Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> فوجی عدالتاں: کون، کیوں مخالفتاں کررہیا جے

فوجی عدالتاں: کون، کیوں مخالفتاں کررہیا جے

January 11th, 2017

فوجی عدالتاں بارے بحثاں اوس ویلے وی ہوئیاں سن جدوں 21 ویں ترمیم ہورہی سی۔ ایہہ بحثاں پارٹیاں دے اندروی ہوئیاں اتے میڈیا وچ وی۔ ایہہ گل اہم نہیں پئی کون مخالف ہے سگوں اہم گل ایہہ ہے کون، کون کیوں مخالف ہے؟ ایس تے اخیری فیصلہ اسمبلی وچ ہوسی، ایہہ زیادہ سیانت دی گل ہے۔جداں پالیسیاں سب دے سامنے بندیاں نیں تاں فیصلہ کجھ وی ہوئے گھٹو گھٹ ایہہ تے پتہ چل جاندا ہے پئی کس نے کہیڑی پوزیشن لتی ہے۔دوروں تے ایہہ لگدا ہے اپوزیشن ایس مسئلہ تے اک مک ہے۔،پر اوہ نرے نتیجہ تے اک مک نیں۔ مذہبی جماعتاں سمجھدیاں نے کیونجے انہاں عدالتاں وچ زیادہ تر پھڑے جان والے انہاں دے حمائیتی نیں تاں مارے اوہ ایس دی مخالف نیں۔ کجھ پختون جماعتاں دے وی کجھ ایسے طراں دے مسئلے نیں۔ کجھ لوک تے ایہہ سمجھدے نیں پئی ہر مسئلے دا حل جبر نال ہوسکدا ہے تاں مارے اوہ فوجی عدالتاں دے حق وچ نیں۔ بہوں سارے لبرل، جمہوری لوک ایہہ سمجھدے نیں پئی عدالتی بندوبست نال ہی گل اگے ودھے گی اتے ایہو اک جمہوری وطیرہ وی ہے۔ پر اوہناں نوں ایس گل دا وی پتہ ہے پئی عدالتاں تے تفتیشاں دا بندوبست ایڈا چنگا نہیں اتے اوتھے فیصلے لٹک جاندے نیں۔ پر جے پوری اپوزیشن اتے سرکارپچھلے 8 مہینیاں توں پانامہ وچ پھسی ہوئی ہے تاں فیر عدالتی یا تفتیش بندوبست نوں ٹھیک کرن تے دھیان کس نے دینا سی؟ عدالتاں تے میڈیا وی ایسے وچ پھسے نیں۔ اک مسئلہ ایہہ وی ہے کہ جے زلزیاں نوں لے کے مردم شماریاں تیک اتے کراچی آپریشن توں پھانسیاں والی سزاواں تیک ہر مسئلہ فوج حل کرنا ہے تے ایس نال کیہ تاثر بن دا ہے؟ ایہہ جیڈاسدھا مسئلہ نظر آوندا ہے ، ہیگا نہیں۔ ایہہ وی حقیقت ہے پئی کل ایہی انتہا پسند ریاست نے پالے سن۔ افغان جہاد توں انہاں نوں پالن دا سلسلہ جاری سی تے طالبان دور وچ ہور تگڑا ہویا۔ اوس ویلے ریاست دے نال مغربی دنیا وی رلی ہوئی سی۔مشرف دور وچ وی ڈبل گیم چلدی رہی۔ تاں مارے اج اوہ انہاں خلاف فوجی عدالتاں راہیں سزاواں دین دی اخلاقی پوزیشناں تے نہیں۔ ذمہ داری اوہناں دی وی تے ہے جہناں انہاں نوں پالیا سی تے پروٹیکٹ کیتا۔ ایہہ وی دلیلاں دتیاں جاندیاں نے پئی سزا تے بہوں ساریاں نوں دتی گئی سی پر عمل تے بہوں تھوڑا ہویا ۔ایس لئی ایہہ ایڈا وڈا مسئلہ نہیں جیڈا سمجھیا جا رہیا ہے۔ ات گرداں نوں قابو کرن لئی گاجر تے سوٹی نوں ورتیا جارہیا ہے۔ کریمینل جسٹس بندوبست نوں ریفارم کرن دا سوال آپدی تھاں سب دا منہ چڑاندا پیا ہے۔ سچ بولن نوں کوئی تیار نہیں۔ پارلیمنٹ وچ ایس تے بحثاں ہونیاں ویلے دی لوڑ ہے۔ پر پارلیمنٹ دے باہر وی وکیلاں، سول سوسائٹی اتے دوجے دھڑیاں نوں وی رلتی کرنا لوڑی دا ہے۔ مسئلہ نرا غیر ریاستی کھڈاریاں نوں قابو کرن دا نہیں سگوں غیر ریاستی کھڈاریاں نوں ورتن دا وی ہے۔ ایس بارے ہلے گل شروع وی نہیں ہوئی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels