Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> قومی اسمبلی تے سینیٹ شہید صوفی مشال دے نال: قنون بدلو، بیانیہ بدلو

قومی اسمبلی تے سینیٹ شہید صوفی مشال دے نال: قنون بدلو، بیانیہ بدلو

وچار ڈیسک
April 18th, 2017

صوفی مشال دی شہیدی رنگ لے آئی تاں پاکستان دی پارلیمانی، آئینی،عدالتی تریخ بدل سکدی ہے۔گستاخی رسولؐ دا غلط الزام لاون اتے قنون ہتھ وچ لین والیاں نوں ریاست دی رٹ دسن دی لوڑ ہے کہ ہر کسی نوں قنون دا احترام کرنا لازم ہے۔ملک پاکستان اندرجو کم 5جولائی1977توں شروع ہویا سی اج اوس خلاف سیاستداناں وچ سانجھ نظر آن لگی ہے۔
پیر نوں سنیٹراں قنون دے غلط استعمال نوں روکن اتے قنون ہتھ وچ لین پاروں قنون وچ نویں ترمیم بارے مطالبے کیتے سن۔اج قومی اسمبلی وچ سانجھی قراداد پاروں سیاستداناں اپنا قبلہ درست کر کے ثابت کیتا کہ انہاں دا ہتھ عوام دی نبض تے ہے۔ اپوزیشن لیڈر سید خورشید شاہ ایس مسئلہ تے سب سیاستداناں نوں رلن دا مشورہ دتا تانجے سدھا پیغام جائے۔ایس توں بعد انہاں قرارداد پیش کیتی تے اوس دی سارے ہاوس حمائیتاں کیتیاں۔صوفی مشال خاں شہید دے وقوعے توں بعدقنون دے غلط استعمال نوں ڈکن دے مطالبے وچ تیزیاں آنیاں لوڑی دیاں سن۔ جیہڑا غلط الزام لائے اوس نوں وی اوہی سزا ملنی چاہیدی ہے۔ فرحت اللہ بابر آکھیا کہ مذہبی قیادت وی ایسی ترمیماں دے حق وچ ہے۔ مشال خان دے کیس بعدوں ہن سانوں قنون دے غلط استعمال نوں ڈکن لئی نظر آون والے قدم چکنے ہون گے۔ مسلم لیگ (ن) دے سینٹر جنرل (ر) عبدالقیوم ہوراں وی گستاخی رسول دے قنون وچ گھاٹیاں بارے گل کیتی۔ جماعت اسلامی دے سراج الحق وی قنون دی حکمرانی تے عمل کرن دی گل کیتی۔ انہاں مشال دے قتل نوں اک وحشیانہ عمل آکھیا اتے ایس نوں رگیدیا۔سینیٹ وچ بحثاں مکاندے ہوئے داخلہ دے وزیر مملکت بلیغ الرحمن ہوراں آکھیا کہ وزیراعظم سمیت ہر وڈے لیڈر نے مشال خان دے قتل دی مذمتاں کیتیاں نیں۔ انہاں دسیا پئی رواداری نوں سامنے رکھ کے نویں نصاب تے کم ہورہیا ہے۔ حیران کن گل ہے پئی 18 ویں ترمیم بعدوں نصاب صوبائی مسئلہ بن چکیا ہے تاں فیر بلیغ الرحمن ہوری کیہڑے سفنے ویکھ رہے نیں۔ ہاؤس نے پاکستان فوجداری قنون وچ ترمیماں پاروں دو قنوناں دی منظوریاں دتیاں۔سیاستداناں نوں اک دوجے تے الزام لاون دی تھاں ایہہ مننا چاہیدا ہے کہ مشال دے قتل توں دس گھنٹے تیک ریاست دا ہر ادارہ اتے میڈیا گواچی گاں وانگ سی اتے اگے کدی اجہی صورتحال پیدا نہیں ہونی چاہیدی۔انہاں دس گھنٹیاں نوں سامنے رکھ کے جے نویں پالیسی بنے گی تاں گل اگے ودھے گی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels