Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> ایرانی چوناں:سپریم لیڈر یونیسکو تعلیمی معاہدہ 2030 معطل کر دتا۔قدامت پسند تے اعتدال پسند آمنے سامنے

ایرانی چوناں:سپریم لیڈر یونیسکو تعلیمی معاہدہ 2030 معطل کر دتا۔قدامت پسند تے اعتدال پسند آمنے سامنے

May 14th, 2017

ایرانی قدامت پرست لیڈر اوہی کھیل کھیڈ رہے نے جیہڑا طالبان توں مودی تیک اک جیہا ہی ہے۔سپریم لیڈر نوں امریکہ تے مغرب نال کیتے تواریخی معاہدے تے کوئی اعتراض نہ سی اتے جے اوہ چاہیندے تاں اوس معاہدے نوں ڈک سکدے سن پر اج عام ایرانی غریباں تے قدامت پرستاں نوں ابراہیم رئیسی دی حمائیتاں وچ کرن لئی اک نکے جہے معاہدے نوں ڈک کے اپنی مغرب دشمنی دا اوہ چولا مڑ پا لتا ہے جس نوں انہاں دو سال پہلاں مغرب نال معاہدہ کرن ویلے ’’سٹور‘‘ وچ رکھوا دتا سی۔ایہہ سب چوناں دی برکات نیں اتے سپریم لیڈر ہوراں نے ایسے لئی احمدی نژاد نوں چوناں توں باہر رکھیا سی کیونجے احمدی نژاد جے چوناں وچ رلدا تے رئیسی دی گڈی نہیں چڑھنی سی۔ایران وچ امریکہ تے مغرب نال لڑائیاں مکاندے تے ایران نوں مڑ عالمی تنہائیاں توں کڈہن والے معاہدے بعدوں جنہاں ایرانیاں جشن منایا سی کیہہ اوہ سب مغرب دے ایجنٹ سن؟اج ٹرمپ چاہندا ہے کہ ایران دے معاہدے توں نکلن دا راہ لبھے اتے ایہہ ماحول اوس نوں ’’پاسداران‘‘ ہی دے سکدے نیں۔افغانستان تے عالمی حملے دا وڈا جواز طالبان ہی دوجے پاسیوں دتا سی ۔پاکستان نال اک دم ودھ گئی ٹینشن مگر وی ایہو کہانی ہے۔پاک ایران ٹینشن نوں کسے خاص ایجنڈے پاروں مارچ2016توں کس کس خراب کیتا تے کیوں کیتا، اتے اوہ کیہڑیاں قوتاں نیں جیہڑیاں ایس دوران پاک ایران ٹینشن نوں گھٹ کردیاں رہیاں ایہہ سب دے سامنے ہے۔کیہہ پاکستان وچ سعودی اتحاد وچ جاون دے خاہشمنداں دا ’’پاسداران‘‘ نال کوئی سانگا ہے؟ صدر روحانی الیکشن ڈیبیٹ وچ جداں سب اْمیدواراں نوں پچھیا کہ کون امریکہ تے مغرب نال کیتے معاہدے نوں ایران دے خلاف سمجھدا ہے تے اک امیدوار وی مخالفت نہ کر سکیا۔پر ایران دی سڑکاں تے لگے پوسٹرتے رئیسی دے حامیاں دا لٹریچر معاہدے نوں کھل عام رگید رہیا ہے۔ایس موقعہ تے سپریم لیڈر دے مغرب دشمنی دا تاثر دین والے بیانات تے یونیسکو تعلمی معاہدہ مکاون دا اعلان عام ایرانیاں نوں چکر دے سکن گے؟ ایس دا فیصلہ مئی19نوں ہو جا سی۔ذرا غور کرو، جداں توں سی پیک وچ پاک، ایران تے چین دی رلت داے مسئلے تے سانجھ پیدا ہوئی ہے تے واشنگٹن، اسرائیل،دلی تے لندن وچ’’تار‘‘کھڑکنے شروع ہو گئے۔ایہہ سانگا بہوں سارے ملکاں نوں وارا نہیں کھاندا ۔ پاکستان، افغانستان، بھارت وانگ ایرانی قدامت پسند وی اک عالمی کھیڈ دا حصہ جاپدے نیں جیہڑے خطے وچ ٹینشناں تے پلدے نیں۔یونیسکو نال چوناں توں نرا اک ہفتہ پہلاں معاہدہ توڑن والے ایہہ تاثر دین وچ کامیاب نہیں ہو سکدے کہ صدر روحانی مغرب داایجنٹ ہے۔
11 مئی نوں ایرانی حکومت نے آکھیا ہے کہ ایس نے اقوام متحدہ دے ادارہ برائے تعلیم تے سائنس و ثقافت( یونیسکو) دا تعلیمی پروگرام’’ سب لئی یکساں تعلیم‘‘مکادتا ہے۔ یونیسکو دے ایس پروگرام وچ عالمی علاقائی تے ملکی سطح تے تمام شہریاں نوں تعلیم دے مساوی مواقع فراہم کرن دا مطالبہ کیتا گیا ہے۔ یونیسکو دے تعلیم پروگرام 2030 نوں معطل کیتے جان توں بعد عالمی میڈیا وچ ایس کم نوں تہران دی عالمی معاہدیاں توں انحراف دی پالیسی بارے گل شروع ہو گئی ہے۔ایرانی میڈیا وچ رپورٹ کیتا گیا ہے کہ یونیسکو دے نال طے پاچکے معاہدہ نوں سپریم لیڈر آیت اللہ علی خامنائی دے حکم تے معطل کیتا گیا ہے۔ انہاں نے یونیسکو دے تعلیمی پروگرام تے کڑی تنقید کردے ہوئے حکومت تے یونیسکو دے درمیان معاہدے دی مخالفت کیتی ۔ سپریم لیڈر ایس وچ بیان کردہ اصولاں نوں ملک وچ مروجہ سائنسی دستاویزاں دے خلاف آکھدے نیں۔ انہاں نے حسن روحانی دی حکومت نوں یونیسکو دے نال معاہدہ کرن تے تنقید دا نشانہ بنایا اتے آکھیا گھٹیا مغربی اقدار، اسلامی ایران وچ نہیں وڑ سکدیاں۔ایہہ پڑھ کے ہورے کیوں ضیا الحق یاد آندا ہے کہ اوہ اکو ساہ وچ سی آئی اے دے جہاد دا وی حامی سی، پاکستان نوں فرقہ وارانہ ونڈ ول وی لیجا رہیا سی،پاکستان وچ اسلامی قنون وی بنا رہیا سی، ورلڈ بینک دی پرائیوٹائزیشن دا مبلغ وی سی اتے مغرب دا ویری وی کہ ایہہ سب کھیڈ کوئی نواں نہیں۔ایہہ سب وچ رلتی کھڈاریاں تے اپنی اپنے ایجنڈے نیں اتے انہاں دے بھائی بند پاکستان وچ اپنے اپنے ایجنڈے رکھدے نیں۔کیہہ ایہہ سب سی پیک توں بچن دی ہشیا ر پالیسیاں دا بوتھا ہے جس وچوں کدی پاک ایران لڑائیاں نکلدیاں نیں، کدی اسلام نال محبت جاگدی ہے، کدی سعدی اتحاد وچ حاضریاں دی تڑپ ودھدی ہے، کدی غفور حیدری نوں ٹارگٹ کیتا جاندا ہے، کدی پاسداران سر چکدے نیں،ایرانی صدر اعتدال پسند روحانی اگے کلبھوشن کھڑا کیتا جاندا ہے، ات گرداں دی لڑائیاں وچ پاک ایران ٹینشن نوں ودھایا جاندا ہے، اسمبلیاں دی قرارداداں نوں پراں کر کے سعودی اتحاد وچ نوکریاں لبھیاں جاندیاں نیں، ایرانی آرمی چیف نوں وی اچانک ’’پر‘‘ لگ جاندے نیں تے امارت دی گدی تے بیٹھے رئیسی نوں غریب ایرانیاں دا خیال اونج ہی تنگ کرن لگدا ہے جنج ٹرمپ ۔یونیسکو دے معاہدے نوں توڑن مگر ایہو سیاستاں نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels