Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> امریکہ پاکستان نوں برطانیہ دی عینک نال کیوں ویکھدا ہے؟

امریکہ پاکستان نوں برطانیہ دی عینک نال کیوں ویکھدا ہے؟

وچار ڈیسک
December 4th, 2017

بیت المقدس نوں اسرائیلی تھاں منن والی کوڑ پالیسی بناون والی ٹرمپ سرکار دے دفاعی وزیر جم میٹس ہوری پاکستان آ رہے نیں۔انہاں دے دورے توں پہلاں اک برٹش تھنک ٹینک ولوں ایہہ خبر آئی ہے پئی امریکہ تے پاکستان نوں برطانیہ دی عینک نال ویکھدا ہے اتے پاک فوج نال چنگے سانگیاں لئی امریکہ نے برطانیہ نوں اگے کیتا ہے۔کتھے ایہو تے پاکستان تے امریکہ وچ وڈا مسئلہ نہیں؟ خبر تھلے دے رہے ہاں جیہڑی دسمبر دی پہلی تریخ نوں جنگ وچ چھپی سی۔خبر وچ ایہہ گل لکھی ہے پئی 2011دے امریکی پہلی کاپٹر حملے بعدوں جداں24 پاکستانی فوجی مرے سن اوس بعدوں سانگے چنگے نہیں رہے۔ہشیار رپورٹ وچ پاکستانی فوج دے برطانوی فوج توں زیادہ برطانوی نظر آون دی گل کر کے ہورے نوآبادیاتی دور دی ہی یاد آندی ہے۔ایہو نہیں سگوں رپورٹ وچ دسیا گیا ہے پئی برطانیہ وچ تربیت لیندے پاکستانی فوجی نوآبادیاتی دور دے بدنام افسر ہربرٹ کچنر وانگ موچھاں بنادے نیں۔ ایہہ اوہی افسر جس نوں خرطوم(سوڈان) دا قصائی آکھنا غلط نہیں۔ایہہ1902توں1909 تیک برٹش انڈیا وچ گوج دا پردھان سی اتے ایہہ اوہی دور ہے جداں آزادی لئی کم کرن والے سیاسی کارکناں نوں جعلی ات گردی دے کیساں وچ پھسان دی مہماں اساریاں گیاں۔کیونجے1905وچ انہاں وڈیاں موچھاں والے لندنی سٹالن فرنٹئیر فارورڈ پالیسی پاروں پنڈی پریڈ کروائی سی اتے کوئٹہ وچ انڈین سٹاف کالج (اج کمانڈ اینڈ سٹاف کالج پاکستان) دا نیہہ پتھر رکھیا سی تاں مارے انہاں دی فوٹو اج وی کوئٹہ وچ ایسے ادارے وچ لگی ہوئی ہے۔ پاکستان نوں جداں تیک برطانیہ یا سعودی عرب دی عینکاں پاروں ویکھیا جاندا رہے گا ایتھے کم توڑ نہیں چڑھے گا۔ ہن تساں خبر پڑھو۔

لندن (مرتضیٰ علی شاہ) برطانوی تھنک ٹینک دے مطابق پاک فوج نال چنگے سانگیاں لئی امریکہ نے برطانیہ نوں اگے کیتا۔ برطانوی آرمی چیف پاکستانی پریڈ وچ اْچیچے پروہنے ہون گے، رواج پاروں تے اکثر سعودی اتے عرب دے خانداناں والے ایہہ پردھانی کریندے سن۔ برطانوی سکیورٹی ماہرین رائل یونائیٹڈ سروسز انسٹی ٹیوٹ دا کہنا ہے کہ پاکستانی تے برطانوی فوج دے درمیان سانگے بدل رہے نیں جیہڑے سانجھے سٹریٹیجک مفاداں نال جڑے نیں۔ اک تجزیے وچ تھنک ٹینک نے دونوں فوجاں دے درمیان اشتراکاں تے قربتاں بارے آکھیا ہے کہ دونوں ملکاں دی فوجاں کجھ سالاں وچ اک دوجے دے نیڑے آئیاں نیں۔ تجزیہ وچ آکھیا گیا ہے کہ بعضے ویلے تے پاک فوج، برطانوی فوج توں وی زیادہ برطانوی نظر آندی ہے ، گھٹ و گھٹ شان و شوکت یا تقریباں دے حوالے توں اینج ہی ہے کیونجے ایس دے گھڑ سوار فوج دے کول بہترین گھوڑے ہوندے نیں تے اوہ ارجینٹینا تے برطانیہ وچ پولو دے مقابلیاں وچ حصہ لیندے نیں۔ ایس وچ مزید آکھیا گیا ہے کہ انہاں دے بچے برطانیہ دے اعلیٰ بورڈنگ سکولاں وچ تعلیم حاصل کردے نیں تے اوہ فیشن وچ اپنی موچھاں فیلڈ مارشل ہربرٹ کچنر دی طراں بناندے نیں۔ تجزیے دے مطابق پاک فوج دے میجر عقبہ نے حال ہی وچ رائل ملٹری اکیڈمی سینڈ ہرسٹ وچ بطور ٹرینر ذمہ واری ادا کیتی ہے تے ہن برطانوی این سی اوز پاکستان ملٹری اکیڈمی کاکول دا حصہ بن رہی ہے۔ ایہہ وی آکھیا جارہیا ہے کہ برطانوی میجر پاکستان وچ انسٹرکٹر بنن جارہے نیں۔ ایس ویلے اک پاکستانی کرنل ڈیفنس اکیڈمی شری وینھم وچ لگے نیں جتھے اوہ ڈائریکٹنگ سٹاف دے رکن نیں تے انہاں دا آپدا سینڈیکیٹ گروپ ہے۔ تھنک ٹینک دے کمال عالم لکھیا ہے کہ جداں توں امریکی قیادت وچ نیٹو دی فوجاں افغانستان آئیاں نیں اودھوں توں ایہہ کوئی لکویں گل نہیں ہے کہ مغرب ا تے امریکی، پاک فوج ول ویکھ رہے نیں۔ جداں کہ امریکہ دے نال سانگے بھیڑے نیں خاص طور تے امریکی ملٹری ہیلی کاپٹر دے 2011 وچ کیتے گئے حملے دے نتیجے وچ گھٹ و گھٹ 24 پاکستانی فوجیاں دی شہادتاں بعدوں برطانوی سینئر افسراں نے پاکستانی فوج نوں اک پاسے کردتا ہے۔ امریکہ تے افغانستان ولوں آکھیا جارہیا ہے کہ برطانوی فوج دا پاکستانیاں ول رویہ خاصہ نرم ہے تے اوہ افغانستان توں زیادہ پاکستان دے تحفظاں نوں سامنے رکھدے نیں۔ افغانستان وچ برطانیہ دے سابق سفیر سرشیرارڈ کوئپر کولز دی مثال دیندے ہوئے آکھیا کہ انہاں نے اپنی کتاب کیبلز فرام کابل وچ لکھیا ہے کہ دو برطانوی چیف فیلڈ مارشل چارلس گوتھری تے جنرل لارڈ چرڈ نے پاکستان دے وڈے افسراں نال نیڑے دے سانگے بنائے۔ رپورٹ دے مطابق جنرل کارٹر پہلے برطانوی آرمی چیف ہون گے جیہڑے جاری مہینے پاکستان آرمی کیڈٹس دی پاسنگ آؤٹ پریڈ وچ اْچیچے پروہنے بنن گے ۔ پچھلے سال جنرل کارٹر نے پاکستان دے 3 دورے کیتے سن جو کسی وی نان نیٹو رکن ملک دے دوریاں وچ سب توں زیادہ نیں۔ رپورٹ دے مطابق برطانیہ تے پاکستان دے تعلقات ایس حد تک مزید سٹریٹجک ہورہے نیں کہ دونوں ملکاں دی فوج رل کے سانجھے دشمن دے خلاف لڑسکن ۔ایہو نہیں سگوں برطانوی فوج پاکستانی فوج دے آپریشن ضرب عضب دی کامیابیاں توں سکیھن دی خاہشمند ہے۔ رپورٹ دے مطابق پاکستان تے برطانیہ اک دوجے دے نال ریگولر سیکورٹی کانفرنس دا وی اہتمام کردے نیں جس وچ بہوں سارے مسلیاں دے نال نال انٹیلی جنس بارے وی گل بات کیتی جاندی ہے۔ رپورٹ دے مطابق برطانوی فوج برطانیہ دی مسلح فوجاں وچ ہور برطانوی مسلماناں نوں رلتی کرے گی۔ برطانوی مسلمان ہورے برطانیہ دی فوج وچ رلت دے خاہشمند نہیں کیونجے اوہ سمجھدے نیں کہ برطانیہ نے اسلام دے خلاف جنگ شروع کررکھی ہے۔ رپورٹ دے مطابق ہن ایہہ دسیا جاندا ہے پئی برطانوی تے پاکستانی فوجاں اسلام نہیں سگوں دہشتگردی خلاف جنگ لڑرہے نیں۔چیتے رہے پئی برطانوی فوج مانچسٹر تے برمہنگھم ورگے شہراں وچ خطاب لئی پاکستانی فوجیاں نوں بلا وی چکی ہے۔
https://jang.com.pk/print/412296-todays-print


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels