Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> مشرف دا ٹانگہ اتحاد:میڈیائی تشہیراں۔کون،کیوں چھیتی وچ؟کھڑچ کنڈل

مشرف دا ٹانگہ اتحاد:میڈیائی تشہیراں۔کون،کیوں چھیتی وچ؟کھڑچ کنڈل

وچار ڈیسک
November 12th, 2017

پاکستانی سٹیبلشمنٹ جنج کمال ستار کھڑچ کنڈل وچ سرعام پھڑیچی گئی اوس ایہہ گل کھول دتی پئی اندروں اندر کیہڑے کھیڈ رچائے جا رہے نیں۔ایہہ کوئی نویں گل نہیں اتے کمال ستار کھڑچ کنڈل دی دوجی قسط شرفو دا ٹانگہ اتحاد سی کہ ایس دی خبر جنگ اخبار تے بی بی سی اْردو وچ وڈی سرخیاں نال کس چھپوائی ایس بارے میڈیا نوں سچ بولنا چاہیدا ہے۔23پارٹیاں وچ اک پارٹی وی کونسلر جتن دی پوزیشن وچ نہیں پر خبر اینج بنائی گئی کہ سونامی جاپدا سی۔بنگلہ دیش وچ عدلیہ تے فوجی مداخلتاں  بعدوں2008توں جیہڑا جمہوری بندوبست ایمرجنسی مکاون توں جاری ہے اوس وچ فوج تے عدالتاں پنگے لینے بند نہیں کیتے اتے بڑی ہشیاری نال فوج نے عدلیہ تے سیاستداناں نوں لڑوایا اتے اج بنگلہ دیشی چیف جسٹس نوں ملک چھڈنا پئے گیا۔ ایس دا سب توں زیادہ فیدہ بنگلہ دیشی فوج نوں ہو رہیا ہے۔کیہہ ایہو اوہ نواں بنگلہ دیشی فارمولا ہے جیہڑا پاکستانی سٹیبلشمنٹ دے اک دھڑے نوں پاکستان وچ دھرانا ہے؟ ایس کھیڈ وچ وڈا گندا کردار میڈیا دا ہے۔ہن تساں بی بی سی دی ہشیار خبر پڑھو

پاکستان دے سابق صدر جنرل ریٹائرڈ پرویز مشرف دی جماعت آل پاکستان مسلم لیگ نے جمعہ نوں پاکستان عوامی اتحاد دے ناں توں 23 جماعتاں دا گرینڈ الائنس قائم کرن دا اعلان کیتا ہے۔ آل پاکستان مسلم لیگ دے مرکزی دفتر وچ پرویز مشرف نے ایس الائنس دے حوالے توں آکھیا کہ اک وڈا فیصلہ ہے اتے اسی اکٹھا ہونا چاہندے ہا ں تے اک ناں دے تھلے اکٹھا ہونا چاہندے ہاں۔ ایس بارے وچ اسی ناں وی سوچ لتا ہے جو بہوں چنگا ناں ہے، پاکستان عوامی اتحاد۔ جے تسی لوکاں نوں ایہہ ناں منظور ہے تے مینوں وی ایہہ ناں منظور ہے۔ اجلاس وچ نویں گرینڈ الائنس دے منشور نوں وی جلد پیش کرن دا علان کیتا گیا۔ سابق صدر پرویز مشرف نے آکھیا کہ جداں وی متحدہ قومی موومنٹ (ایم کیو ایم) دی گل آندی ہے تے میرا ناں لتا جاندا ہے۔ میں کراچی دی اک نِکی لسانی جماعت دا سربراہ کیوں بناں گا؟۔ انہاں آکھیا کہ ایم کیو ایم پاکستان دے نال جو ہورہیا ہے ایس تے تشویشاں نیں۔ پر ایم کیو ایم پاکستان ہن ادھی جماعت رہ گئی ہے تے میں فاروق ستار یا مصطفی کمال دی تھاں نہیں لیندا چاہندا۔(شرفو تے وزیراعظم بننا چاہندا ہے)۔ انہاں نے مزید آکھیا کہ پاکستان سر زمین پارٹی تے ایم کیو ایم دا اتحاد اک دن چلیا تے ختم ہوگیا۔ جے دونوں جماعتاں اتحاد کرلین تے بہتر ہے پر ایہہ دونوں اکٹھی ہو وی گئیاں تد وی میں ایس دا سربراہ نہیں بنا گا۔ ایس گرینڈ الائنس وچ شامل جماعت سنی اتحاد کونسل دے سربراہ صاحبزادہ حامد رضا نے بی بی سی نال گل کردے ہوئے آکھیا کہ گرینڈ الائنس بنان دی ابتدائی کوششاں نیں تے ہلے ایس الائنس دے ٹی او آر طے ہونے نیں۔ ایہہ الیکٹورل الائنس نہیں ہے۔ اس دا مقصد اک انج دا اتحاد بنانا ہے جو اپوزیشن جماعتاں دا ہوئے تے پاکستان دے مسائل نوں قوم دے سامنے رکھیا جائے۔ انہاں نے دسیا کہ کجھ عرصہ پہلے پرویز مشرف تے انہاں دی جماعت نے رابطے کرنے شروع کیتے سن تے فیر انہاں توں میری تے کجھ دوجی جماعتاں دے سربراواں دی دبئی وچ ملاقاتاں وی ہوئیاں سن۔ انہاں نے مزید آکھیا کہ کجھ جماعتاں پرویز مشرف دی سربراہی وچ الیکشن وچ حصہ لینا چاہندیاں نیں پر کجھ نے اپنے تحفظاں دا ظہار کیتا۔ کجھ جماعتاں نے ایس اتحاد نوں الیکٹورل الائنس بنان دی گل نہیں منی۔ آل پاکستان مسلم لیگ دے ذرائع دے مطابق سب توں اہم گل پاکستان مسلم لیگ دے سارے دھڑیاں نوں متحد کرنا ہے۔ جے مسلم لیگ دے سارے دھڑے متحد ہوجاندے نیں تے فیر پرویز مشرف دی پاکستان وچ الیکٹورل اہمیت بن جائے گی۔ اینج ہون نال دوجی جماعتاں وی اے پی ایم ایل دا ساتھ دین وچ تیار ہو جان گیاں۔
تجزیہ کار عارف نظامی نے بی بی سی نال گل بات کردے ہوئے آکھیا کہ پرویز مشرف سیاست وچ ریلیونٹ ہونا چاہندے نیں۔ پر ویکھنا ایہہ ہے پئی کیہڑیاں جماعتاں نیں جو ایس اتحاد وچ رل رہیاں نیں۔ جے تے ایہہ جماعتاں ٹانگہ پارٹیاں نیں تے کیہ فیدہ۔ انہاں نے آکھیا کہ کراچی وچ ایم کیو ایم پاکستان تے پاکستان سرزمین پارٹی دا اتحاد جو اک دن ہی وچ ناکام ہوگیا، متحدہ مجلس عمل دا اک دم توں دوبارہ چالوہونا تے فیر ایہہ 23 جماعتاں دے اتحاد توں اینج لگدا ہے کہ آئندہ چوناں وچ کسی وی جماعت نوں واضح اکثریت نہ ملن دی کوششاں جاری نیں۔ پاکستان عوامی اتحاد دے بارے وچ انہاں نے آکھیا کہ ریٹائرد جنرل تے رٹائر ہی ہوندا ہے۔ الیکٹورل سیاست وچ فوجی ناکام ہی ہوندے نیں۔ میں مشرف دی کاوشاں نوں زیادہ اہمیتاں نہیں دیندا۔ سینیئر صحافی تے تجزیہ کار ضیا الدین نے آکھیا کہ رٹائرڈ سپورٹس مین یا رٹائرڈ جرنیل ہون، ایس دی کوشش ہوندی ہے کہ اوہ دوبارہ لائم لائٹ وچ آجائے۔ مشرف دی وی ایہو کوشش ہے۔ مشرف دا کوئی سیاسی مستقبل نظر نہیں آندا۔ جے اوہ پاکستان آئے تے اوہ گرفتار کرلتے جان گے۔ انہاں دا اک مسئلہ ایہہ ہے کہ اوہ ہن تک اپنی پرانی آن بان بھل نہیں سکے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels