Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> ماچس والا اوم پوری ٹرگیا(1950توں2017)

ماچس والا اوم پوری ٹرگیا(1950توں2017)

وچار ڈیسک
January 6th, 2017

انبالے دے پنجابی اتے مشہور فلمی ایکٹر اوم پوری ہوری نری آپدی فلماں پاروں ہی مشہور نہیں سن سگوں اوہناں ہمیش بھارت پاکستان وچ چنگے تعلقاں بارے کھل کے گل کیتی۔ ہلے کجھ دناں پہلاں جدوں بھارت وچ کم کردے پاکستانی ایکٹراں نوں دھمکیاں ملن دا فیشن پر چلت ہویا تاں ایس خلاف پہلی تگڑی تے وڈی آواز اوم پوری ہوراں دی ہی سی۔
18 اکتوبر 1950 وچ جمے ایس دلیر پنجابی سپوت نوں کئی اک حوالیاں نال ہمیش یاد رکھیا جائے گا۔ اوہ 66 سال تے 2 مہینیاں دے سن کہ دل دا دورہ پین نال ٹرگئے۔ اوہ اج کل بمبئی وچ اک فلم دی شوٹنگ وچ مصروف سن اتے راتی شوٹنگ توں واپس آئے سن پر سویرے انہاں بوہا ہی نہ کھولیا۔ شبانہ اعظمی اک ٹویٹ پاروں ایہہ دسیا پئی انہاں دی اخیری رسماں اج ہی ہون گیاں۔ اوم پوری ہوراں پاکستانی فلم ’’ایکٹر ان لاء‘‘ وچ وی کم کیتا اتے اوہناں دا آکھنا سی مینوں ہمیشہ پاکستانیاں ولوں بہوں پیار ملیا بھانویں اوہ پاکستان وچ رہن والے پاکستانی ہون یا فیر پاکستان توں باہر، دوجے ملکاں وچ۔ مشہور فلم ’’چارلی ولسن دار‘‘ وچ ضیا الحق دا کردار کرن والے اوم پوری برطانوی تے امریکی فلماں وچ وی کم کیتا۔ اوہناں نوں بہوں ایوارڈ ملے اتے انہاں دا سب توں وڈا ایوارڈ فلم ’’ماچس‘‘ سی جیہڑی بھنڈراں والہ قتل، گولڈ ٹمپل اْ تے انڈین ریاست دے حملے، اندراگاندھی دے قتل اتے اس بعدوں ہون والے سکھاں دے قتلام دے پچھوکڑ تے اک بہوں وڈی فلم سی۔ اکتوبر 1996 وچ ریلز ہون والی ایس فلم دے لکھاری اتے ڈائریکٹر گلزار سن جہناں دا اصل ناں سمپورن سنگھ کالرا ہے اتے اوہ جہلم کول دینہ وچ جمے سن۔ اوم پوری دے نال ایس تواریخی فلم وچ تبو، چندراچور سنگھ تے جمی شیر گل ہوراں کم کیتا سی۔ جمی شیر گل مشہور لہوری پینٹر امرتا شیر گل دے ماں ولوں نیڑے دے رشتہ دار سن۔ تبو تے جمی دی ایہہ پہلی فلم سی۔ ایہہ اوہ ویلہ سی جدوں سکھاں دے قتلام خلاف بولنا ’’جرم‘‘ سی پر اوم پوری نوں کون ڈک سکدا سی۔ اج اک پنجابی ہی نہیں مریا سگوں پاک انڈیا ’’درے‘‘ دی اک اجہی کھڑکی وی بند ہوگئی جتھوں ہمیش ٹھنڈیاں ہواواں آندیاں سن۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels