Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> سینیٹ نوں راحیل شریف دی نویں نوکری تے سعودی اتحاد بار دساں گے۔ خواجہ آصف

سینیٹ نوں راحیل شریف دی نویں نوکری تے سعودی اتحاد بار دساں گے۔ خواجہ آصف

وچار ڈیسک
April 23rd, 2017

ایس مسئلے توں پراں ہٹن لئی اج کل پی پی پی تے پی ٹی آئی ’’خلافت لہر‘‘ شروع کر رکھی ہے۔خاں ہوری قرارداد لیانا بھل چکے نیں تے شیریں مزاری چپ۔پر این او سی ملن تے راحیل شریف دی سعودی عرب روانگی بعدوں خبراں مڑ گرم۔انہاں خبراں پاروں دفاعی وزیر آکھیا ’’جداں سانوں جی ایچ کیو توں منظوریاں آیاں فیر اساں این اوسی جاری کیتا۔۔۔میں اپنے وعدے تے کھلوتا ہاں اتے سینیٹ نوں سارے تفصیلاں دساں گا۔۔۔ہورے مئی وچ ایس اتحاد دااجلاس ہو رہیا ہے اتے اوس توں بعد ہی میں ایس بارے سینیٹ نوں بریفنگ داں گا۔‘‘اپریل مک رہیا ہے تے ہلے وی اتحاد دی میٹنگ بارے سرکار نوں پک نہیں۔البتہ ایہہ خبر آئی ہے کہ ایس اتھاد وچ رلتی ملکاں دی گنتری34توں41ہو چکی ہے۔دوجے پاسے دنیا دی نظر سعودی عرب وچ ہون والی تبدیلیاں تے وی ہے کہ انہاں دا اگلہ ہدف کیہہ ہے؟آندے نے ایس سعودی اتحاد دا موڈھی محمد بن سلمان بن عبدالعزیزآل سعود ہے جیہڑا ایس ویلے دنیا دا سب توں نکی عمر وچ بنن والا دفاعی وزیر ہے۔عرب نیوز تے واشنگٹن پوسٹ دے مضموناں وچ اوسدے بارے بہوں کجھ چھپ رہیا ہے۔اوس دا آکھنا ہے پئی اساں1979توں جاری سرد جنگ نوں مکانا چاہندے ہاں۔۔پر اساں روس نوں ایران مگر لک کے وار نہیں کرن دواں گے۔حیرن کن گل ہے پئی اوس نے اسرائیل دے قیام بعدوں خطہ وچ شروع ہون والی سرد جنگ دا ذکر نہیں کیتا تے پورا سچ لکوئی رکھیا۔ سلمان ہوری ٹرمپ نوں مل کے آئے نیں اتے سعودی عرب وچ ویژن2030 پراجیکٹ دے راکھے نیں۔انہاں اپنا خیال تے دس دتا پر سوال ایہہ ہے کیہہ پاکستان وی اینج ہی سوچدا ہے؟ اج ڈان وچ سعودی ڈیفنس وزارت دے بلارے جنرل اصیری دا ’’وال سٹریٹ جرنل‘‘ نوں دتا بیان وی چھاپیا ہے جس وچ انہاں دسیا ہے کہ ایہہ اتحاد نرا القائدہ تے دولت اسامیہ خلاف نہیں سگوں ممبر ملکاں دے باغیاں نوں فکس کرن دے حوالے نال وی کم کر سی۔تہران نیوز دے لکھاری علی خشکی اک مضمون لکھیا ہے جس دی سرخی ہے ’’پاکستان دے سپیکر اسمبلی ایران وچ تے راحیل شریف سعودی اتحاد دی کمانڈ سبنھالن وچ مصروف۔کیہہ پاکستان روس نوں ڈکن والی سرد جنگی پالیسی مڑ چلانا چاہندا ہے؟ پاکستان دی تنوں سیاسی جماعتاں ایس پرانی پالیسی تے تنقیداں کردیاں نیں پر اج اوہ سب خموش نیں۔خواجہ ہوراں راتی کامران خان دے پروگرام وچ ایہہ وی دسیا کہ میں تے اج ہی ساری گل کرنا چاہندا ساں پر سینیٹ دااجلاس ہی ملتوی ہو گیا۔کیہہ رضا ربانی انہاں نوں فیر موقعہ نہیں دین گے؟


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels