Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> پی ٹی آئی دے جلسے وچ قطر تے چین تے تنقیداں تے لندن دی تعریفاں کیوں؟کشمیری وزیراعظم مخالفتاں وادھو

پی ٹی آئی دے جلسے وچ قطر تے چین تے تنقیداں تے لندن دی تعریفاں کیوں؟کشمیری وزیراعظم مخالفتاں وادھو

August 1st, 2017

پاکستان تحریک انصاف دے جلسے وچ دو ملکاں تے تنقیداں تے ’’ سسرالی ملک‘‘ دی تعریفاں ہی نہیں سگوں کشمیری وزیراعظم نوں گالاں کڈہیاں گیاں۔کیہہ ایہہ سب کسے خاص عالمی ایجنڈے دا حصہ ہے؟ پی ٹی آئی دے جلسے وچ پہلاں شیخ رشید نے سی پیک دا ناں لے کے چین دے ٹھیکیاں بارے رشوتاں دی گل کر کے سب نوں حیران کردتا۔ شیخ رشید آکھیا کہ چین والوں جیہڑے کرپشن دے ٹھیکے ہوئے نیں اوس دی قیمت نوں گھٹ کر دیو۔تقریر دا ویڈیو کلپ تھلے دے رہے ہاں تانجے سند رہے۔ایہہ الزام نواز شریف تے نہیں سگوں چینیاں تے ہے۔امریکہ تے برطانیہ دے سپانسرڈ افغان جہاد دا مال کھان والے ہن چین دے سب توں وڈے منصوبے نوں بڑی ہشیاریاں نال ڈس کریڈٹ کر رہے نیں۔شیخ رشید سی پیک دا ناں اینج ہی لے رہیا سی جنج مہاتما گاندھی ہوری سبھاش چندر بوس دا ناں لے کے اوسے دے خلاف گلاں کردے سن۔چینی منصوبیاں تے رشوتاں دے الزام لا کے شیخ ہوری کیہہ امریکہ تے برطانیہ توں مدد منگ رہے نیں؟شیخ ہوری ایتھے تیک نہ رہے سگوں انہاں نوں یو اے ای تے بحرین وی یاد آگئے کہ سب جاندے نیں کہ یو اے ای گوادر پاروں پاکستان تے چین خلاف ہے اتے قطری جیہڑے وچ سعودی عرب، یو اے ای تے بحرین اکٹھے نیں۔اینج جاپدا ہے ایجنڈے دے دوجے پنے گھل رہے نیں۔آزاد کشمیر دے وزیراعظم تے گلگت بلتستان دے وزیراعلی نوں لال حویلی دے ٹھیکدار نے ’’کیہہ پدی تے کیہہ پدی دا شورا‘‘ آکھ کے اپنی گھٹیا ذہنیت دا پرچار کیتا۔جیہڑی زبان شیخ رشید ورتی اوہ تسی آپ سن لو کہ ایس نال کشمیری تے گلگت بلتستانی کیہہ سوچن گے؟
اپنی ایسے تقریر وچ شیخ رشید،جیہڑے اپنے ناں دے نال اپنا اصلی ناں بٹ لکھنا بھل چکے نیں قطر خلف وی بولے۔لگدا ہے انہاں نوں وی چوہدری اعتزاز وانگ ایل پی جی نال پیار ہے تاں مارے سارا غصہ ایل این جی تے کڈہدے رہے۔ ایس جلسے وچ عمران خان نے وی آزاد کشمیر دے چونویں وزیراعظم خلاف گھٹیا زبان ورتی جس دا فاروق حیدر ہوراں اج چوکھا جواب دتا۔اوہ اپنی تقریر وچ لندن دی تعریفاں کرنیاں نہ بھولے۔انہاں نوں اپنی پہلی بیوی اتے برطانیہ دے ارب پتی دی دھی جمائما گولڈ سمتھ(اوس اپنے ناں توں کئی ورہے پہلاں ’’خان‘‘ ہٹا دتا ہویا ہے) وی تقریر وچ یاد آئی جیہڑی اجکل وکی لیکس دے بانی جولیان اسانج دی مہم چلا رہی ہے۔خان ہوراں نوں برطانیہ ایڈا پسند ہے کہ اوہ ایہہ بھل جاندے نیں کہ ایہہ اوہی ملک ہے جس دو سو سال ساڈے تے قبصہ کرے رکھیا سی تے بہوں ظلم کیتے سن۔بلتستانی گلگتی وزیر اعلی،آزاد کشمیری وزیر اعظم تے قطر چین خلاف بیانیہ کیہہ ہے؟کس نوں خش کرن لئی ہے؟ایس بارے تساں آپ سوچو۔
Speech of Sheikh Rasheed
https://www.youtube.com/watch?v=LfuktmVojxU


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels