Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> صوفی مشال کیس: کیہہ لکایا جا رہیا ہے؟سب دے بیان آگئے مگر؟

صوفی مشال کیس: کیہہ لکایا جا رہیا ہے؟سب دے بیان آگئے مگر؟

April 16th, 2017

مردان وچ لوکاں نوں لے کے یونیورسٹی وڑن والا کونسلر عارف تحریک انصاف دا مقامی لیڈر ہی نہیں سگوں انصاف سٹوڈینٹ فیڈریشن دا عہدیدار وی ہے۔صوبائی پلس جے غیر جانبدار ہو چکی ہے تاں کونسلر ہلے تیک ’’مفرور‘‘ کیوں ہے؟ اک پاسے اوہ کونسلر ہے تے دوجے پاسے تحریک انصاف دی طلبا تنظیم ، آئی ایس ایف دا مردان دا عہدیدار۔وزیر اعلی خیبر پی کے خٹک ہوری کیوں 24گھنٹے چپ رہے ایس مگر ایہو کہانی ہے۔کونسلر ، یونیورسٹی انتظامیہ تے کالو پنڈ دے مولوی تیک کیہڑا نیٹ ورک کم کر رہیا ہے ایس بارے دھیان دین دی لوڑ ہے۔ہن تیک دی خبراں وچ دسیا گیا ہے پئی 20 بندیاں دی شناختاں ہو چکیاں نیں تے انہاں وچوں15 پھڑیچے گئے نیں۔ست توں وادھو یونیورسٹی دے ملازم نیں جنہاں وچوں اک پختون سٹوڈینٹ فیڈریشن دا مقامی سابقہ لیڈر وی ہے۔اید دا ناں اجمل معیار ہے اتے اوہ یونیورسٹی وچ آفس اسٹنٹ وی ہے تے کلرک ایسوسی ایشن داعہدیدار وی۔ایہہ گورنمنٹ پوسٹ گریجوایٹس کالج مردان وچ پختون سٹوڈینٹ فیڈریشن دا عہدیدار رہ چکیا ہے۔ اوس نوں کدوں بھرتی کرایا گیا سی تے کس کروایا سی ایس بارے ہلے خموشی ہے۔ سپریم کورٹ سو موٹو لے لتا ہے ۔پہلے 19گھنٹے کیوں خموشی رہی؟ ہر گل تے تبصرے کرن والے سول تے غیر سول ٹوئیٹر اکاوئنٹ چپ رہے؟ ایس بارے وی جھات پاون دی لوڑ ہے؟مشال بارے گمراہیاں والی خبراں پھیلان دا کم اج وی جاری ہے۔ریاست دی رٹ دی گل کرن والے کتھے رہ گئے سن پہلے19گھنٹیاں وچ؟ مشال دا قتل اک اشارہ ہے کہ سیاسی قیادت، سول سوسائٹی تے فوجی اداریاں نوں ’’رد الفساد‘‘ محلیاں، یونیورسٹیاں تے سرکاری دفتراں وچ چلانی پئے گی۔کوئی ادارہ اکلا ایہہ کم نہیں کر سکدا پر ایس کم نوں صوبائی تے قومی اسمبلیاں دی چھتری ہونی وی لوڑی دا ہے تے عدالتی انصاف نوں وی ایس دا حصہ ہونا چاہیدا ہے۔ایہہ سب توں اہم تے فوری کرن والا کم ہے کہ پبلک پرائیوٹ یونیورسٹیاں تے دوجے اداریاں وچ اک مائنڈ سیٹ بہوں تگڑا بیٹھا ہے۔سفورا ویلے اسی نہیں سوچیا سی تے مردان ہو گیا۔پنجاب وچ تعلیم نال جڑے اک وڈے ادارے وچ کم کردے افسر تے مشال وانگ دا جعلی کیس بنایا گیا سی ۔علما بورڈ نے اوس کیس نوں جعلی قرار دے کے غلط الزام لاون والیاں خلاف کروائی دا آکھیا سی پر اوہ کاروائی اج تیک نہیں ہوئی۔اوس بندے نوں اج وی تنگ کرن والے وادھو پر غلط الزام لاون والیاں خلاف کسے کجھ نہ کیتا۔ جے ریاست غلط الزام لاون والیاں تے قنون نوں ہتھ وچ لین والیاں خلاف کجھ نہیں کرے گی تاں ’’مردان‘‘ ہوندے رہن گے۔عبداللہ تے زبیر مشال دے اوہ سجن جنہاں خلاف یونیورسٹی والیاں اک غلط الزام لایا؟ ایس بارے سچ کیوں نہیں دسیا جا رہیا؟عبداللہ دی حالت کیسی ہے ؟ زبیر نوں تحفظ کون دے گا؟ ایہہ سب سوال ہی نیں۔ ہر فرقے ، قومیت،صوبے تے ادارے وچ تکفیری ذہن موجود،ریاست دی رٹ لاغر ،بیانات لیٹ ضرور آئے پر بیاناں دا آونا اک چنگی گل، ریاستی اداریاں وچ وی ہل جل، وڈی عدالت دا نوٹس لینا وی ٹھیک، پر جے گل نری سزاواں تیک رہی تے مائینڈ سیٹ تے نرسریاں نوں ٹارگٹ نہ کیتا گیا تاں اگلا مردان کتھے وی بن سکدا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels