Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> بیت المقدس: امریکہ اقوام متحدہ وچ اکلا رہ گیا۔وائس آف امریکہ

بیت المقدس: امریکہ اقوام متحدہ وچ اکلا رہ گیا۔وائس آف امریکہ

وچار ڈیسک
December 9th, 2017

ٹرمپ تے بریگزٹ پرانی دنیا دے ٹٹن اتے نویں دنیا دے پنگرن دی امیداں ودھا دتیاں نیں۔روس تے چین دوجے پاسے ایہہ اعلان کرن نون اتاولے ہو رہے نیں پئی بریکس والے سونے نوں وچلی کرنسی بنا رہے نیں اتے اج آرٹی ڈاٹ کام تے اک روسی ماہر ایس پاروں امریکی ڈالر دی حاکمیتاں مکن بارے گل کر چھڈی ہے۔امریکہ دے اکلے رہ جان دی گل اج امریکی میڈیا وی کر رہیا ہے پر ہورے پاکستانی سٹیبلشمنٹ اج وی امریکہ،سعودی عرب تے برطانیہ توں اگے سوچن لئی تیار نہیں۔

واشگٹن: اقوام متحدہ دی سلامتی کونسل دا جمعے دے دن ہنگامی اجلاس ہویا، جس وچ امریکہ دے لمے چر توں اتحادیاں نے امریکہ ولوں یروشلم(بیت المقدس) نوں اسرائیل دا دارالحکومت تسلیم کرن تے اپنا سفارت خانہ منتقل کرن دے فیصلے دی حمایت توں منہ موڑلتا۔ سویڈن دے سفیر، الوف سکوگ ہوراں نے سلامتی کونسل نوں دسیا کہ ایہہ عالمی قنون متحدہ دی سلامتی کونسل دی قرار داداں توں سدھا سدھا انکار ہے۔ انہاں نے آکھیا کہ یروشلم دا حتمی حل تلاش کیتا جانا تے ہلے باقی ہے۔ اسی لئی ایس نوں دونوں دھڑیان دی گل بات راہیں ہی حل کیتا جاسکدا ہے۔ سکوگ ہوراں آکھیا پئی 1947 وچ ،جداں اک سال بعدوں اسرائیلی ریاست وجود وچ آئی، اقوام متحدہ نے یروشلم نوں اک الگ اکائی دا خصوصی درجہ دتا سی جو یہودیاں، مسلماناں تے مسیحیاں دا مقدس شہر ہے۔
1980 والا فیصلہ
ہن تک سارے ملک 1980 دے سلامتی کونسل دے فیصلے نوں من دے آئے نیں، جس وچ بیت المقدس(یروشلم) دی حیثیتاں نوں بدلن دی کسی کوشش نوں کوڑ آکھیا گیا سی۔ سگوں سارے ملکاں نوں آکھیا گیا سی پئی اوہ ایس شہر توں اپنے سفارتی مشن واپس بلان۔ برطانیہ دے سفیرمیتھیور کرافٹ نے آکھیا ہے کہ سانجھی گل بات راہیں یروشلم(بیت المقدس) اسرائیل تے فلسطینی ریاست دا سانجھادارالحکومت ہو سی۔ میتھیو کرافٹ نے آکھیا کہ ایس لئی معاملے دی حیثیت دے حتمی سمجھوتے توں پہلے اسی یروشلم ول سفارت خانے دی منتقلی تے یروشلم نوں اسرائیل دا دارالحکومت تسلیم کرن دے امریکی فیصلے توں متفق نہیں جے۔ ایسے فیصلے خطے وچ امن دے مستقبل لئی چنگے نہیں اتے امن دے ٹیچے پاروں اساں سب، سلامتی کونسل دے سارے ممبر ایتھے بیٹھے ہاں۔ سلامتی کونسل دے 15 ممبراں و چوں ادھ توں ودھ ملکاں کھلے اجلاس دی درخاست دے رکھی سی، جداں کہ دوجی ریاستاں دے وفود نے اپنے چیمبر بند کرلتے، جس توں ایہہ عندیہ ملدا ہے کہ عالمی پدر تے یروشلم دی حیثیت کیہ اہمیت رکھدی ہے۔ سلامتی کونسل دے ممبراں ٹرمپ انتظامیہ دے فیصلے تے تنقید اں کردے ہوئے آکھیا کہ ایسے فیصلے مددنہیں دیندے جس توں سارے امن عمل نوں لپیٹن دا چانس ودھ جاندا ہے۔ انہاں نے اپنی تشویشاں دا وی اظہار کیتا کہ انتہا پسند تے قدات پسند ایس توں فیدہ چک سکدے نیں جس پاروں پہلے ہی توں کشیدگیاں دے شکار خطے وچ جھیڑے ودھن گے۔ فرانس دے ایلچی فرانسواں دیترے نے آکھیا کہ ایس توں سیاسی جھیڑے ودھن گیاتے حالات بہوں خراب ہو سکدے نیں۔ عبدالفتح السیسی دی قیادت وچ مصر دے ٹرمپ انتظامیہ دے نال قریبی تعلقات نیں۔ پر ایس معاملے تے دونوں دا موقف رلدا نہیں جے۔ مصر دے ایلچی، امرابولعطا نے آکھیا کہ ایہہ اک خطرناک مثال ہے جس دی وضاحتاں لوڑی دیاں نیں۔ ایس قسم دا یک پکھی فیصلہ عالمی قنونی حیثیتاں دا انکار ہے۔ ایس لئی یروشلم دے شہر تے ایسی کوئی قنونی حیثیت لاگو نہیں ہوندی کیونجے ایہہ اک جھیڑے والی تھاں والا شہر ہے۔ اسرائیل نے 1967 دی لڑائی وچ مشرقی یروشلم نوں قابو کیتا سی۔ اجلاس دے بعد یورپی کونسل دے چار ملک، برطانیہ، فرانس، اٹلی، تے سویڈن نے جرمنی دے نال رل کے اخباری بلاریاں نوں اک سانجھا بیان دتا جس وچ امریکہ دی سدھی سدھی مخالفتاں دی تھاں ایہہ لکھیا گیا سی پئی ٹرمپ انتظامیہ دے فیصلے توں سانوں اتفاق نہیں اتے ایہہ فیصلہ سلامتی کونسل دی قرار داداں دے خلاف ہے تے امن نوں رگیدے گا۔ جمعے دے دن سلامتی کونسل دے اجلاس دے دوران امریکی سفیر نکی ہیلی موقف تے پک نال ڈٹی رہی۔ اسرائیل دے اک پکے اتحادی دے طور تے انہاں نے سب توں پہلے اقوام متحدہ نوں ہی رگیدیا۔ ہیلی نے آکھیا کہ کئی سالاں توں اقوام متحدہ شرمناک طور تے اسرائیل دے ویریاں دا وڈا ٹھکانہ ہے۔ اقوام متحدہ نے مڈل ایسٹ وچ امن دے امکاناں نوں نقصان پہنچان وچ سب توں زیادہ کردار ادا کیتا ہے بجائے ایس دے کہ ایس وچ کوئی پیش رفتاں کردا۔ ایس کم وچ اسی ایس دے ساتھ نہیں دواں گے۔ یروشلم نوں اسرائیل دا درالحکومت تسلیم کرن دے صدردے فیصلے دا دفاع کردے ہوئے نکی ہوراں آکھیا کہ ایہہ امریکی عوام دی خاہش ہے تے محض زمینی حقیقتاں نوں منن نال مسئلہ حل ہو سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels