Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> اج5جولائی ہے جیہڑا40ورہیاں توں مکیا نہیں

اج5جولائی ہے جیہڑا40ورہیاں توں مکیا نہیں

July 5th, 2017

پاکستان ٹٹن بعدوں پاکستان وچ پہلی عوامی سرکار بنی سی کہ امید سی پئی ساڈی غیر منتخب اشرافیہ نے 16دسمبر توں کجھ سبق سکھیا ہوئے گا پر جولائی دی پنج تریخ1977ایس گل دی گواہ کہ ساڈی اشرافیہ جمہوری بندوبست تے عوامی سرکاراں دے خلاف ہے کہ ایہہ سبق انہاں نوں گورے سکھا گئے نیں۔اوہ عوام نوں اپنی رعیت سمجھدے نیں اتے لوکاں دے وٹاں نال آون والیاں نوں اپنا ویری ۔ اوہ پاکستان وچ سیاست تے سیاستداناں دا مذاق اڈاندے نیں کہ جداں انہاں نوں پچھو پئی پاکستان کس بنایا سی تے اٹھ و اٹھ مارن لگدے نیں۔5جولائی1977نوں آئین توڑیا گیا تے اج تک ایس آئین وچ آمراں دیاں نشانیاں موجود نیں۔وقفیاں نال اتے سمجھوتیاں پاروں ضیا دے مرن بعدوں جمہوری سرکاراں بنیاں پر ایسدوران ایڈا گند پا دتا گیا سی کہ طاقت دا پلڑا غیر جمہوری قوتاں دے حق وچ ہی رہیاکہ فیر مشرف آوڑیا اتے اک وار فیر جمہوریت تے سیاستداناں خلاف وڈا مورچہ لایا۔میڈیا، سرکاری دفتراں، اداریاں،عدالتاں تے سیاستداناں وچ ہرکارے بنائے گئے جنہاں ہر محکمے،ادارے تے شعبے دا بیڑہ غرق کیتا۔ایجنڈا صاف سی کہ جمہوری ادارے ہون ہی نہ، جے ہون تے قنون ساز اداریاں توں تگڑے بلدیانی ادارے ہون اتے قنون سازادارے لاغر رہن۔مساں مساں کر کے 2008نوں ایس ایجنڈے نوں پہلی سٹ وجی پر انہاں لنگھے9سالاں وچ کوئی اک سال وی عوامی سرکار نوں چین نہ لین دتا۔ایس دے باوجود سیاستداناں اوکڑاں دا مقابلہ کیتا اتے 18ویں ترمیم، این ایف سی ایوارڈ توں سی پیک تک اک پاسے جمہوری بندوبست نوں جاری رکھیا ہے تے دوجے پاسے اسمبلیاں وچ پالیسیاں بناون ول گل اگے ودھ چکی ہے۔پر ہلے وی وڈے فیصلے ایواناں توں باہر ہی ہوندے نیں اتے کجھ ماملیاں وچ تے اسمبلیاں بول وی نہیں سکدیاں۔پنج جولائی نوں جمہوری بندوبست دی حامی اک پارٹی سی اتے اج ترے وفاقی پارٹیاں تے بہوں ساری نکی پارٹیاں جمہوری بندوبست نوں جاری رکھن تے اک نیں۔اختلافاں دے باوجود مارشلا دی حمائیت نہیں پر اسمبلیاں نوں اختیار نہ دین والے اج وی تگڑے نیں۔لڑائی اج وی اوہی ہے جیہڑی جولائی دی پنج تریخ نوں چار دہاکیاں پہلے شروع ہوئی سی اتے اوہ دن اجے مکیا نہیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels