Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> ٹرمپ ایجنڈا شروع:بیت المقدس قابو۔مڈل ایسٹ جنگ تیز؟کاغذی مخالفتاں

ٹرمپ ایجنڈا شروع:بیت المقدس قابو۔مڈل ایسٹ جنگ تیز؟کاغذی مخالفتاں

وچار ڈیسک
December 7th, 2017

جداں لڑائی ودھے گی تاں سعودی اتحاد کیہہ کرے گا؟ عالمی میڈیا تے فلسطینی صدر آکھ رہے نیں پئی ات گردیاں وچ ہن اصافہ ہوئے گا۔ فیر ات گردیاں مکاون لئی بنائے سعودی اتحاد دا کیہہ سٹینڈ ہوئے گا؟ کیہہ اوہ ایران خلاف کم کرے گا؟ گھٹ و گھٹ سعودی عرب تے ایہو چاہندا ہے۔ٹرمپ اینج دا ہی فیصلہ کیتا ہے پئی جنج کل نوں بھارتی نیتن یاہو انڈیا دا دارلحکومت سر نگر لے جائے ۔سعودی عرب گونگلواں توں مٹی لاون لئی اک نرم بیان دتا ہے پر اوہ تے ٹرمپ دی یاری نوں توڑنا نہیں چاہندے۔پاکستان وچ وی ایس مسلہ تے پارلیمنٹ دا سانجھا اکٹھ کرن دی تھاں اپوزیشن والے اتے ریاست سب اٹھ و اٹھ مار رہے نیں۔ایجنڈا تے کہانی ہن کھل چکی ہے جس دے تانے بانے ہک سال توں بنے جا رہے سن۔یمنی قرارداد پاس کرن والی سرکار تے اپوزیشن کد تیک در وٹے رکھن گے؟
جیہڑے ایس گل تے حیران سن پئی وزیراعظم نواز شریف نوں سعودی عرب دے دورے تے تقریر کیوں نہیں کرن دتی سی اتے اک میز تے جنرل(ر) راحیل شریف، ٹرمپ دا یہودی جوائی جیرالڈ تے سلمان ہوری کیہہ گپاں ماردے رہے انہاں نوں اج جواب مل گیا ہے۔ٹرمپ ایجنڈا نرا مڈل ایسٹ تیک نہیں سگوں ایس نوں ایران، شام تے یمن دے ہمسائیاں وچ چلانا وی لوڑی دا ہے۔ہن لڑائی کھل چکی ہے پر اساں پاکستان وچ بڑی ہشیاریاں نال دوجی لڑائیاں پاروں ٹرمپ ایجنڈے نوں اگے ودھا رہے ہاں۔
ایہہ اسرائیل نوں فلسطین منن لئی ہشیار چکر ہے یا نویں مڈل ایسٹ پالیسی داسرناواں کہ اگلے قدم تے سعودی عرب وی اسرائیل نوں من لے گا اتے فیر ایران نال لڑن لئی سب تیاریاں پوریاں ہو جان گیاں۔ٹرمپ نوں باز رکھن وچ فرانس سنے پورپی ملکاں وی حصہ پایا پر ہورے ٹرمپ دی نظر کتھے ہور ہے۔مڈل ایسٹ وچ نواں طوفان اوس نوں وارا کھاندا ہے۔ٹرمپ اوہ کم کیتاہے جس نوں پچھلے20ورہیاں توں امریکی صدر ٹال رہے سن۔فرانسیسی میڈیا لکھیا ہے پئی جے ٹرمپ سٹیٹ ڈیپارٹمنٹ نوں امریکی سفارتخانہ تل ایب توں جھیڑے والے تھاں یعنی بیت المقدس لیجاون دا حکم دے گا تے ایس کم وچ گھٹ و گھٹ ترے چار سال لگن گے پرانہاں ایہہ نہیں دسیا پئی اسرائیل دی تیاریاں پوریاں نیں۔ سفارتخانہ جان توں پہلاں ہی اسرائیل جو کرے گا اوس پاروں بیت المقدس وچ رہن والے فلسطینیاں دی اوکڑاں ودھن گیاں۔حماس خطرے دی گھنٹی وجا دتی ہے اتے غزہ تے ویسٹ بینک وچ فساداں دے خدشے۔سعودی اتحاد کیہہ کرے گا؟ کیہہ ایہہ ٹرمپ ایجنڈے تے عمل کرائے گا؟ نویں جنگاں دا کم شروع کہ ایہہ پہلا قدم ہے۔پر ساڈا میڈیا وی اپوزیشن وانگ گاندھی پالیسیاں تے چلے گا۔
پہلی وڈی لام وچ برطانیہ نے نیوزی لینڈ، آسڑیلیا، کنیڈا تے جنوبی افریقہ نوں ڈومینین سٹیٹس دتا سی پر انڈیا نوں نہیں۔ ہوم رول لیگ ایس بارے گھپ پائی سی۔برطانیہ پھسیا ہویا سی۔ امریکی صدر ولسن ہوراں وی اپنے چودہ نکات جاری کیتے اتے برطانیہ نوں نوآبادیاں مکاون دا آکھیا سی۔ لہور دے موچی دروجے وچ اک جلسہ جلیانوالہ قتلام خلاف ہویا جس وچ میاں فضل حسین اتے علامہ اقبال بہوں لیڈراں سنےرلت کیتی۔ ایس ویلے گل کردے ہوئے اقبال ہوراں ولسن دے چودہ نکات تے گل یاد کراندے برطانیہ نوں آکھیا پئی اوہ قوماں نوں ہن زیادہ قید (نوآبادیات وچ) نہیں رکھ سکدا۔ پر ایس موقع تے مہاتما گاندھی ہوراں قوم نوں دوجے پاسے لاون لئی تحریک خلافت اتے عدم تعاون چلائی۔ اقبال تے جناح ہی نہیں سگوں اینی بیسنٹ، کے ایم منشی سنے بہوں لیڈر جاندے سن گاندھی ہوری سلطنت دی کنج سیوا کر رہے نیں۔ اج وی امریکہ جاندا ہے پئی مڈل ایسٹ تے افریقہ وچ چین دا اثرودھ رہیا ہے۔ چین جبوتی وچ اڈا وی بنا چکیا ہے۔ٹرمپ ایس توں پہلاں ہی خطہ وچ اگ لاون دے ایجنڈے نوں اگے ودھا رہیا ہے۔لڑائیاں نہ تے دھرمی ہوندیاں نیں اتے نہ ہی فرقہ وارانہ یا نظریاتی سگوں پکے معاشی فیدیاں لئی دوجیاں نوں برباد کیتا جاندا ہے۔البتہ جنگاں تے ہشیاریاں نال دھرم چڑھایا جاندا ہے۔بیت المقدس تے قبضہ پہلا قدم ہے تانجے لڑائی تیز ہوئے۔پاکستانی سٹیبلشمنٹ ایس موقع تے اپنا الو سدھا کردے ہوئے عالمی ایجنڈے نوں ہشیاریاں نال نبھاون وچ لگی ہے۔پریشر ایہو ہے پئی ن۔لیگ آپ ہی سرکار چھڈ دے تانجے سینیٹ وی تگڑا نہ بن سکے۔ آون والے ویلے وچ اک تگڑا سینیٹ کسے ہور ایجنڈے وچ رکاوٹ بن سکدا ہے۔اجیہا ایجنڈا کیہڑا ہے؟ عالمی پدر تے امریکہ ایران خلاف جنگ دی تیاریاں کر رہیا ہے اتے لکویں ایجنڈے بارے سوچنا اوکھا نہیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels