Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> غیر ملکی فنڈنگ اتے پی ٹی آئی۔قنون مگر کدوں تیک لکیا جا سکدا ہے۔

غیر ملکی فنڈنگ اتے پی ٹی آئی۔قنون مگر کدوں تیک لکیا جا سکدا ہے۔

وچار ڈیسک
June 16th, 2017

قنونی لکونیاں پاروں کیس نوں لما تے کیتا جا سکدا ہے پر ایس نال عوام تے ایہہ گل کھل رہی ہے پئی دال وچ کجھ کالا ہے اتے غیر ملکی فنڈنگ دی منی ٹریل وی نہیں دتی جاسکدی کیونجے اینج پتہ چل جائے گا کہ رقماں کتھوں کتھوں آئیاں سن۔جے کہانی سدھی ہوندی تے قنوناں مگر نہ لکیا جاندا۔میڈیا وچ جو کجھ وکیلاں آکھیا اوہ تھلے دے رہے ہاں اتے جوسپریم کورٹ پچھیا اوہ وی پڑھ لو۔
اسلام آبا:د سپریم کورٹ وچ تحریک انصاف دے سربراہ عمران خان تے جنرل سیکرٹری جہانگیر خان ترین دی آف شور کمپنیاں ، منی لانڈرنگ تے غیر ملکی فنڈنگ دے حوالے نال مقدمہ دی پیشی دے دوران چیف جسٹس ریمارکس دیندے ہوئے آکھیا کہ الیکشن کمیشن آف پاکستان غیر ملکی فنڈنگ دی تحیقیقات کرن دے حوالے نال مجاز اتھارٹی ہے۔ الیکشن کمشن دے اختیارات تے سمجھوتا نہیں ہوئے گا،۔غیر ملکی امداد دی وصولی، فنڈنگ دے ذرائع تے رقماں دا آڈٹ، پی ٹی آئی انہاں 3نکاتاں تے عدالت نوں مطمئن کرے۔ عدالت نے درخاست گزار حنیف عباسی دے وکیل اکرم شیخ نوں آکھیا ہے کہ اوہ اپنے موکل کولوں ہدایت لے کے عدالت نوں آگا ہ کرن کیہ سپریم کورٹ آئین دے آرٹیکل 184/3دے سوموٹو اختیار دے تحت غیر ملکی فنڈنگ دے حوالے نال الیکشن کمیشن توں رپورٹ طلب کرلے یا معاملے دی تحقیقات لئی کمیشن تشکیل دے ؟ عدالت معاملہ دی گہرائی تک جائے گی۔ چیف جسٹس ثاقب نثار دی سربراہی وچ تِن رکنی بنچ نے سماعت کیتی۔ الیکشن کمیشن ولوں ایڈووکیٹ ابراہیم ستی نے عدالت وچ جواب جمع کرایا جس وچ دسیا گیا ہے کہ عمران خان نے پچھلے 4سال دے دوران الیکشن کمیشن نوں پارٹی فنڈنگ دے بارے وچ کوئی ریکارڈ فراہم نہیں کیتا۔ چیف جسٹس نے تحریک انصاف دے وکیل انور منصور نوں آکھیا کہ عدالت پچھلی سماعت تے فارن فنڈنگ دے بارے وچ تہاڈیاں دلیلاں سن چکی ہے ۔ زیادہ ایشو آرٹیکل 6(3) دے حوالہ نال ہے، تُسی سانوں دسوں کہ قنون دے مطابق کوئی سیاسی جماعت ممنوعہ ذرائع توں فنڈز نہیں لے سکدی تے جے کوئی سیاسی جماعت فنڈز لیندی ہے تے فیر ایس دے ایکشن لین دے حوالہ توں متعلقہ فورم کیہڑا ہوئے گا ۔جس تے فاضل وکیل دا کہنا سی کہ قنون دے مطابق ممنوعہ ذرائع توں فنڈز نہیں لتے جاسکدے ۔ ایس طراں کسی وی پارٹی دے اکاؤنٹس دے حوالہ توں الیکشن کمیشن انتظامی اتھارٹی دے تحت جانچ پڑتال کرن دا مجاز ہے۔ چیف جسٹس نے انہاں توں استفسارکیاتاکہ الیکشن کمیشن کس طراں طے کردا ہے کہ وصول شدہ فنڈز ممنوعہ نیں یا نہیں۔انور منصور نے دسیا کہ جدوں کوئی جماعت فنڈزوصول کردی ہے تے ایس دی جمع کردہ دستاویزاں دی جانچ پڑتال تے ایہہ گل طے ہوسکدی ہے کہ فنڈزغیرممنوعہ نیں یانہیں ۔پر مالیاتی گوشواراں دے آڈٹ دے بعد جے انتخابی نشان الاٹ ہوجائے تے اکاؤٹنس دوبارہ نہیں کھولے جا سکدے ۔ ایہہ گل ریکارڈ تے ہے کہ الیکشن کمشن نے کدی وی ساڈے مالیاتی گوشواراں نوں مسترد نہیں کیتا۔ چیف جسٹس نے آکھیا کہ تہاڈے مطابق یک بار گوشوارے منظور ہو ن دے بعد دوبارہ نہیں کھل سکدے ؟کیہ ممنوعہ فنڈز دے معاملے تے الیکشن کمیشن خود کارروائی کرے گا یا ایس نوں کسی دوجے دی معلومات دی ضرورت ہوئے گی ؟فاضل وکیل دا کہنا سی کہ الیکشن کمشن آڈٹ رپورٹ نوں ویکھ کے ہی کاروائی دا فیصلہ کرسکدا ہے ۔ الیکشن کمیشن نوں ازخود نوٹس لین دا اختیار نہیں ۔تاہم اوہ بطورانتظامی اتھارٹی اکاؤنٹس دا جائزہ لے سکدا ہے ۔ الیکشن کمیشن تے الیکشن ٹریبونل وچ فرق ہوندا ہے، ٹریبونل دے کول نوٹیفکیشن دا اختیار ہوندا ہے ۔ انور منصور نے اپنے دلائل مکمل کیتے تے اک استفسارتے انہاں نے عدالت نوں آگاہ کیتاکہ عمران دے وکیل نعیم بخاری چھٹیاں تے نیں ۔ پیشی دوران الیکشن کمیشن دے وکیل، ابراہیم ستی نے غیر ملکی فنڈنگ دے متعلق اپنا تحریری جواب جمع کراندے ہوئے عدالت نوں دسیا کہ،پولیٹیکل پارٹیز آرڈیننس دے آرٹیکل ) 6(3 واضح ہے کہ کوئی وی سیاسی جماعت ممنوعہ ذرائع توں فنڈنگ نہیں لے سکدی ۔ جداں کہ پی ٹی آئی نے کدی وی اپنے مالیاتی گوشواراں وچ ایہہ ظاہر نہیں کیتا کہ ایس نے غیر ملکی فنڈز لتے نیں ۔ چیف جسٹس نے آکھیا کہ کوئی سیاسی جماعت ممنوعہ فنڈز نوں خود کیوں ظاہر کرے گی؟ کیہ سیاسی جماعت خود الیکشن کمیشن نوں دسدی ہے کہ ایس دی فنڈنگ کتھوں کتھوں آئی ہے تے ابراہیم ستی نے دسیا کہ ہر سیاسی جماعت لئی ضروری ہے کہ اوہ اپنے مالیاتی گوشواراں وچ اپنے فنڈنگ دے تمام ذرائع ظاہر کرے۔ پر ایتھے تحریک انصاف نے فراڈ کردے ہوئے حقائق چھپائے نیں ،۔ایس نے اپنے گوشواراں وچ غلط آمدن تے اخراجات دسے، جس تے جسٹس عمر عطا بندیال نے ریمارکس دتے کہ کیہ ایسی صورت وچ تہاڈ ایہہ کم نہیں سی کہ تحریک انصاف توں فنڈز دے ذرائع پچھدے؟ تُسی کوئی رکارڈ نہیں منگیا نہ اوہناں نے دتا۔ تہانوں فنڈنگ دے ذرائع منگنے چاہیدے سن۔فاضل وکیل نے آکھیا کہ پارٹی فنڈزدا رکارڈ فراہم نہ کرنا فراڈ ہے، انہاں نے جان بجھ کے بیرونی فنڈنگ نوں چھپایا۔ پی ٹی آئی دے اک سابق رہنما اکبر شیر بابرنے ایس بارے وچ الیکشن کمیشن وچ اک درخاست دائر کیتی ہے۔عدالت دے استفسار تے انہاں نے آکھیا کہ شاید کوئی وی سیاسی پارٹی ممنوعہ فنڈز دا ذکر اپنے گوشواراں وچ ظاہر نہیں کردی ہے ،فاضل چیف جسٹس نے انہاں توں پچھیا کہ کیہ سپریم کورٹ آئین دے آرٹیکل184 دی شق تِن دے تحت ایس معاملہ تے کوئی حکم جاری کرسکدی ہے تے انہاں نے آکھیا کہ الیکشن کمیشن نے اکبر ایس بابر دی درخاست دی سماعت کردے ہوئے قرار دتا ہے کہ سپریم کورٹ نوں ایس معاملہ تے کاروائی دا اختیار حاصل ہے۔ ایہو وجہ ہے کہ الیکشن کمیشن نے ایہہ معاملہ سپریم کورٹ وچ ہون دے باعث درخاست تے کاروائی 22 جون تک ملتوی کردتی ہے ۔ا یہہ معاملہ نہ صرف الیکشن کمیشن دے دائرہ اختیار وچ آندا ہے سگوں الیکشن کمیشن ایس حوالہ توں ازخود نوٹس وی لے سکدا ہے ۔الیکشن کمیشن بطور انتظامی ا تھارٹی ایس معاملہ دی انکوائری یا تادیبی کاروائی کرسکدا ہے پر اوہ بذات خود عدالت یا ٹریبونل نہیں ہے ۔پیشی دوران حنیف عباسی دے وکیل اکرم شیخ آکھیا کہ پی ٹی آئی نے کیلی فورنیا دی 195 کارپوریشناں توں فنڈز لتے نیں ،ا یہہ ساری تفصیلاں امریکہ دی سارا ویب سائٹ تے موجود نیں۔ پی ٹی آئی دی ایل ایل سی کمپنی نے بھارتیاں سمیت مختلف غیر ملکیاں توں وی فنڈز حاصل کیتے نیں۔ سپریم کورٹ آکھے تے کمرہ عدالت وچ ہی ویب سائٹ کھول کے تفصیلاں چیک ہوسکدیاں نیں۔ چیف جسٹس نے انہاں نوں آکھیا کہ ایس معاملہ نوں الیکشن کمیشن نوں گھل دیناچاہیدا ہے۔ اکرم شیخ نے آکھیا کہ اوہ ایس حوالہ نال اپنے موکل نال مشاورتاں کرکے عدالت نوں آگاہ کرن گے۔ پر جے ایہہ معاملہ الیکشن کمیشن نوں گھل دتا گیا تے پتہ نہیں کدوں تک کیس چلے ۔ چیف جسٹس نے انہاں نوں آکھیا کہ تُسی اپنے موکل کولوں ہدیتاں لے کرعدالت نوں دسن ۔جدوں اسی معاملہ الیکشن کمشن نوں گھلاں گے تے مدت دا وی تعین کردتا جائے گا ۔بعد ازاں مزید سماعت اج تک ملتوی کر دتی گئی۔الیکشن کمشن نے تحریک انصاف دے چیئرمین عمران خان دے خلاف انتخابی ضابطہ اخلاق دی خلاف ورزی توں متعلق کیس دی سماعت 24 جولائی تک ملتوی کر دتی۔ چیف الیکشن کمشنر دی سربراہی وچ پنچ رکنی کمیشن نے سماعت کیتی۔ سماعت کے دوران تحریک انصاف کے وکلاء نے اسلام آباد ہائیکورٹ دا تحریری حکم نامہ پیش کر دتا تے آکھیا کہ اسی نوعیت دے معاملے وچ انہاں نوں اسلام آباد ہائیکورٹ وچ 6 جولائی نوں جواب داخل کرانا ہے۔ ایس لئی کیس دی سماعت ملتوی کیتی جائے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels