Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> ہیتھرو ڈرامہ تے پی آئی اے:کتھے گئی ہیروئن؟ پاکستانی میڈیا یوٹرن لے لتا؟پر غلطی نہ مننی؟

ہیتھرو ڈرامہ تے پی آئی اے:کتھے گئی ہیروئن؟ پاکستانی میڈیا یوٹرن لے لتا؟پر غلطی نہ مننی؟

May 19th, 2017

مئی دی16تریخ دی رات نوں پی آئی اے دے طیارے توں ہیروئن نکلن دی خبر دی اج19تریخ تیک کوئی تصدیق نہیں ہو سکی۔پئی جے ہیروئن پھڑیچی گئی سی تاں سامنے کیوں نہ آئی؟60 گھنٹیاں بعد وی کوئی پکی خبر نہیں۔کیہہ ایہہ برطانیہ دی ایجنسیاں تے بی بی سی دا سانجھا ڈرامہ سی کہ جس نوں ساڈے پرائیوٹ میڈیا بغیر سوچے سمجھے یا ہورے ایجنڈے پاروں ’’جن جھپا ‘‘ پایا۔میڈیا تے خبر چلے تے محکمہ ’’عزتاں‘‘ بچاندا پھردا ہے؟ سولہ دی رات نوں وڈے وڈے اینکراں تے میڈیائی ماہراں اینج گل کیتی جنج اوہ موقعے تے موجود سن۔جے تساں گوگل تے سرچ کرو تے ایس خبر دے سارے حوالے پاکستانی میڈیا دے ملن گے یا فیر اک ہشیار خبراں سا سلسلہ بی بی سی اْردو تے۔حیران نہ ہونا، بی بی سی انگریزی ایس بارے خبر بعد وچ لائی پر بی بی سی اْردو تے ایس بار ے اک ’’مکار‘‘ خبر پہلے آئی۔خبر وچ نویں وقوعے بارے گھٹ تے پرانے وقوعیاں بارے وادھو خبراں سن۔ ایہو ٹرینڈ ساڈے میڈیا تے وی رہیا۔پاکستانی میڈیا جیہڑے سوال کل توں چک رہیا ہے اوہ سولہ مئی دی رات توں چکدا تاں نہ تے سنسنی پھیلنی سی، نہ گمراہیاں۔جہاز کڈے چر لئی ہیتھرو ائیرپورٹ رکنا سی؟ میڈیا تے ہیروئن وکھائے بغیر، ساڈا میڈیا کیوں اپنے سر تے گھٹا سٹنا شروع ہو گیا؟کیہہ چار گھنٹیاں لئی ہیتھرو ائیرپورٹ وچ رکن والے جہاز دے خفیہ خانیاں وچوں مخصوس آلیاں تے انجیرنگ ماہراں توں بغیر کجھ کڈہیا جا سکدا سی؟ سرکار برطانیہ تے اوس دیاں عظیم ایجنسیاں پچھلے 60 گھنٹیاں توں کیوں ’’گونگیاں‘‘ نیں؟ چلو، جے ہیروئن سی وی تے ائیرپورٹ توں باہر، ہائی سیکورٹی وچ کنج لیجانی سی؟ یا مقامی سہولت کار وی ہیتھرو ائیرپورٹ تے وادھو سن؟ پی آئی اے دے طیاریاں توں ہیروئن نکلن دی تریخ بیان کرن والے ساڈے اینکر کیہہ نہیں جاندے کہ ایہہ ہیروئن کیہہ افغانستان وچ مڈھ قدیم توں نہیں سگوں افغان جہاد ویلے توں بنانی شروع ہوئی سی۔سی آئی اے تے ایم آئی سکس اتے مقامی سہولت کاراں ایس نال اسلامی جہاد نوں کنج ٹیک دتا ایہہ کہانی احمد رشید توں چارلی ولسن وار تیک بہوں وار لکھی جا چکی۔جس خبر دی ہن تیک تصدیق نہیں ہوئی اوس نوں بار بار خبراں وچ ہی نہیں سگوں وڈے وڈے اینکراں وی دھرایا۔ایہہ سوچ لتا گیا کہ ’’بی بی سی‘‘ تے سچ ہی بولدا ہے؟ یا ایجنڈا کجھ ہور سی؟کیہہ ایہہ چین دے دورے بعدوں پاکستان نوں ’’کینڈے‘‘ وچ رکھن دی میڈیائی کوشش سی؟ سولہ مئی نوں وچار تے راتی 9وجے توں پہلاں ایس بارے توجہ دلائی پر ساڈا میڈیا تے وڈے اینکر اوس ویلے تیک بی بی سی تے نیشنل کرائم ایجنسی، برطانیہ دے ’’گھوڑے‘‘ تے سوار سن۔ اگلے دیہاڑ فیر ایہہ خبر لائی تے اوس دوجی خبر دا لنک وی دے رہے ہاں۔فیر میڈیا وچ دوجا رخ وی رپورٹ ہون لگا پر اپنی غلطی مننا ’’جواناں‘‘ دا شیوا نہیں۔پی آئی اے دا بلارا تے بعد وچ وزیر وی آکھدے رہے کہ سرکاری پدر تے کجھ نہیں دسیا گیا پر انہاں دی خبراں نکیاں تے ہیروئن دی خبر وڈی ہی رہی۔کیہہ بی بی سی اْردو والیاں پاکستانی میڈیا نوں ماموں بنایا ہے؟برطانیہ دے بندوبست دی ہر ویلے تعریفاں کرن والے اتے گل گل تے ٹوئیٹاں گھلن والے کپتان ہوراں تے ایس بارے چپ رہنا ہی مناسب سمجھیا۔ایہہ پہلی وار نہیں ہویا۔جے خبر دی تصدیقاں ہو وی جاندیاں تاں وی بہوں سوال وادھو سن؟ کہ سوال خنر دا نہیں سگوں ساڈی رپورٹنگ ، سنسی خیزیاں ، ایجنڈیاں تے ریٹنگ دا ہے کہ جس دا مڈھ ساڈی غلامانہ ذہنیتاں توں نکلدا ہے۔مسافراں نال بدتمیزیاں کرنا، عملے نوں خبر جاری کروا کے پہلاں توں مجرم آکھنا، وغیرہ بارے اک وار ٹھنڈے ہو کے جھات دی لوڑ۔
news published at 16 May evening at wichaar
http://www.wichaar.com/news/117/ARTICLE/32978/2017-05-16.html
news published at 17 May
http://www.wichaar.com/news/117/ARTICLE/32981/2017-05-17.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels