Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> اقلتیاں دے ووٹ 30 لکھ توں وادھو۔ الیکشن کمیشن : ہندو، مسیحی، پارسی، بدھسٹ، احمدی تے یہودی پاکستانیاں بارے اک پڑچول

اقلتیاں دے ووٹ 30 لکھ توں وادھو۔ الیکشن کمیشن : ہندو، مسیحی، پارسی، بدھسٹ، احمدی تے یہودی پاکستانیاں بارے اک پڑچول

January 9th, 2017

پاکستانی میڈیا وچ اک خبر موجب اقلتیاں دی گنتری وچ وادھے ہورہے نیں۔ایہہ گل الیکشن کمیشن آف پاکستان دے تازے ڈیٹا نوں سامنے رکھ کے بنائی گئی جے۔ایہہ گل یاد رکھن والی ہے پئی 16 دسمبر 1971 نوں پاکستان دے ٹٹن دا سب توں بھیڑا اثر پاکستان دی مذہبی اقلتیاں تے ہویا سی۔ پاکستان بنن ویلے انہاں دا تناسب 22 فیصدی سی جیہڑا 1971 وچ ڈگ کے نرا3.5 فیصدی ہوگیا۔ مذہبی اقلتیاں دی وڈی گنتری مشرقی پاکستان وچ رہندی سی۔ پر ایہہ گل پکی ہے پئی پاکستان وچ مذہبی اقلتیاں دی اصل گنتری بارے بڑے رولے نیں۔ کیونجے انہاں دی وڈی گنتری غریب لوکاں دی ہے تاں مارے انہاں دی رجسٹریشناں ہونیاں زیادہ اوکھا کم ہوندا ہے۔ مردم شماریاں ہون یا فیر شناختی کارڈ بنوان دا کم، ایہہ سب وچ پچھے ہوندے نیں۔ شہراں وچ تے فیر وی صورتحال بہتر ہوجاندی ہے پر دور دراز دی تھاواں تے انہاں دی آبادیاں نوں گھاہ ہی نہیں پائی جاندی۔ ایس لئی ایہہ گل لوڑی دی ہے پئی انہاں دی رجسٹریشناں لئی سرکار زیادہ دھیان دے۔ الیکشن کمیشن دے ڈیٹا موجب 30 لکھ وٹراں وچوں ادھے یعنی پندرہ لکھ توں ذرا گھٹ ہندو ووٹر نیں اتے انہاں دی وڈی گنتری یعنی 13 لکھ 90 ہزار سندھ وچ وسدی ہے۔ پنجاب وچ رہن والے ہندو وٹراں دی گنتری 73 ہزار توں وادھو ہے جدکہ بلوچستان وچ 23 ہزار دے نیڑے ہندو ووٹر وسدے نیں۔ خیبر پی کے وچ 4 ہزار اتے فاٹا وچ586 ووٹر نیں۔ ہورتے ہور اسلام آباد وچ وی 188 پاکستانی ہندواں دے ووٹ رجسٹرڈ نیں۔ پاکستانی مسیحاں دے رجسٹرڈ ووٹاں دی گنتری وی ہندواں توں کوئی بہوں گھٹ نہیں۔ جے نویں مانو گنتری (Census) وچ پاکستانی مسیحاں چستیاں وکھائیاں تاں اوہ آپدے رجسٹرڈ ووٹاں نوں ودھا سکن گے۔ ہندواں دے مقابلے وچ پاکستانی مسیح نہ صرف اک تھاں یا صوبہ وچ نہیں ہیگے سگوں بہوں پھیلے ہوئے نیں اتے پاکستانی ہندواں دے مقابلے وچ پاکستانی مسیحاں وچ غریب تے مہاتڑ بہتے نیں۔ تاں مارے انہاں دی رجسٹریشناں دے ڈیٹا بارے شک کیتا جا سکدا ہے۔ ڈیٹا موجب پاکستانی مسیحاں دی گنتری 13 لکھ20 ہزار ہے۔ انہاں وچوں 10 لکھ توں وادھو پنجاب وچ نیں اتے 2 لکھ 10 ہزار خیبر پی کے، 16 ہزار بلوچستان، 1345 فاٹا اتے 30 ہزار قریب اسلام آباد وچ نیں۔ اقلتیاں نوں چاہیدا ہے پئی اوہ ضلع، تحصیلاں تے یونین کونسلاں دے حساباں نال الیکشن کمیشن توں ڈیٹا حاصل کرن تاں مارے انہاں نوں پتہ چل سکے پئی کیہڑی تھاواں تے انہاں نوں ڈیٹا صیح کروان دی لوڑ بہتی ہے اتے کس پدر دی چوناں وچ اوہ زیادہ اگڑواں کردار ادا کر سکدے نیں۔ الیکشن وچ ڈیٹا دسدا ہے پئی احمدیاں دے رجسٹرڈ ووٹ اک لکھ 20 ہزار نیں۔ پر کڈے احمدیاں آپ نوں بطور احمدی ووٹر رجسٹرڈ کروایا ہے ایس بارے مختلف خیال نیں کیونجے ایہہ برادری دوسری آئینی ترمیم نوں نہیں منیندی۔ ڈیٹا توں ایہہ وی پتہ چلدا ہے پئی سکھاں وانگ احمدیاں دا گھر پنجاب ہی ہے۔ اک لکھ 2 ہزار احمدی ووٹرنرے پنجاب وچ ہی نیں۔ احمدی تے سکھ آپدی پنجابی شناختاں نوں اولیتاں دین یانہ دین پر ڈیٹا توں انکاری نہیں ہوسکدے۔ سندھ وچ 2 ہزار، کے پی کے وچ 11 سو، بلوچستان وچ 450، فاٹا وچ 13 تے اسلام آباد وچ 2 ہزار رجسٹرڈ احمدی ووٹر نیں۔ پاکستان وچ 6 ہزار توں وادھو سکھ ووٹر وی نیں۔ حیران نہ ہونا، رجسٹرڈ سکھ وٹراں دی سب توں وادھو گنتری خیبر پی کے وچ وسدی ہے۔ سکھاں تے ایہہ ویلہ وی آنا سی، پر ڈیٹا تہاڈے ارادیاں نوں توڑ دیندا ہے۔ 1500 رجسٹرڈ سکھ ووٹ سندھ، 1150 پنجاب ،730فاٹا، 225 بلوچستان اتے ست سکھ ووٹر اسلام آباد وچ رجسٹرڈ نیں۔ انہاں ست سرداراں نوں تے کوئی انعام دینا چاہیدا ہے۔
ڈیٹا اکثر رواجی خیالاں (Mylths) نوں توڑ دا ہے تے ایہہ ڈیٹا دسدا ہے پئی ملک پاکستان وچ 1643 بدمت نوں منن والے ووٹر وی رہندے نیں اتے 900 پاکستانی یہودی ووٹر وی وسدے نیں۔ اینج ہی پارسی رجسٹرڈ ووٹراں دی گنتری وی 3743 ہے۔ ایہہ بدھ مت نوں منن والے، یہودی تے پارسی پنجاب تے سندھ وچ ہی پائے جاندے نیں۔ ساڈی سرکار نوں چاہیدا ہے پئی سب توں گھٹ گنتری والی مذہبی اقلتیاں نوں بہوں زیادہ اہمتیاں دین کیونجے ایہہ ناپید ہون والی مخلوقاں وچ آندے نیں اتے انگریزی وچ انہاں نوں endangered مخلوقاںآکھدے نیں۔ پاکستان وچ 18 سال دی عمر پاروں وٹراں دی گنتری ساڑھے اٹھ کڑوڑ توں وادھو ہے جے پاکستان وچ اقلتیاں 5 فیصدی وی نیں تاں انہاں دے رجسٹرڈ ووٹاں دی گنتری 43 لکھ توں وادھو ہونی چاہیدی ہے۔ پر کیونجے ایہہ بہوں غریب نیں اتے بہوں تھاواں تے پھیلے ہوئے وی نیں تاں مارے انہاں دی رجسٹریشناں بارے زیادہ توجہ دین دی لوڑ ہے۔ اک اندازے موجب مردم شماریاں بعدوں پاکستان وچ 2018 تیک رجسٹرڈ ووٹاں دی گنتری دس کڑوڑ توں وادھو ہوجاسی۔ ایس پاروں مذہبی اقلتیاں دے حقاں لئی لڑن والیاں لئی ایہہ وڈا امتحان ہے پئی پاکستانی مذہبی اقلتیاں دے منڈے کڑیاں آپ نوں رجسٹرڈ کروان۔ ایہہ گل وی ڈیٹا دسدا ہے پئی پاکستان دے کجھ ضلعیاں وچ غیر مسلم رجسٹرڈ ووٹاں دی گنتریاں بہوں وادھو نیں اتے جے اوہ سمجھداری نال ووٹ پاون تے اوہ اقلتیاں دے حقاں وچ لڑن والے امیدواراں (بھانویں اوہ مسلمان ہی کیوں نہ ہوئے) نوں جتوا سکدے نیں۔ پر کیونجے انہاں دی وڈی گنتری غریب، مہاتڑ ہے تاں مارے اوہ ووٹ رقماں یا دباؤ وچ دے دیندے نیں یا فیر اکا چوناں توں دور ہی رہندے نیں۔
ٹنڈوالہٰ یار، میر پور خاص، عمرکوٹ، تھرپار کر وچ تے غیر مسلماں دے ووٹر کافی زیادہ نیں پر ایس توں اڈ دوجے کئی حلقیاں وچ انہاں دا تناسب اہمیتاں رکھدا ہے۔ نرے کراچی ساوتھ وچ رجسٹرڈ غیر مسلم ووٹراں دی تعداد 81 ہزار تو وداھو جے۔ ایسے طراں چنیوٹ تے لہور ورگے ضلعیاں وچ وی غیر مسلم رجسٹرڈ ووٹراں دی گنتری وادھو جے۔ ڈیٹا تے ایہہ وی دسیا ہے پئی پاکستانی یہودیاں تے پارسیاں وچ رجسٹرڈ ووٹر ڈیٹا موجب زنانیاں دی گنتری وادھو جے۔
پاکستان بناون والیاں تے پاکستانی جھنڈے وچ چٹا رنگ رکھیا سی پر پاکستان چلاون والیاں ایس دا پاس نہیں کیتا۔ 1970 وچ پہلی چوناں ہوئیاں تے 1971 بعدوں پاکستان ترٹن نال چٹا رنگ ہور گھٹ ہوگیا۔ مذہبی اقلتیاں والیاں نوں یاد رکھنا لوڑی دا ہے پئی جہناں پاکستان توڑیا ہے اوہناں پاکستانی مذہبی اقلتیاں دے لک وچ چھرا ماریا جے۔ ایہہ گل پاکستان توڑن والے ایہہ گل بھل گئے پئی پاکستان ٹٹن بعدوں پاکستانی ہندواں، مسیحاں وغیرہ دا سب توں وادھو نقصان ہوسی۔ پاکستان دے پالیسی سازاں نوں وی ایہہ گل چیتے رکھنی لوڑی دی ہے پئی پاکستان نوں توڑن وچ وڈا کردار دو مارشلاواں اتے حکمراناں دی غلط پالیسیاں دا سی۔ اج پاکستان نوں تگڑا کرنا ہے تے اک کڑوڑ غیر مسلم پاکستانیاں نوں نال رلاون دا ویثرن ہونا لوڑی دا ہے۔ایہو گل قومی اہکشن پلان وچ وی لکھی ہے۔ ہلے اوہ سارے رجسٹرڈ ووٹر نہیں تے اوہناں دی گنتری 30 لکھ ہے۔ ایہہ 30 لکھ جوان پاکستان نوں کنج تگڑا کرسکدے نیں جے اوہ آپ ایس ملک وچ غیر محفوظ ہون گے؟ انہاں دا وڈا قصور ایہو ہے پئی اوہ غریب نیں۔ سانوں نصاباں توں لے کے ترقیاتی کماں تیک انہاں ول خصوصی توجہ دینی ہے۔ اقبال تے جناح ہمیشہ مذہبی اقلتیاں دے حقاں دی گل کیتی سی اتے اج ایسے نوں سامنے رکھن دی لوڑ جے۔میڈیا دا ایس وچ بہوں وڈا کردار ہے اتے ڈان گروپ نے آپدا حصہ پایا ہے تاں مارے اساں ایہہ سٹوری آپدے اصافیاں نال تہاڈے تیک پہنچاسکے ہاں۔میڈیانوں پاکستانی یہودیاں، بدھسٹاں،ہندواں،احمدیاں،مسیحاں تے سکھاں دی ملک تے سوسائٹی بارے خدمتاں نوں باقی پاکستانیاں نال سانجھا کرنا چاہیدا ہے۔اوہ پورے سال لئی پرائم ٹائم وچ پروگراماں تے رنگین ایڈیشناں دا سلسلہ ڈیزائن کر کے ایس ویثرن نوں ودھاندے ہوئے پالستان نوں تگڑا کر سکدے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels