Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> دریاواں دے پانیاں دے مسلیاں تے پاکستان سستی وکھائی۔ یو این ڈی پی

دریاواں دے پانیاں دے مسلیاں تے پاکستان سستی وکھائی۔ یو این ڈی پی

February 2nd, 2017

پاکستان دے باڈراں تے پانی حوالے جیہڑے سلسلے نیں انہاں دا تعلق انڈس واٹر ٹریٹی نال ہے اتے ایس حوالہ نال پاکستان اپنا کیس سیتیاں پاروں کمزور کیتا۔ایہہ گل اک رپورٹ وچ دسی گئی ہے پر اوہناں ایہہ نہیں دسیا پئی فوجی ڈکٹیٹر ایوب خان تے ورلڈ بینک رل مل کے جداں ایہہ کوڑ فارمولا بنا رہے سن اوس ویلے اک وڈی آواز ایس معاہدے خلاف کس چکی سی؟ پہلے تساں تازی یو این رپورٹ بارے پڑھو پھیر اوس اونترے بیورو کریٹ دی گل ہی دساں گے جہیڑا اک پنجابی سی۔ پاکستان وچ دریائی پانیاں دا مسئلہ چوڑ ہور رہیا ہے اتے مودی دے بیاناں ایس نوں ہور خراب کیتا ہویاہے۔اقوام متحدہ دے ادارے یو این ڈی پی والے اک رپورٹ سامنے لیائے نیں جس دا ناں ''Development Advocate Pakistan'' ہے۔ رپورٹ وچ لکھیا ہے پئی 90 دے دہاکے توں دریاواں توں آون والے پانی وچ گھاٹیاں بارے ڈیٹا آنا شروع ہوگیا سی۔پر ساڈے ایتھے ایس مسلہ نوں سمجھن دی تھاں سارا زور ’’انڈیا نے پانی کھول کے سیلابی صورتحال کر دتی ہے‘‘تک ہی رہندا سی۔محکمے دی گل تے کوئی سندا ہی نہیں سی۔ تازی رپورٹ وچ منیا گیا ہے پئی انڈس واٹر ٹریٹی وچ بڑے گھاٹے سن۔ خشک موسماں وچ گھٹ ہون والے پانی دی تقسیم دا سوال وڈا مسئلہ سی۔بارشاں والے موسماں اتے گرمیاں والے موسماں دے مقابلیاں وچ سردیاں وچ دریاواں دا پانی ادھارہ جاندا ہے اتے ایس موسم وچ پانی دی ونڈ دا مسلہ زیادہ وگڑدا ہے۔ دریائے چناب دی پانیاں دے حوالے نال وی ٹریٹی وچ گھاٹے سن۔ جدوں بھارت وولر تے کشن گنگا والے پانی دے منصوبے بنائے تاں دریائے جہلم دے پانیاں دی ونڈ بارے سوال اٹھے۔ ایس مسئلہ نوں پاکستان اینج نہیں چکیا جس طراں چکنا لوڑی دا سی۔ ایہہ اک وڈا مسئلہ ہے پئی جے بھارت ڈیماں وچ پانی رکھے گا تاں فیر پانی دی ونڈ کنج ہوسی۔ گلیشیراں دے حجماں وچ گھاٹے ہورہے نیں اتے اوہ بربر سکڑدے جا رہے نیں۔ موسمیاتی وٹاندرے دی گلاں عام نیں اتے ایس نال پانی دی ونڈتے بہوں بھیڑا اثر ہوسی۔ ایس سب دا اثر انساناں تے معشیناں تے خطرناک ہوئے گا۔ جے بھارت پانی بند کرن دا فیصلہ کرلتا تے پاکستان لئی ایہہ زندگی موت دا مسئلہ بن جائے گا۔ ایوبی دور وچ ہوئی انڈس واٹر ٹریٹی بھارت نوں ڈیم بناون توں ڈکدی نہیں البتہ پاکستان نوں ایہہ حق دیندی ہے کہ اوہ اپنے گھٹ ہوندے پانیاں بارے گل کرسکے۔ کجھ لوکاں پاکستان وچ عالمی واٹر ریسورس مینجمنٹ دے لیگل فریم ورک بارے گل چھوئی ہے پر زیادہ بھار اج وی انڈس واٹر ٹریٹی تے ہے۔ پانی اج اک سیاسی مسئلہ ہے۔ اتے اک پاسے پانی دے مسئلہ تے پاکستان بھارت لڑرہے نیں تے دوجے پاسے پاکستان وچ صوبیاں وچ پانی پاروں بداعتمادیاں وادھو نیں۔پرویز حسن اک سنئیر اکانومسٹ نیں اتے اوہ1956توں ایوبی دور تیک معاشی ترقی بارے اندر دی گلاں لکھیاں نیں۔انڈس واٹر ٹریٹی بارے لکھدے ہوئے انہاں دسیا ہے پئی اک وڈی میٹنگ وچ مسعود کھدر پوش ہوراں آکھیا سی اساں اپنے صدیاں پرانے واٹر ریسورسز(تن دریا، راوی، ستلج تے بیاس) عارضی واٹر ریسورسز(تربیلہ تے منگلہ ڈیم) پاروں ویچ رہے ہاں جہیڑے30،40سالاں بعدوں اپنا کم گھٹ کر دین گے، ایہہ کتھے دی دانشمندی ہے؟ پر انہاں دی گل کسے نے نہ سنی اتے جرنیل ایوب خان نے 19ستمبر1960دے دن ایس عالمی معاہدے تے دستخط کر دتے سن۔بھارت نوں گالاں کڈہن دی تھاں سانوں ایس گھٹیا عالمی معاہدے تے دستخط کرن والیاں نوں پہلے رگیدنا چاہیدا ہے اتے پھیر عالمی بینک نوں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels