Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> کلبھوشن ،بیوی نال ملاقاتاں۔جے نواز ہوندا تے رولا پئے جاندا۔ہرکارہ میڈیا چپ؟

کلبھوشن ،بیوی نال ملاقاتاں۔جے نواز ہوندا تے رولا پئے جاندا۔ہرکارہ میڈیا چپ؟

وچار ڈیسک
November 11th, 2017

کلبھوشن دی بیوی نا ل ملاقات دا فیصلہ کس کیتا؟ جے اجیہا فیصلہ وزیر اعظم نواز شریف دے دور وچ ہویا ہوندا تاں ہرکارے اتے کھڑپینچ میڈیاراہیں پئے دہائیاں جانیاں سن۔بھارت مخالفتاں نوں اندرونی سیاستاں وچ کنج ورتیا جاندا ہے کلبھوشن کیس اوس دی تازی مثال۔اک پاسے ایہہ کیس قومی سلامتی دا مسئلہ سی پر ایس نوں چکن مگر نواز مخالفتاں دا بوتھاکہ جدوں دی کلبھوشن دی رحمی اپیل آرمی چیف دی ٹیبل تے ہے کیہہ تسی اوس ہرکارے میڈیا تے کوئی گل سنی؟پر جے کل کلاں ایہہ اپیل صدر تیک اپڑ گئی تاں تسی وادھو ٹی وی پروگرام ویکھو گے۔ہرکارے میڈیا دی بھارت مخالفتاں اوہ ہتھیار جیہڑا اندرون ملک اپنے ویری پاکستانیاں خلاف ہی ورتیا جاندا ہے۔
ایہہ درست پئی خارجہ پدر تے دس گلاں سوچنیاں پیندیاں نیں پر جداں تسی اجہے قومی سلامتی دے مسلیا ں تے اندرونی سیاستاں کردے ہو تاں مسلہ ہور وگڑ جاندا ہے۔اج جے کلبھوشن دی بیوی نال ملاقات دا فیصلہ وزیراعظم نواز شریف دے ہوندے ہوئے کیتا گیا ہوندا تے نہ صرف شیخ رشید(بٹ) ورگیاں ولوں بیانات آنے سن سگوں میڈیا دے اک سیکشن رولا پا دینا سی۔ پر ساریاں نوں اج چپ لگی ہے کیونجے نواز تے ہے نہیں تے انہاں دا مسئلہ کلبھوشن نہیں نواز سی۔ چیتے رہے پئی پانامہ توں کجھ ہفتے پہلاں مارچ 2016وچ اک پاسے کلبھوشن کیس نوں کڈہیا گیا سی تے دوجے پاسے چھ فوجی افسراں سنے آئی جی ایف سی کوئٹہ نوں کرپشن وچ کڈہن دی لیکس روزنامہ ڈان توں آئی سی۔اپنا احتساب آپ دے اصولاں پاروں لیپا توپی کر کے چھ افسراں دا کیس گول ہو گیا اتے سرکاری پدر تے کوئی بیان وی نہ اایا اتے کلبھوشن کیس ہلے جاری پر پانامہ فیصلہ آچکیا ہے۔کلبھوشن دے کیس نوں عین اوس ویلے کڈہیا گیا سی جداں ایرانی صدر روحانی ہوری پاکستان دے دورے تے سن۔ڈیڑھ سالاں دے اخبار پڑھ لو،بودھے میڈیا دے پروگراماں ول جھات مارو پئی اینج جاپدا سی نواز تے کلبھوشن اک سن۔
اج خارجہ وزارتاں دے بلارے محمد فیصل ہوراں دا بیان چھاپیا گیا ہے کہ انسانی ہمدردیاں پاروں کلبھوشن ہوراں دی بیوی نال ملاقات دا بھارت نوں سنہیا گھلیا گیا ہے۔ ملاقات ہوندی ہے یا نہیں ایس بارے ہن بھارت فیصلہ کر سی۔آندے نیں پئی ایس فیصلے پاروں پاکستان اوس بھارتی پروپیگنڈے دا توڑ کڈہیا ہے جس پاروں بھارت عالمی پدر تے ایہہ آکھدا ہے پئی پاکستان کلبھوشن نال کسی نوں ملن نہیں دیندا۔خارجہ پدر تے اینج ہی ہوندا ہے پر جے خارجہ مسلیاں تے اندرونی سیاستاں کھیڈیاں جاون تاں گل وگڑجاندی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels