Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> صوفی مشال شہید کیس: سپریم کورٹ وچ اک ہور لمی ڈیٹ پئے گئی۔ عمران لئی امتحان؟

صوفی مشال شہید کیس: سپریم کورٹ وچ اک ہور لمی ڈیٹ پئے گئی۔ عمران لئی امتحان؟

وچار ڈیسک
April 27th, 2017

مشال دی شہیدی نوں 14 دن لنگ چکے نیں۔حکمران پارٹی دے کونسلر نوں خیبر پی کے دی پلس اجے تیک نہیں پھڑیچ سکی۔کڈے ہی ملزم جج اگے مکر چکے نیں۔اک بندہ گولی مارن دے اعترافی بیان نال پلس لیائی سی پر اوہ وی مکر گیا سی۔اج سپریم کورٹ وچ مشال قتل کیس دے حوالے نال ازخود نوٹس پاروں چلن والے مقدمے نوں مڑ سنیا گیا۔ خیبر پی کے دی سرکار اج سپریم کورٹ وچ دسیا کہ اک نویں جے آئی ٹی بنا دتی ہے۔ پہلے والی جے آئی ٹی کیہ دسیا سی، اوس نوں کیوں بدلیا گیا، ایس بارے کوئی کجھ نہیں جاندا۔ ویلہ ٹپ رہیا ہے کہ ایس کیس نوں ہولے ہولے سب بھل جاون۔ نویں جے آئی ٹی وچ ملٹری انٹیلی جنس ،آئی ایس آئی تے ایف آئی اے دے افسر رلتی ہون گے۔کیہہ اک سدھے کیس نوں پلس حل نہیں کر سکدی؟ ایہہ تے آزاد پلس ہے؟ 14 دناں بعد وی پلس آکھ رہی ہے پئی اصل ملزم دا پتہ تے چل گیا ہے پر اوہ پھڑیچا نہیں گیا۔ ملزم دی شناخت ہوگئی تے اوس دا ناں ہلے وی لکویا ہویا ہے۔ پی ٹی آئی دا کونسلر وی ہلے پھڑیچا نہیں گیا۔ جس بندے نوں پہلے اصل ملزم آکھ کے سپریم کورٹ دی پیشی توں پہلاں لیایا گیا سی اوہ کون سی؟ اوس سپریم کورٹ دا وقت کیوں ضائع کیتا۔ بندے تے بندہ پھڑن دا کیہ ایہہ مطلب تے نہیں کہ کیس نوں لما کرکے خراب کیتا جائے۔ 36 پھڑیچے بندیاں وچوں 9 یونیورسٹی دے ملازم نیں۔نرے چھ ملزماں اقبالی بیان دتے نیں جج ہوراں اگے۔ کجھ دن پہلاں یونیورسٹی دے سپریڈنڈنٹ ،اک ہور ملازم تے اک ہور طالب علم نوں جوڈیشنل ریمانڈ تے گھلیا گیا ہے۔ جس نوں جج اگے پیش کردے نیں اوہ مکر جاندا ہے۔ خیبر پختونخوا سرکار ایس کیس نوں اہمتیاں دین نوں کیوں تیار نہیں؟ اج دی تریخ تک صوبائی وزیر اعلیٰ مشال دے گھر نہیں گیا۔ایہہ اک پیغام ہے جیہڑا قاتلاں نوں دتا جارہیا ہے۔ لگدا ہے پی ٹی آئی دی صوبائی تے مرکزی قیادت وچ ایس مسئلہ تے اختلاف نیں۔ صوفی مشال دا کیس عمران خاں لئی نواں امتحان بن چکیا ہے۔ سوشل میڈیا تے پلس دے افسرلوکاں نوں اکسان والیاں وچ رلتی ہون بارے وی ویڈیو چل رہی ہے۔جے اوہ ویڈیو غلط ہے تے خیبر پی کے دی سرکار نوں اوس بارے بولنا چاہیدا سی۔ خیبر پی کے دی آزاد پلس پی ٹی آئی دے کونسلر نوں 14 دناں توں پھڑیچ نہیں سکی۔قصور پلس دا ہے یا انہاں تے صوبائی سرکار دا پریشر ہے؟ جے ایہہ سندھ سرکار دا مسئلہ ہوندا تاں عمران خان طوفان کھڑا کردینا سی۔ پر ہن اوہ کونسلر بارے بولدے وی نہیں۔ صوفی مشال نوں 13 اپریل دے دیہاڑ شہید کیتا گیا سی۔ میڈیا دس ارب دا مسئلہ چک رہیا ہے پر صوفی مشال بارے ہن خبراں گھٹ نیں۔ مشال دا قتل ریاست دی کمزوریاں دی زندہ علامت ہے اتے 15 دن بعد سپریم کورٹ وچ خیبر پی کے پلس کوئی نواں بہانہ لے کے آئے گی۔ سپریم کورٹ وچ تِن ججاں دا بنچ چیف جسٹس ثاقب نثار ہوراں دی آگوائی وچ ایس کیس نوں آپ ویکھ رہیا ہے۔ایہہ اک وڈی گل ہے۔ چیف ہوراں آکھیا ہے پئی ا ساں مداخلتاں تے نہیں کرنا چاہندے پر تہانوں کھوج جلدی مکمل کرلینی چاہیدی ہے۔ 15 دن بعد پلس کیہ آکھدی ہے ایس بارے کجھ پتہ نہیں۔ڈی پی او مردان ڈاکٹر سعید ہوراں دسیا ہے کہ اشفاق خلجی تے فاضل رازق ورگے ملزماں دی شناختاں سی سی ٹی وی کیمریاں نال ہوئیاں سن۔ اشفاق خلجی مشال نوں کوئی وڈی شئے سر وچ ماردے نظر آرہیا ہے۔ ایہوں نہیں سگوں مشال دی لاش نال وی بے حرمتی کردے ہوئے ویکھیا جاسکدا ہے۔ 23 سالہ مشال نو انصاف کد ملے گا؟ خیبر پی کے دی سرکار، خیبر پی کے دی پلس تے پی ٹی آئی دے وڈکے عمران خان لئی ایہہ اک وڈا سوال ہے؟


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels