیا جاندا۔ سارے فیصلیاں وچ پارلیمنٹ نوں اعتماد وچ لتا جائے۔ سینیٹر نسرین جلیل نے آکھیا کہ پاک فوج نے بہت قربانیاں دتیاں نیں۔ جیہناں دی بدولت دہشت گردی دا خاتمہ ہویا۔ فیصلے پارلیمنٹ دے ذریعے ہونے چاہیدے نیں۔ سینیٹر رحمن ملک نے آکھیا کہ مشرق وسطی دی صورتحال مزید خراب ہوندی نظر آرہی ہے۔ اسلامی فوجی اتحاد دے حوالے توں سوال وادھو نیں۔ ایس دی فنڈنگ کون کرے گا؟۔ ایہہ کس کنج، کس قنون پاروں، کتھے جاکے کاروائی کرے گا؟ ایہہ سب چیزاں سامنے آنیاں چاہیدیاں نیں۔ ٹی او آر جے ہن تک نہیں بنے تے انہاں نوں بناون لئی مشاورتاں کرلتی جاون۔ سینیٹر جاوید عباسی نے آکھیا کہ نیٹو کاروائی کرے تے اسی سب حمایت کردے ہاں۔ مسلمان ملک رل کے کوئی کم کرن تے سانوں ایس نوں چنگی نظر نال ویکھنا چاہیدا ہے۔ سینیٹر جہانزیب جمالدینی نے آکھیا کہ سانوں مفروضیاں توں باہر نکلنا چاہیدا ہے۔ بیت المقدس اسرائیل دا دارالحکومت بن گیا۔ او آئی سی نے محض بددعاواں دتیاں۔ سینیٹر عثمان کاکڑ نے آکھیا کہ اسلامی دنیا دے مسائل حل کرن وچ او آئی سی دا کوئی کردار نہیں۔ سینیٹر میر کبیر شاہی نے آکھیا کہ ڈونلڈ ٹرمپ نے واضح طور تے آکھیا کہ اسلامی فوجی اتحاد ایران دے خلاف بنایا گیا ہے۔فیر وی اسی اکھاں بند کیتیاں ہویاں نیں۔ نزہت صادق نے آکھیا کہ حکومت نے ایس حوالے توں اپنی حکمت عملی تے پالیسی بنائی ہوئی ہے کہ اسی کسی مسلم ملک خلاف اتحاد وچ شامل نہیں ہواں گے۔ ایہہ معاملہ پارلیمنٹ وچ لیایا جائے گا۔ سینیٹر ایم حمزہ نے وی پارلیمنٹ نوں مضبوط بنان تے زور دتا۔ سینیٹر شاہی سید نے آکھیا کہ حکومت ایس معاملے تے توجہ دے۔ سینیٹر طلحہ محمود نے آکھیا اسلامی فوج کتھے نظر نہیں آرہی۔ چیئرمین سینیٹ نے آکھیا کہ متعلقہ وزیر منگل نوں ایس معاملے تے بحث پوری کرن گے۔ سینیٹ دا اجلاس پیر دی شام تِن وجے تک ملتوی کردتا گیا۔ ایوان بالا نے جادوگری دی ممانعت بل 2017 نوں زیر بحث لیان لئی سینیٹ دی منتخب کمیٹی اسارن دی منظوریاں دتیاں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels