Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> نااہلی دے باوجود نواز شریف دی پارٹی تے گرفت تگڑی۔وائس آف امریکہ

نااہلی دے باوجود نواز شریف دی پارٹی تے گرفت تگڑی۔وائس آف امریکہ

وچار ڈیسک
August 4th, 2017

نواز شریف ہن مسلم لیگ(ن) دے رہبر نیں اتے کابینہ سنے سارے فیصلے کر رہے نیں۔ ماضی وانگ انہاں دی پارٹی ٹٹ نہیں سکی اتے نواں وزیراعظم بنا کے انہاں مہارتاں نال اپنے کارڈ کھیلے۔عوامی پدر تے انہاں نوں مظلوم آکھیا جارہیا ہے کیونجے اسٹیبلشمنٹ دا اپنا ٹریک ریکارڈ بہوں خراب ہے۔ہن نویں وزیراعظم وی2018تیک رہن گے تے شہباز شریف پنجاب دی راکھی کرن گے۔دوناں بھراواں وچ پاڑ پان دا پرانا منصوبہ اک وار فیر توڑ نہ چڑھ سکیا۔پر ہلے وی بہوں قوتاں نواز دی سیاستاں نوں مڈھ توں مکاون لئی کم کر رہیاں نیں اتے انہاں دے سانگے لندن تک جاندے نیں۔عدالت اپنا فیصلہ ریوو کردی ہے یا نہیں، ایس دا فیصلہ تے جیف جسٹس ہی کرنا ہے کہ جے عدالت بھٹو کیس تے نویں کیس نوں آپ ریوو کرے تے اوس دا وقار ودھے ہی گا۔ہن تساں وائس آف امریکہ دی خبر پڑھو۔

اسلام آباد: پاکستان دی اک وڈی سیاسی جماعت تے ایس وقت اسمبلی وچ اکثریتی پارٹی مسلم لیگ (ن) دے سربراہ نواز شریف تِن وار وزیراعظم بنے پر کدی وی اپنی مددت پورنہ کرسکے۔ پر ایس وار وی عدالت عظمیٰ توں نااہلی دے باوجود ایہہ جاپدا ہے پئی ہن تک انہاں دی جماعت تے گرفت تگڑی جے۔ پاناما لیکس توں متعلق مقدمے وچ سپریم کورٹ دی سماعت دے دوران بعض سیاسی قائدین ولوں ایہہ قیاس آرائیاں کیتیاں جارہیاں سن کہ جے فیصلہ نواز شریف دے خلاف آیا تے انہاں دی جماعت دے بہوں ممبر مسلم لیگ (ن) نوں چھڈ جان گے۔ پر ہن تک اینج نہیں ہویا۔ سگوں پچھلے ہفتے مسلم لیگ (ن) دی پارلیمانی پارٹی دے اجلاس وچ نواز شریف نے جداں اپنے نِکے بھرا شہباز شریف نوں وزارت عظمیٰ تے عبوری مدت لئی شاہد خاقان عباسی دے ناں پیش کیتے تے انہاں نے فوراً ہی منظور کر لتا ۔ تحریک انصاف دے وائس چیئرمین شاہ محمود قریشی نے نواز شریف دا ناں لتے بغیر آکھیا سی کہ مسلم لیگ (ن) ولوں وزیراعظم کوئی وی ہویا، ایہہ فیصلہ’’ کوئی ہور‘‘ ہی کرے گا۔
نواز شریف دا تعلق اک کاروباری گھرانے توں ہے تے انہاں نے پنے سیاسی سفر دا آغاز 70 دی دہائی دے آخر وچ کیتا سی۔ ملک دے سابق فوجی صدر ضیا الحق ولوں نافذ مارشل لا دے دور وچ نواز شریف 1985 وچ غیر جماعتی بنیاد تے ہون والے انتخابات دے بعد آبادی دے لحاظ توں ملک دے سب توں وڈے صوبے پنجاب دے وزیراعلیٰ منتخب ہوئے سن۔ اودوں توں ہی انہاں دی سیاست دا مرکز صوبہ پنجاب خاص طور تے لہور رہیا ہے۔ نواز شریف پہلی وار 1990 وچ وزیراعظم منتخب ہوئے سن پر 1993 وچ ایس وقت دے صدر غلام اسحاق خان نے آئینی اختیارات استعمال کردے ہوئے انہاں دی حکومت ختم کردتی سی۔ ایس فیصلے دے خلاف میاں صاحب نے سپریم کورٹ نال رجوع کیتاسی جس تے عدالت عظمیٰ نے انہاں دے حق وچ فیصلہ دیندے ہوئے انہاں دی حکومت نوں بحال کر دتا سی۔ پر ایس فیصلے دے بعد صدر دے نال جاری مسلسل لڑائی دے بعد اوس وقت دے آرمی چیف دی مداخلت تے وزیراعظم تے صدر دونوں ہی فارغ ہوئے سن۔ پر 1999 وچ اوس وقت دے آرمی چیف پرویز مشرف نے نواز شریف دی حکومت ختم کردتی سی۔ فوجی صدر پرویز مشرف دے دور وچ نواز شریف دے خلاف طیارہ ہائی جیکنگ کیس تے دہشت گردی دے مقدمات درج کرکے انہاں نوں عمر قید تے جائیداد دی ضبطی دی سزا سنائی گئی سی۔ بعد چوں اوہ حکومت دے نال اک معاہدے دے تحت سعودی عرب جلاوطن ہوگئے جس دے بعد مسلم لیگ دے بڑے سرکردہ راہنماواں نے مسلم لیگ (ق) دے ناں توں اک پارٹی بنا لئی سی جو پرویز مشرف دے دور وچ برسر اقتدار وی رہی۔ پر نواز شریف دی 2007 وچ وطن واپسی دے بعد انہاں دی جماعت اک وار فیر اکٹھی ہوئی تے 2008 وچ صوبہ پنجاب وچ انہاں دی حکومت بنی جداں کہ 2013 وچ پنجاب دے علاوہ مرکز وچ وی مسلم لیگ (ن) اقتدار وچ آئی تے نواز شریف تیجی وار وزیراعظم منتخب ہوئے۔ ایس وار نہاں نوں تحریک انصاف ولوں مسلسل احتجاج تے الزاماں دا سامنا رہیا۔ 2016 وچ پانامہ پیپرز وچ انہاں دے بچیاں دے ناں بیرون ملک موجود ’آف شور کمپنیاں توں متعلق انکشافاں دے بعد تحریک انصاف نے نواز شریف دے خلاف اک بھرپور تحریک چلائی۔ حزب مخالف دی کجھ جماعتاں پاناما لیکس دے معاملے نوں عدالت عظمیٰ لے گئی سن جس تے 28 جولائی 2017 نوں نواز نوں نااہل قرار دے دتا۔ عدالت دے فیصلے دے بعد نواز شریف نے وزارتِ عظمیٰ دا منصب تے فوری طور تے چھڈ دتا ہے پر سپریم کورٹ دے فیصلے تے انہاں دی جماعت ولوں مسلسل تحفظاں دا اظہار کیتا جا رہیا ہے۔ مسلم لیگ دے عہدیداراں دا کہنا ہے کہ نواز شریف نے عوام دے سامنے جان دا فیصلہ کیتا ہے پر تاحال انہاں نے ایس حوالے توں کوئی مہم شروع نہہیں کیتی ۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels