Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> مشال دے قتل مگر ’’مہم‘‘۔ چیف جسٹس ۔پلس ایکٹراں نوں پھڑیا ، ڈائریکٹراں نوں نہیں۔ مقدمہ اسلام آباد لیجاؤ۔پیو مشال

مشال دے قتل مگر ’’مہم‘‘۔ چیف جسٹس ۔پلس ایکٹراں نوں پھڑیا ، ڈائریکٹراں نوں نہیں۔ مقدمہ اسلام آباد لیجاؤ۔پیو مشال

وچار ڈیسک
May 17th, 2017

اوہ سویرے دس توں لوڈھے ویلے ترے وجے تیک میرے منڈے اتے اوس دی لاش نال بھیڑا سلوک کردے رہے اتے پلس اوتھے موجود سی ۔ایہہ گل مشال دی والد آپ عدالت وچ دسی۔پھڑیچے بندیاں وچوں تے اک وی پلس والا رلتی نہیں۔ہور تے ہور صوبے دی حاکم پارٹی تحریک انصاف دا کونسلر وی ہلے تیک پھڑیانہیں گیا۔تاں مارے تے مشال دے پیو نوں آکھنا پیا کہ مقدمہ اسلام آباد لیجایا جائے۔چیف ہوران بڈھے تے باہمت اقبال نوں ااکھیا کہ مقدمہ دوجی عدالت لیجایا جا سکدا ہے ۔قنون ایس دی اجازتاں دیندا ہے۔جیف ہوران مشال دے پیو نوں یقین دوایا کہ ایس مقدمے وچ انصاف ضرور ملے گا۔اج سپریم کورٹ وچ صوفی مشال قتل کیس دی پیشی سی۔ پلس بندے تے بندہ پھڑ رہی ہے، صوبائی سرکار حکمران جماعت دے کونسلر نوں پھڑن وچ ناکام ہے تے ایس ڈرامے دے اصل مجرم ہلے وی باہر پھر رہے نیں۔ اج ایس وقوعے نوں اک مہینہ تے چار دن لنگھ گئے۔اج وی پلس آکھیا ہے کہ جس ملزم عمران نے اعترافی بیان دتا ہے اوس دا چلان مزید دو ہفتیان تیک پیش کراں گے۔دو ہفتیاں بعدون کوئی نویں گل آجائے گی۔ سوشل میڈیا تے کجھ پلس والے وی ’’ملوث‘‘ نظر آرہے سن پر انہاں بارے وی خیبر پی کے دی ’’آزاد پلس‘‘ نے کجھ نہ کیتا۔مشال دا پیو ایہو آکھ رہیا ہے۔صوبے دے گارڈ فادر عمران خان ہوری مشال دے گھر چکر لاون توں بعد گونگلواں توں مٹی جھاڑ چکے نیں اتے ایس بارے چپ نیں۔ اج سپریم کورٹ وچ پیشی دوران مشال دے پیو دسیا پئی اوس دے منڈے نوں سویرے 10 وجے پھڑیچا گیا تے ترے وجے تیک اوس دی لاش نال بے حرمتی کیتی جاندی رہی۔ چیف جسٹس پلس نوں پچھیا کیہ تہانوں ایس وقوعے دی خبر ہی نہ لگی! چیف ہوری ترے رکنی بینچ نال ایس کیس دی ازخود سماعت کررہے نیں۔ چیف ہوراں ایہہ وی پچھیا کہ کیہ تہاڈے کول اوہ سی سی ٹی وی فوٹیج ہے جس وچ اک ہجوم لاش نوں ٹھڈے تے سوٹیاں مار رہیا ہے۔ انہاں پلس نوں آکھیا ’’سانوں پتہ ہے کہ لاش نال کیہ کیہ ہوندا رہیا ہے‘‘۔ ایڈیشنل ایڈووکیٹ جنرل وقار بلور ہوری ڈنگ ٹپا رہے نیں۔مشال ولوں وکیل خواجہ اظہار ہوراں کوٹ نوں دسیا کہ ویڈیوز بہوں وڈا ثبوت نیں اتے انہاں وچ ساری گواہی موجود ہے۔ مشال دے والد وی اج پیشی تے موجود سن۔ انہاں عدالت نوں دسیا کہ پلس ہن تیک ’’ایکٹراں نوں پھڑیچیا ہے پر ’’ڈائریکٹراں‘‘ نوں نہیں پھڑیا۔ چیف جسٹس ہوراں وی ایہہ آکھیا کہ ہورے مشال قتل کیس مگر کوئی ’’مہم‘‘ سی ۔عدالت اگلی پیشی دو ہفتیاں تے پا دتی ہے۔مشال تے پیو اخیر اوہ گل کردتی جس بارے عمران خان، وزیر اعلیٰ خٹک تے خیبر پی کے دی آزاد پلس سب خموش نیں۔ مشال دے والہ اقبال ہوراں آکھیا کہ میرے منڈے نال جد درندگی ہوئی اوس ویلے پلس اوتھے موجود سی پر انہاں کوئی ایکشن نہیں لتا۔ ایہہ سب ساڈی ریاست دی اندروں ٹٹن دی کہانی ہے اتے ریاست دے وڈکے ایس بارے دروٹی بیٹھے نیں۔ عدالت اپنا کم کررہی ہے پر پلس، صوبائی سرکار، حکمران سیاسی جماعت ہی نہیں سگوں پارلیمان نوں وی اپنا کردار ادا کرنا چاہیدا ہے۔ اک جے آئی ٹی وی مڑ بنائی گئی سی اتے اوس جے آئی ٹی دی خبر وی کوئی نہیں۔ میڈیا وی مشال کیس بارے زیادہ گل کرے کیونجے جو مشال نال ہویا ہے اوہ کل کسے ہور نال وی ہوسکدا ہے۔مشال دے پیو آکھیا کہ یونیورسٹی نوں سیکورٹی دتی جائے تے مڑ کھولیا جائے۔مشال دی بہناں پڑھن جانا جاہندیاں نیں تے انہاں نوں وی سیکورٹی دتی جائے۔خیبر پی کے دی خٹکی سرکار ایس حوالے نال کوئی کم کیوں نہیں کر سکدی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels