Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> کلبھوشن دی پھانسی، پریشر یا دودھاری تلوار؟

کلبھوشن دی پھانسی، پریشر یا دودھاری تلوار؟

April 11th, 2017

پاکستان، بھارت، بنگلہ دیش، ایران تے سعودی عرب وچ پھانسیاں دے شوقین وادھو، ویسے تے صدام حسین دی پھانسی تے جنج مغربی میڈیا خش ہویا سی اوہ وی سب نوں بھلیا نہیں۔ پاکستان وچ فوجی عدالتاں دی مخالفتاں کرن والے وی کلبھوشن دی پھانسی تے راضی اتے بی جے پی نوں ہندو بنیاد پرست آکھن والے کلبھوشن دے مسئلہ تے بھارتی سرکار دے نال، کہ ایہہ گل پکی پئی جے امن لئی گل بات ہو رہی ہوندی تاں اجہے بھیڑے حالات نہ ہوندے۔کون ہے جیہڑا مسلسل گل بات توں دوڑ رہیا ہے ایس بارے سب جاندے نیں۔ اج بھارتی وزیر خارجہ سشما سوراج وی بیان دے ماریا اتے آکھیا پئی کلبھوشن بھارت دا پتر ہے اتے اساں اوس نوں بچاون لئی کسے وی حد تک اپڑاں گے۔اپنے گھر بیٹھ کے تڑیاں لانا قوم پرستی دا کوڑ رنگ کہ جنگاں دی تھاں اج سب سرکاراں گل بات راہیں چلدیاں نیں۔ جے بھارت ہٹ دھری نہ وکھائی ہوندی تاں گل ہور ہونی سی۔ دوناں ملکاں وچ اجہے بندے وادھو نیں جیہڑے ا من گل بات دے اکا خلاف نیں۔ ملٹری کورٹ پھانسی دی سزا تے دے دتی ہے پر ہلے مقدمہ سپریم کورٹ جاسکدا ہے۔ مقدمہ کڈا تگڑا ہے ایس بارے تے سپریم کورٹ جاکے ہی پتہ چلے گا۔ پاکستان وچ دفاع دے وزیر دا آکھنا ہے پئی جو کجھ ہو رہیا ہے اوہ قنون دے مطابق ہے۔
پاکستان دی اندرونی سیاستاں وچ ایس مسئلہ نوں کنج ورتیا جائے گا ایہہ وی اک وکھرا سوال۔ ضیا الحق توں مشرف تیک ’’غداراں‘‘ نوں اندرونی لڑائیاں پاروں ورتن دی تریخ وادھو ہے۔بھٹو دور وچ جنہاں نوں سپریم کورٹ غدار آکھیا سی انہاں نوں قومی اتحاد دی بھٹو مخالف لہر وچ رلتی کروان لئی جیل وچ ملاقاتاں دا احوال چھپ چکیا ہے۔اینج ہی مشرف نیں اوس ایم کیو ایم نوں گل لائی رکھیا سی جس دا آگو بھارت جا کے پاکستان بنن خلاف تقریراں کردا رہیا سی۔
نیپال وچ سابق رٹائر کرنل دا پھڑیا جانا وی جوابی کاروائی ہوسکدی ہے۔ جداں سشما ہوراں کولوں پارلیمنٹ وچ پچھیا گیا کہ تساں ہن کیہ کروگے تے انہاں آکھیا اساں کلبھوشن یادیو لئی وڈے وکیلاں نوں رکھاں گے۔ اگلا سوال ایہہ سی کہ تسی پاکستانی سپریم کورٹ جاؤ گے؟ انہاں جواب دتا پئی اساں سپریم کورٹ وی جاواں گے تے پاکستان دے صدر کول وی جاواں گے۔ بھارتی لوک سبھا وچ داخلہ دے وزیر راج ناتھ سنگھ کلبھوشن دی پھانسی نوں بین القوامی قنون دی خلاف ورزی آکھیا۔ سوال تے ایہہ ہے پئی جداں ا من لئی گل بات ہوئے گی نہیں تے اجہے کم کرن دی گنجائش تے وادھو ہوسی۔ اج ہی کشمیر دے سابق وزیر اعلیٰ بھارتی ریاست نوں آکھیا ہے کہ تسی کشمیر توں فارغ ہورہے ہو اتے کشمیری لوک دلی دی سرکار دے نال نہیں۔ اک کلبھوشن تے کہانیاں وادھو کہ ایس لڑائی توں دوناں ملکاں نوں گل بات ول موڑنا پہلا قدم۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels