Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> غزہ تے اسرائیلی حملے، پاکستانی سیاسی کھڈاری آپسی جھیڑیاں وچ مست

غزہ تے اسرائیلی حملے، پاکستانی سیاسی کھڈاری آپسی جھیڑیاں وچ مست

December 9th, 2017

ٹرمپ دے اعلان بعدوں مڈل ایسٹ دی ہی نہیں سگوں دنیا دی سیاستاں وچ اتھل پتھل پر سانوں کیہہ؟ اساں ہن امریکہ بہادر نوں وی کجھ نہیں آکھنا اتے نہ ہی سعودی عرب نوں کہ اوہ گھٹ وگھٹ مسلمان ملکاں نال لڑائیاں ڈک کے ٹرمپ خلاف وڈا مورچہ لاون دا بندوبست کھڑا ہون دے۔ ساڈے کولوں وڈا تے کھلا سٹینڈ تے ترکی لتا ہے اتے اج ترکی ول ہی سب تک رہے نیں۔روس، چین، جرمنی، فرانس وی کھل کے ٹرمپ دی مخالفتاں کیتیاں نیں۔ بھارت تے برطانیہ ذرا ڈردے ڈردے گل کرن تے مجبور۔امریکہ نوں آکھنا پیا پئی اقوام متحدہ تے اسرائیل دے مڈھ توں خلاف ہے۔امریکہ فلسطینی لیڈر عباس ہوراں نوں آکھیا پئی اوی امریکی نائب صدر دا فلسطین دا دورہ نہ ڈکے، پر کل ایہہ اعلان وی ہو گیا کہ مائیک پنس ہوراں نوں فلسطین وچ جی آیا نوں نہیں آکھیا جائے گا۔اکلے ہوندے امریکہ اپنے اتحادی سعودی عرب تے یمن وچ مداخلتاں دا الزام وی اخیر لا ہی دتا۔ ایس اعلان دا مطلب سعودیاں تے دبا پاندے ہوئے ٹرمپی فیصلیاں دی حمائیتاں کروانا ہی ہے۔ایہہ اینج ہی ہے کہ امریکہ پاکستانی جہادی گروپاں نوں افغانستان دا کھیڑا چھڈ کے پاک ایرانی باڈراں ول گھلن دی ہشیار پالیسی چلائے۔دبا کجھ ہوندا جے اتے کم کجھ لینا ہوندا ہے۔ سوال تے ایہہ ہے اک ایسے نازک تے خطرناک ویلے سٹیبلشمنٹ نوں سوٹ کردا ہے پئی پاکستانی سیاستدان ایس جھیڑے توں پراں ہی رہن۔تاں مارے پاکستان وچ اپوزیشن اتے میڈیائی ہرکارے سارا زور آپسی جھیڑیاں تے لا رہے نیں۔جڈا زور اندرونی لڑائیاں تے رہے گا اوس نال باہرلی لڑائیاں بارے کجھ گل نہیں ہوئے گی۔بیت المقدس جے نرا اسلامی مسئلہ ہوندا تاں فیر روس، چین، جرمنی تے فرانس کیوں ایڈی مخالفتاں کردے؟سب جاندے نیں پئی امریکہ دنیا نوں ایہہ دسنا چاہندا ہے پئی اوہ کسے وی مسئلہ نوں اکلا ،بغیر سٹیک ہولڈراں نوں پچھے، حل کرسکدا ہے۔دوجا وڈا مسئلہ رتے سمندراں(بحر احمر) دے تجارتی رستے نوں قابو وچ رکھن دا ہے جس نوں جبوتی وچ پہلے بدیسی چینی اڈے بعدوں خطرہ ہے۔چیتے رہے پئی نہر سویز نال جڑے ایس پردھان تجارتی رستے تے برطانیہ تے فرانس رل کے قبضے کرن لئی1950 دے دہاکے وچ اسرائیل نوں اگے کیتا سی ۔پر امریکہ نے پہلی وار اسرائیل نوں شٹ اپ کال دتی سی۔ اوس دیہاڑ توں امریکہ سویز تے رتے سمندراں تے کنٹرول رکھدا ہے اتے1970دے دہاکے توں سعودی عرب اوس دا چوکیدار جے۔ہن فرانسیسیاں دے نال نال عدن دے سامنے جزیرے جبوتی وچ چینیاں وی پہلا فوجی اڈا بنا لتا ہے۔ شام دی جنگ وی روسیاں دی مدد نال لانبھے لگ رہی ہے۔رتے سمندراں دی دونویں نکراں تے امریکی کنٹرول نوں ڈر پیدا ہو گیا جے۔  امریکہ نوں لگدا ہے پئی اوہ ہن اکلا حصہ دار نہیں رہے گا تاں مارے اوہ سعودی عرب تے اسرائیل دا گھما بنا رہیا ہے اتے سورت تے بنگالی گھاٹ(خلیج) پاروں بھارت ایس وچ حصہ دار ہے۔جیھڑے سعودی دھڑے اسرائیل نال سانگیاں دی مخالف سن انہان نوں کرپشن دا گھما بنا کے لانبھے لاون دی خبراں میڈیا تے نیں۔دوجے پاسے سعودی عرب نے ایران، قطر ، شام تے یمن نال جھیڑے ودھائے ہوئے نیں۔اوہ پاکستان نوں وی سعودیاں نال کھلون دا آکھدے پئے نیں پر پاکستانی پارلیمنٹ یمنی قراداد تے کھلوتی ہے۔ پر ایس ٹرمپی فیصلے بعدوں تے گل یمنی قراداد توں اگے ٹر چکی ہے۔پاکستانی سٹیبلشمنٹ سعودی عرب تے امریکہ دی مخالفتاں توں پراں رہنا چاہندی ہے۔ایس پاروں لوڑی دا ہے پئی یمنی قراداد دی حمائیتی اپوزیشن ہن آپسی جھیڑیاں نوں ودھائے تاں جے بیت المقدس دے مسئلہ بارے سٹینڈ لین ول کسے دا دھیان نہ جائے۔انہاں نوں پران رکھن لئی ہی ہورے فیض آباد دھرنے توں ڈرایا وی جا چکیا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels