Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> عمران، ترین نااہلی کیس، غیر قنونی طریقے توں فنڈ اکٹھا کرن دے ماملے نوں پچھے سٹیا نہیں جاسکدا، سپریم کورٹ

عمران، ترین نااہلی کیس، غیر قنونی طریقے توں فنڈ اکٹھا کرن دے ماملے نوں پچھے سٹیا نہیں جاسکدا، سپریم کورٹ

وچار ڈیسک
May 6th, 2017

اسلام آباد پاکستان تحریک انصاف دے چیئرمین عمران خان تے جماعت دے سیکرٹری جنرل جہانگیر ترین دی نااہلی توں متعلق درخاستاں والے کیس وچ سپریم کورٹ دے جسٹس عمر عطا بندیال نے ریمارکس دتے نیں کہ کسی سیاسی جماعت ولوں غیر قنونی طریقے توں فنڈ اکٹھا کرن دے ماملے نوں پچھے سٹیا نہیں جاسکدا۔ چیف جسٹس ثاقب نثار نے ریمارکس وچ اک امریکی اسکالردا حوالہ دیندے آکھیا کہ سیاسی گند نوں عدالتی لانڈری وچ نہیں دھلنا چاہیدا پر معاملات عدالت وچ آچکے نیں پر اسی انہاں نوں مناسب طریقے نال لے کے چلاں گے۔ عدالت نے ایک وار فیر عدالتی احاطہ وچ بیان بازی تے برہمی دا اظہار کیتا تے چیف جسٹس آکھیا کہ عدالتی حدود وچ خیالات دے اظہار توں فریقین گریز کرن۔ عدالت دے باہر جاکے جو مرضی کرن۔ جسٹس عمر عطا نے آکھیا کہ میڈیا رپورٹنگ لئی آزاد ہے پر فریقین اپنے خیالات لئی عدالتی کاروائی نوں استعمال نہ کرن ۔ججز تے عدلیہ دی تضحیک نہیں ہونی چاہیدی ۔عدالتی کاروائی نوں پنڈولم دی طراں استعمال نہ کیتا جائے۔ چیف جسٹس میاں ثاقب نثار دی سربراہی وچ سپریم کورٹ دے 3 رکنی بینچ نے مسلم لیگ (ن) دے رہنما حنیف عباسی دی دائر کیتی گئی درخاستاں دی سماعت کیتی۔ حنیف عباسی دے وکیل اکرم شیخ نے دلائل جاری رکھدے ہوئے آکھیا کہ عمران خان نے اپنی جماعت لئی فنڈز اکٹھا کرن لئی امریکہ وچ پاکستان تحریک انصاف لائبیلٹی لمٹیڈ کمپنی (پی ٹی آئی ایل ایل سی) رجسٹرڈ کرائی جس وچ کوئی شخص اپنی ذاتی حیثیت وچ پیسے نہیں دے دے سکدا سی سگوں ایس نوں وی کمپنی دے ذریعے ہی کجھ حصہ پانا پیندا ہے۔ ایس کمپنی پاروں عمران خان نے لکھاں ڈالر اکٹھے کیتے جہناں دا کتھے وی ذکر نہیں کیتا گیا۔ چیف جسٹس نے پچھیا کیہہ ٹیکس فائلر بنن توں پہلے دی غیر ملکی جائیداد ظاہر کرنا ضروری ہے؟ تے اکرم شیخ نے آکھیا کہ کسی ٹیکس ماہر توں پُچھ کے دساں گا۔ اکرم شیخ دا آکھنا سی کہ عوامی نمائندگی ایکٹ تے سیاسی جماعتاں دے قواعد و ضوابط وچ وی ایس دی مناہی ہے کہ کوئی وی سیاسی جماعت ایس طراں فنڈز اکٹھے نہیں کرسکدی۔ ایس تے جسٹس عمر عطا بندیال نے ریمارکس دتے گئے سن ایس طراں فنڈز اکٹھا کرن دے معاملے نوں کس طراں نظر انداز کیتا جاسکدا ہے؟ انہاں نے اکرم شیخ توں پچھیا کہ کیہ ایہہ معاملہ کتھے ہور وی چکیا گیا ہے جس تے اکرم شیخ دا آکھنا سی کہ پی ٹی آئی دے ناراض رہنما اکبر ایس بابر نے ایس دے خلاف الیکشن کمیشن وچ درخاست دائر کر رکھی ہے جس دے خلاف تحریک انصاف دی قیادت نے اسلام آباد ہائیکورٹ نال رجوع کیتا ہے۔ انہاں دا آکھنا سی کہ عمران خان نے 1983 وچ ٹیکس دینا شروع کیتا سی پر 2015 تک جنے وی ٹیکس گوشوارے جمع کرائے گئے انہاں وچ کتھے وی آف شور کمپنیاں تے باہرلے ملک جائیداد دا کوئی ذکر نہیں کیتا۔ بنی گالا دی جائیداد بارے وی عمران خان دے بیانات وچ تضاد ہے ایس لئی اوہ صادق تے امین نہیں رہے۔ انہاں نے استدعا کیتی کہ تحریک انصاف دے چیئر مین نوں نااہل قرار دتا جائے۔ اکرم شیخ نے دلائل جاری رکھدے ہوئے آکھیا کہ پچھلے روز عدالت نے میڈیا تے بیان بازی توں روکیا سی پر تحریک انصاف دے رہنما نعیم الحق نے عدالت دے باہر میڈیا نال گل کیتی۔ جس تے چیف جسٹس دا آکھنا سی کہ جے اینج ہے تے فیر ایہہ بد قسمتی ہے۔ عدالتی حدود وچ خیالات دے اظہار توں فریقین گریز کرن عدالت دے باہر جاکے جو مرضی کرن۔ اکرم شیخ نے آکھیا کہ میرے موکلاں دا اک سال توں میڈیا ٹرائل ہورہیا ہے جس تے چیف جسٹس نے آکھیا کہ کیس دی سماعت توں متعلق وکلا چاہن تے گل کرسکدے نیں۔ جسٹس عمر عطا بندیال نے آکھیا کہ میڈیا رپورٹنگ لئی آزاد ہے پر فریقین اپنے خیالات لئی عدالتی کاروائی نوں ا ستعمال نہ کرن ۔ ججز تے عدلیہ دی تضحیک نہیں ہونی چاہیدی۔ عدالتی کاروائی نوں پنڈولم دی طراں ورتیا نہ جائے۔ اکرم شیخ نے آکھیا کہ حنیف عباسی غیر متعلقہ شخص نہیں درخاست گزار نیں۔ جسٹس عمر عطا دا آکھنا سی کہ سیاستدان عدالتی کاروائی نوں اپنی تشہیر لئی ستعمال نہ کرن۔ اکرم شیخ نے آکھیا کہ سنگین غداری کیس وچ میری تکہ بوٹی بنان دی گل کیتی گئی ۔میرے بچیا ں نے مینوں عدالت آن توں روک دتا سی۔ چیف جسٹس نے آکھیا کہ اللہ نہ کر کے ایسی کوئی آفت آئے باہمی احترام سب لئی لازم ہے۔ انہاں نے آکھیا کہ سیاسی معاملات آہستہ آہستہ عدالت وچ آرہے نیں۔ ایس دوران پی ٹی آئی دے وکیل انور منصور نے آکھیا ہے کہ اپنے کیریئر وچ کدی زیر التوا مقدمات تے گل نہیں کیتی۔ چیف جسٹس نے آکھیا کہ اداریاں دی بقا لئی ایسی پابندیاں لائیاں۔ مقصد صرف ایہو سی کہ عدالتی کاروائی دا احترام کیتا جائے۔ اکرم شیخ نے سوالات چکے کہ کیہ عمران خان نے غیر قنونی ذرائع نال فنڈنگ نہ لین دا جھوٹ بولیا؟ کیہ آف شور کمپنی چھپان تے عمران خان صادق تے امین نیں؟ کیہ بنی گالا اراضی نوں تحفہ آکھن تے عمران خان ٹیکس چوری دے مرتکب ہوئے؟ کیہ متضاد بیانات تے عمران خان نوں ناہل نہیں ہونا چاہیدا؟ کیہ عمران خان ٹیکس ایمنسٹی اسکیم دا غلط فیدہ چک کہ فراڈ دے مرتکب نہیں ہوئے؟ ایس موقع جسٹس فیصل عرب نے پچھیا کہ تساں انتخابی قنوناں دا حوالہ دے کے ایم این اے دی نااہلی چاہ رہے ہو۔ کیہ عمران خان دی کامیابی نوں حنیف عباسی نے چیلنج کیتا سی؟ جس تے اکرم شیخ نے آکھیا کہ بعض وجوہات دی بنا تے انہاں دی کامیابی نوں چیلنج نہیں کیتا پر عدالت نے سیاسی رہنماواں دی اسکروٹنی دا عمل شروع کیتا۔ جسٹس فیصل عرب نے آکھیا نااہلی لئی سپریم کورٹ دا فورم کیوں استعمال کیتا جارہیا ہے؟ اکرم شیخ نے آکھیا کہ عمران خان ملک دشمناں توں فنڈنگ لیندے نیں۔ جسٹس فیصل عرب نے آکھیا کہ عمران خان دے اک ایم این اے دے اڈ پی ٹی آئی دے سربراہ نیں۔ امریکا وچ پی آئی ٹی ایل ایل سی کمپنی دے 2 ڈائریکٹرز پاکستانی تے 5 امریکی شہری نیں۔ چندہ اکٹھا کرکے پی ٹی آئی ایل ایل سی نوں دتا جاندا سی۔چندہ دین والیاں دی شناخت چھپاون لئی ایل ایل سی کمپنی استعمال کیتی جاندی سی۔ جسٹس عمر عطا بندیال نے آکھیا کہ کیہ ایہہ غیر قنونی ذریعہ آمدنی ہے؟ غیر قنونی ذرائع توں فنڈنگ دے ثبوت وی دینا ہون گے جس تے اکرم شیخ نے آکھیا کہ ایس ضمن وچ عمران خان دا تحریر کردہ معاہدہ پیش کرسکدا ہاں۔ 30 اکتوبر 2015 نوں پی ٹی آئی ایل ایل سی توں 90 ہزار ڈالر پاکستان گھلے گئے، فنڈ ین والے پاکستانی نہیں۔ جسٹس فیصل عرب نے آکھیا کہ دستاویزات وچ ہن تک ایسا کجھ سامنے نہیں آیا۔ اکرم شیخ نے آکھیا کہ محدود وسائل وچ ویب سائٹ توں جو مواد ملیا اوہ عدالت دے سامنے پیش کردتا ہے۔ کیس غیر معمولی ہے ایس لئی تفصیلی دلائل دے رہیا ہاں۔ جسٹس عمر عطا نے سوال کیتا کہ کیہ ایہہ معاملہ صرف الیکشن ٹریبونلز دے سامنے چکیا جاسکدا ہے۔ اکرم شیخ نے آکھیا ایسے سیاسی معاملات وچ حکومتاں ایہو جہیے اقدامات توں گھبراندیاں نیں۔ اک سال دھرنے نے حکومت نوں مفلوج کیتی رکھیا۔ پی ٹی آئی دے خلاف کوئی کاروائی نہیں چاہندے صرف جھوٹ بولن تے عمران خان دی نااہلی چاہندے ہاں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels