Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> معراج محمد خان دی یاداں:لہور وچ پروگرام

معراج محمد خان دی یاداں:لہور وچ پروگرام

وچار ڈیسک
February 18th, 2017

معراج محمد خان دی یاد وچ لہور دے الحمرا ہال وچ اک بھرواں اکٹھ11 فروری نوں ہویا سی۔ ایس اکٹھ دی پردھانی معراج دے پرانے ساتھی ارشد بٹ ہوراں کیتی۔ ارشد بٹ ہوراں معراج بارے اک کتاب وی مرتب کیتی ہے جس وچ بہوں سارے لوکاں دیاں لکھتاں وی نیں۔ ایہہ پروگرام ایسے کتاب دی مکھ دکھالی وی سی۔ ایس اکٹھ وچ وچ کھبے دے بہوں سارے پرانے ورکر آئے سن جیہڑے اج مختلف سمتاں دے مسافر نیں۔ ویسے تے معراج آپوں وی مختلف سگوں اک دوجے نال ٹکرا ندی سمتاں وچ چلدے چلدے رہے پر ہمیشہ انہاں دی نظر’’ عوامی مفاد‘‘ تے رہی اتے انہاں سیاستاں توں مال اوس دور وچ وی نہ کمایا جدوں ایہہ رواج دا حصہ بن چکیا سی۔ این ایس ایف دے اک پرانے لیڈر اتے پیپلز پارٹی وچ کم کرن والے سیف اللہ سیف نے ایہو گل جدوں سٹیج توں کیتی تاں چوہدری اعتزاز سنے سب مجماناں دروٹ لتا۔ انہاں آکھیا اج حکومتی درباراں اتے اپوزیشن جماعتاں سب وچ کرپٹ بندے اگے اگے نیں۔ سیف ہوراں معراج محمد خاں دی تعریفاں وی کیتیاں اتے پیپلز پارٹی نوں چھڈن تے انہاں تے تنقیداں وی کیتیاں۔ انہاں دا آکھنا سی اج سیاست پچھاں نوں جارہی ہے تے پجارو کلچر اگے اگے ہے۔ ہال وچ کھبے دے پرانے لوکاں توں اڈ پیپلز پارٹی تے تحریک انصاف دے کارکن وی بیٹھے سن پرانہاں دی ایس گل تے سب تالیاں ماریاں۔ ارشد بٹ ہوری اوہی گل کیتی جیہڑی انہاں ایس کتاب دے دبیاچے وچ وی لکھی ہے۔ انہاں ایوب یحیٰ تے ضیا خلاف معراج دی جدوجہداں دا ذکر کیتا پر آخری ڈکٹیٹر مشرف دا ذکر نہ کیتا۔ بٹ ہوراں تے آپ اوس ویلے معراج نوں چھڈیا سی جدوں اوہ مشرف نوں ملن وی ٹر گئے سن۔ بٹ صاحب حاضرین نوں بنتی کیتی پئی اج مختلف خیال تے جماعتاں دے لوک ہال وچ بیٹھے نیں تے کوئی اختلافی گلاں نہ کرے۔ پر ایس تے زیادہ دھیان نہیں دتا گیا۔ سابق جج اتے این ایس ایف دے پرانے کارکن حبیب اللہ شاکر ہوراں دسیا پئی اساں پیپلز پارٹی وچ رلتی ہون توں بعد این ایس ایف وچ آئے ساں۔ انہاں معراج دے اوہناں کراچی دے ساتھیاں دے ناں وی گنوائے جیہڑے ایم کیوایم دی رابطہ کمیٹی تیک گئے۔ انہاں اپنے گھاٹیاں وادھیاں بارے وی گل کیتی۔انہاں اپنے آپ نوں رلتی کردے ہوئے آکھیا پئی اساں ماضی وچ نظریاتی ہوندے ساں پر اج کل اساں ’’ضروریاتی‘‘ ہاں۔ضیا نے معراج دے انکاری توں بعد الطاف حسین نوں لیڈر بنایا سی۔ضیا معراج نوں اْردو والیاں دا لیڈر بنن اتے بھٹو خلاف کم کرن دا آکھیا اتے وزارت وی پیش کیتی پر معراج انکار کر دتا۔ لال خاں ہوراں معراج دے 1972 وچ پیپلز پارٹی نوں چھڈن نوں وڈھایا اتے آکھیہ پئی جدوں بھٹو اقتدار وچ آکے انقلاب پورا کرن توں مڑگیا تاں معراج وزارت نوں لت ماردتی۔ پر اوہ ایہہ گل نہ دس سکے پئی بھٹو کوئی وعدہ وی کیتا سی یا تساں اپنے ذہن وچ جس انقلاب دا سوچیا ہویا سی اوہ بھٹو توں پورا کروانا چاہندے سو۔ کجھ تقریراں وچ 1970 دی چوناں توں پہلاں ہون والی ہالہ کانفرنس وچ معراج دے نقطہ نظر دی گل وی کیتی گئی پئی معراج اوس ویلے تیک طفیل عباس دے کمیونسٹ گروپ نال سن اتے گروپ چوناں دے خلاف سی۔ تاں مارے ’’پرچی‘‘ دی تھاں ’’برچھی‘‘ یعنی مسلح انقلاب دی گلاں ہوندیاں سن۔ پر بھٹو ہوراں پرچی دا رستہ اپنایا۔ بقول خواجہ سلیم(معراج دے پرانے سجن) اساں معراج نوں چوناں وچ کھڑے ہون تے راضی کرلتا سی پر فیر طفیل عباس گروپ ولوں معراج دے وڈے بھرا منہاج برنا نے انہاں نوں چوناں لڑن والے کاغذات واپس لین تے مجبور کردتا۔اوس ویلے معراج جیل وچ سن اتے یحی خانی دور سی۔ کھبے دے بیانیے وچ اک وڈا گھپا ایہہ سی پئی اک پاسے اوہ فوجی آمراں دے خلاف اتے جمہوریت دے حمائیتی تے دوجے پاسے ’’برچھی‘‘ دے وی طرفدار۔خواجہ ہوری آکھدے نیں پئی ملکی پدر تے صوبائی تے قومی اسمبلیاں دی چوناں دی مخالفتاں کرن والے پڑھیاراں، استاداں، مزدوراں تے صحافیاں دی چوناں وچ رلتی رہندے سن۔کیہہ اوہ ایہہ سمجھدے سن پئی وڈی اسمبلیاں وچ جاون والے پارٹی دے قابو وچ نہیں رہن گے؟ معراج دے پرانے سجن حسین نقی ہوراں وی معراج دے تحریک انصاف تے مسلم لیگ (ن) وچ جاون تے تنقیداں کیتیاں۔ سٹیج تے سنن والیاں وچوں آواز آئی پئی اوہ مسلم لیگ (ن) وچ کدی نہیں گئے۔ ایس تے نقی ہوراں اپنے انداز وچ آکھیا پئی اوہ جدوں رائے ونڈ گئے سن اوس توں پہلے اوہ میرے کول ماڈل ٹاؤن آئے سن اتے فیر اتھوں ہی رائے ونڈ گئے سن۔ ویسے 1980 دے دہاکے دے اخیری سالاں وچ شہباز شریف نال ملاقات دی کہانی معراج دے پرانے ساتھی خواجہ سلیم وی سناچکے نیں جیہڑے ایس ملاقات وچ رلتی سن۔معراج مسلم لیگ وچ شامل ہوئے یا نہ ہوئے پر شامل ہون یا اتحاد بناون لئی ملاقات لئی ضرور گئے سن کہ جدوں شریف بھرا آئی جے آئی چلا رہے سن۔ پر مشرف نال ملاقات تے ایس توں زیادہ بھیڑی گل سی۔ خیر نقی ہوری آئی صور تے سچے رہے۔نقی ہوراں ایہہ وی دسیا پئی میں معراج نوں 1972 وچ وزارت توں استفیٰ نہ دین دا مشورہ دتا سی جیہڑا اوس نہ منیا۔ اعتزاز حسن نے اپنا رانجھا نواز شریف تے تنقیداں کرکے راضی کیتا۔ اک ویلہ سی جداں اعتزاز ہوراں نے میاں نواز شریف دے مقدمے وی لڑدے سن اتے جمہوریت پاروں انہاں دی تعریف وی کردے سن۔اوہ مسلم لیگ(ن) تے پی پی پی وچ اک پل سن اتے انہاں نوں اوس ویلے کرپشن نظر اانا بند ہوگئی سی۔ پر ہن انہاں دا نشانہ مسلم لیگ (ن) ہی ہے۔ پروگرام دے اچیچے پروہنے سپریم کورٹ بار دے صدر رشید اے رضوی سن جیہڑے این ایس ایف دے پرانے کارکن وی رہے۔ انہاں آکھیا میں معراج دی بڑیاں عزتاں کرنا ہاں پر اوس دی اک گل میں نہیں منی سی اتے اوہ سی تحریک انصاف وچ جانا۔ تقریراں کرن والیاں دی لسٹ ایڈی وڈی سی کہ پروگرام دے پردھان ارشد بٹ وی کجھ نہ کرسکدے سن۔ سٹیج تے 19 کرسیاں لگیاں سن اتے کجھ مقرر تھلوں وی سدھے گئے۔ انہاں وچ اک ایسا مقرر وی سی جس اپنی مزدور لہر نوں ضیا الحق دی جھولی وچ پادتا سی ۔اک مقرر انقلابی نوں تے پردھان نوں جاکے دسنا پیا پئی معراج محمد خان بارے گل کرو۔ ایس تے طفیل ٹھانہ ہوراں نے ’’آف شور رقماں‘‘ بارے اپنا تھیسس لپیٹیا تے باہر آگئے۔ پروگرام دے شروع وچ ارشد منظور ہوراں اپنا پنجابی کلام سنایا جس دا اک ویڈیو کلپ تھلے لارہے ہاں۔ ایس توں اڈ سٹیج سیکٹری ہوراں اُردو وچ ہی گل بات کیتی جیہڑ اہک پرانا گھپا ہے۔ آصف خان، امجد حسین ایڈووکیٹ اتے معراج دے دوجے ساتھیاں نے انہاں نال اپنی یاداں شیئر کیتیاں۔ معراج محمد خان دی دھی رانی وی ایس پروگرام وچ رلتی سن اتے انہاں وی گل بات کیتی۔

Arshad Manzur & his Pujabi poetry
https://www.facebook.com/aamirr/videos/10154540927419032/


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels