Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> امریکی سنٹرل کمانڈ دا پردھان کیہہ کرن پاکستان آیاسی؟امریکی امداد تے چین مخالفت؟

امریکی سنٹرل کمانڈ دا پردھان کیہہ کرن پاکستان آیاسی؟امریکی امداد تے چین مخالفت؟

وچار ڈیسک
August 20th, 2017

اج پاکستان لئی وڈا فیصلہ ایہو ہے کہ اوہ چین مخالفت تے امریکی سعودی اتحاد توں کنج بچ سکدا ہے؟جس دیہاڑ توں چین نے پاک افغان سانگیاں نوں چنگا کرن دا اعلان کیتا ہے اوس دن توں امریکی تے لندنی ہرکاریاں دی پھرتیاں وادھو۔سعودیاں تے نواز توں یمنی جنگ وچ مدد نہ کرن دابدلہ لے لتا پر گل ایتھے رکدی نظر نہیں آرہی۔امریکی امداد ہمشہ پاکستان وچ جمہوریت خلاف ورتی گئی ہے اتے ایہہ اوہ سچ ہے جس بارے وڈے وڈے جگادری در وٹی رکھدے نیں۔پچھلے40ورہیاں توں امریکی سعودی اتحاد نے ساڈے خطہ نوں برباد کرن وچ وڈا کردار ادا کیتا ہے ۔تسی وائس آف امریکہ دی ہشیار خبر پڑھو کہ تہانوں آپ اندازہ ہوئے گا پئی کون، کیوں امریکی امداد دے حق وچ ہے؟امریکہ تے مغرب نال امداد لتے بغیر وی چنگے سانگے رکھے جا سکدے نیں پر دانشور آکھدے نیں کہ جے سانوں امداد نہ ملی تے سانگے چنگے نہیں رہن گے۔امریکی امداد بارے پارلیمنٹ وچ بحثاں لوڑی دیاں نیں۔جوزف ووٹل ہوراں نوں شمالی وزیرستان وی لیجایا گیا تانجے اوہ ویکھن پئی پاکستان ات گردیاں مکاون لئی کیہہ کجھ کر رہیا ہے۔چیتے رہے، کجھ دیر پہلاں وی امریکی سنیٹراں نے پاکستان دا دورہ کیتا سی اتے سرحد پار کابل جا کے انہاں بلکل الٹ بیان دتے سن۔

امریکہ دی سنٹرل کمانڈ دے سربراہ جنرل جوزف ووٹل ہوراں پاکستان وچ ملک دی سیاسی اتے عسکری قیادتاں نال ملاقاتاں کیتاں نیں۔ ہفتہ نوں جنرل ووٹل نے اسلام آباد وچ وزیراعظم شاہد خاقان عباسی نال ملاقات کیتی۔ ایس موقع تے وزیر خارجہ خواجہ آصف ،وزیر دفاع خرم دستگیر تے دوجے وڈے افسر وی موجود سن۔ جمعہ نوں جنرل ووٹل نے پاکستانی فوجی پردھان جنرل قمر جاوید باجوہ ہوراں نال راولپنڈی وچ فوج دے صدر دفتر وچ ملاقات کیتی سی۔ امریکی سفارتخانے توں ہفتہ نوں جاری اک بیان وچ دسیا گیا کہ امریکی جنرل نے پاکستانی عہدیداراں نال ملاقاتاں وچ انسداد دہشت گردی وچ تعاون دی ضرورت تے زور دیندے ہوئے آکھیا کہ سارے دھڑیاں نوں ایس گل نوں یقینی بنان لئی کم کرن دی لوڑہے کہ پاکستان دی سرزمین ایس دے ہمسایاں دے خلاف کسی وی طراں دی ات گردیاں لئی ورتی نہ جائے۔ حالیہ ہفتیاں وچ پاکستان تے امریکہ دے درمیان سفارتی تے عسکری رابطیاں وچ اضافہ ہویا ہے تے ایہہ رابطے ک ایسے وقت ہوئے جداں صدر ٹرمپ دی انتظامیہ افغانستان تے خطے توں متعلق اپنی پالیسی دا علان کرن والی ہے۔ ٹرمپ انتظامیہ پاکستان دی مدد وچ کٹوتی یا ایس نوں روکن دے معاملے تے وی غور کررہی ہے۔ تاہم ہلے تک ایس بارے وچ پالیسی سامنے نہیں آئی ہے۔ امریکی عہدیدار ایہہ کہندے آئے نیں کہ پاکستان نے حقانی نیٹ ورک یا دوجے افغان طالبان عسکریت پسنداں دے خلاف کاروائی نہیں کیتی ۔انہاں دے ٹھکانے ہورے پاکستان وچ نیں۔ پاکستان ایس توں انکاری ہے۔ دفاعی امور ددے تجزیہ کار طلعت مسعود کہندے نین جے پاکستان دی مدد وچ کوئی کٹوتی ہوندی ہے یا ایس نوں روک دتا جاندا ہے تے پاکستان تے امریکہ دے تعلقات تے ایس دا منفی اثر ہوئے گا۔ وائس آف امریکہ نوں امید ہے کہپاک امریکہ سانگیاں وچ ہور وگاڑ نہیں آئی گا۔ امریکہ نوں ایہہ علم ہے کہ پاکستان دی اہمیت رہے گی کیونجے افغانستان دے حالات وی بہوں بھیڑے نیں۔ فوجی دے شعبہ تعلقات عامہ یعنی آئی ایس پی آر دے مطابق جنرل باجوہ نے امریکی سینٹرل کمانڈ دے سربراہ نال ملاقات وچ آکھیا کہ پاکستان تے افغانستان دے سرحدی علاقے وچ سیکورٹی دی صورت حال نوں بہتر کرن لئی افغان سکیورٹی فورسز تے امریکہ دی زیر کمانڈ ریزولیوٹ سپورٹ مشن دے نال رل کے کم کراں گے۔ تجزیہ کار طلعت مسعود دا کہنا ہے کہ پاکستان تے امریکہ دے سانجھے مفاداں پاروں ایہہ لوڑی دا ہے پئی انہاں دے آپسی سانگے پکیاں بنیاداں تے اگے ودھن ۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels