Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> کمال من گیا:سٹیبلشمنٹ ملاقات کروائی۔ایجنسی تے پی ٹی آئی لیڈر کون سن؟ہرکارے تے وچولے

کمال من گیا:سٹیبلشمنٹ ملاقات کروائی۔ایجنسی تے پی ٹی آئی لیڈر کون سن؟ہرکارے تے وچولے

وچار ڈیسک
November 11th, 2017

ہشیار کمال اوہی کیتا جیہڑا سیانا ’’کاں‘‘ کردا ہے کہ انہاں دے سہولت کار اتے وچولے وی سر پھڑ کے رہ گئے ۔پاکستان تحریک انصاف ولوں وچولے دا کردار کس ادا کیتا ایس بارے کمال سچ نہ بول سکیا۔اخیر پی ٹی آئی نوں ایہہ اتحاد کروان دی کیہہ لوڑ پئی سی؟کیہہ کوئی ہور گیم چل رہی ہے؟ کیہہ پی ٹی آئی اتے عمران خان, مشرف، ایم کیو ایم تے سندھی قوم پرستاں دے ملغوبے نال سندھ وچ پی پی پی دا مقابلہ کرن دا سفنہ ویکھ رہے نیں؟ جے مشرف اک وار انٹر ہو گیا تے اوہ عمران نال ٹکرے گا؟ زرداری ہوری وی سمجھ جاون پئی ہرکارے اوس نوں سندھ توں وی کڈہن لئی تیار نیں۔ایس وار تےفاروق ستار سارا کھیڈ وگاڑدتا ہے، پر ہلے ہور گیماں پین گیاں۔پی ایس پی تے ایم کیو ایم اتحاد توں خش مشرف دی پھوک ترے گھنٹیاں بعدوں ہی نکل گئی سی جداں ستارے ہوراں نے گیم الٹ دتی۔فاروق ستار دے خط بارے وی تبصرے وادھو کہ گورنر دے بیان پاروں وی لگ پتہ گیا پئی دال وچ کجھ کالا زرور ہے۔جے عمران خان ایس کھیڈ دا حصہ نہیں تے انہاں لئی وڈی پریشانیاں۔ہن اوہ اپنی پارٹی دے لیڈر دا ناں دسن جیہڑا وچولا سی اتے اوس خلاف کاروائی کرن۔ویسے اجہی حماقت عمران اسمائیل، علوی اتے نعیم الحق وچوں کوئی وی کر سکدا ہے۔ہن تسی خبر پڑھو۔جداں پتہ چل ہی گیا پئی ملاقاتاں دا بندوبست ہرکاریاں کروایا سی تے ہشیار کمال شیخ رشید بنن دی کوشش کیتی اتے آکھیا ہر کوئی سٹیبلشمنٹ توں مدد لیندا ہے۔سہولت کاراں ، وچولیاں اتے ہرکاریاں لئی ایسوچ سبق موجود ہے پئی جے اوہ سمجھ سکن۔
خبراں وچ دسیا گیا ہے پئی پی ایس پی دے چیئرمین مصطفی کمال دا کہنا ہے کہ جدوں توں فاروق ستار دے نال رل کے پریس کانفرنس کیتی ایس دے بعد توں آکھیا جارہیا ہے کہ ایہہ سیاسی اتحاد سٹیبلشمنٹ دے دباؤ پاروں ہویا پر ایس وچ کوئی حقیقت نہیں۔ پاکستان ہاؤس کراچی وچ پریس کانفرنس کردے ہوئے پاک سرزمین پارٹی دے چیئرمین مصطفی کمال دا کہنا سی کہ فاروق ستار دی خاہش تے سٹیبلشمنٹ نے ملاقات کروائی۔ 8 مہینے توں فاروق ستار سٹیبلشمنٹ راہیں پی ایس پی نوں ایم کیو ایم وچ ضم کرن دی کوشش کررہے نیں۔ مصطفی کمال نے آکھیا کہ اج میڈیا نال گل بات کرن دا مقصد کجھ حقیقتاں عوام دے سامنے رکھنا ہے ۔ آف دی ریکارڈ سب نوں سب پتہ ہے۔ اسی دو دن کوئی گل نہیں کیتی کیونجے جس دن توں این کیو ایم پاکستان دے سربراہ فاروق ستار دے نال رل کے پریس کانفرنس کیتی ایس دے 4 گھنٹے بعد توں ایہہ تاثر دتا جارہیا ہے کہ سانوں سٹیبلشمنت نے اتحاد تے مجبور کیتا۔ حتی کہ گورنر سندھ نے وی ایہو آکھیا۔ جداں کہ ہر گھنٹے بعد قلابازیاں تے کامیڈی شو ہورہیا ہے۔ چیئرمین پی ایس پی دا کہنا سی کہ تاثر دتا جارہیا ہے کہ اسی فاروق ستار نوں اغوا کرکے انہاں توں ایہہ پریس کانفرنس کرائی ۔پورے پاکستانی عوام دے دماغ وچ بٹھا دتا کہ پی ایس پی سٹیبلشمنٹ دی آلہ کار ہے ۔ہاں، سانوں سٹیبلشمنٹ نے بلا کے فاروق ستار نال ملایا تے اوہ پہلے توں اوتھے بیٹھے ہوئے سن۔ مصطفی کمال نے آکھیا کہ ایم کیو ایم تے فاروق ستار فرمائشاں نال سٹیبلشمنٹ دے راہیں سانوں بلاندے نیں۔ پاکستان دا کیہڑا سیاست دان ہے جو سٹیبلشمنٹ نال گل بات نہیں کردا۔ انہاں دا کہنا سی کہ ساڈے کارکن اپنی جان ہتھیلی تے رکھ کہ اپنا منشور گھر گھر پہنچا رہے نیں تے ایہہ حقیقت دے برعکس ہے کہ میں سٹیبلشمنٹ دا یجنٹ ہاں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels