Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> احمدی مخالف جھیڑے: کیہ دلمیال تیک قومی ایکشن پلان (NAP) پہنچ سی؟ حالات نارمل کنج ہوسن؟

احمدی مخالف جھیڑے: کیہ دلمیال تیک قومی ایکشن پلان (NAP) پہنچ سی؟ حالات نارمل کنج ہوسن؟

December 30th, 2016

چکوال: دسمبر دی12 تریخ نوں ہاہا کار مچ گئی سی۔ میڈیا وی چستیاں وکھائیاں سن۔ جھیڑا اک عبادت گاہ دا سی جیہڑی 1860 وچ بنی سی۔ دلمیاں چکوال توں 37 میل دور اک پنڈ اتے ایس پنڈ چوں 5 لیفٹینٹ جنرل، 23 برگیڈئیر فوج وچ رلتی رہے نیں۔ ایہوں نہیں سگوں پہلی تے دوجی لام وچ 460 تے 730 لوک فوجی بھرتی وچ گئے سن۔ ایتھے سارے ہی ملک برادری توں تعلق رکھدے نیں اتے کجھ خانداناں دے جی احمدی ہوگئے سن۔ ایتھے اک عبادت گاہ ہے جس تے جھیڑے جاری نیں۔ مقدمہ عدالتاں وچ ہے پر دسمبر 12 دے جھیڑیاں بعدوں بہوں سارے احمد ی خاندان ادھر اُدھر ہوگئے نیں۔ ڈان اخبار اج ایس سٹوری دا فیڈ بیک چھاپیا ہے۔ ساڈا میڈیا تے خیر چار دن لاکے بھل جاندا ہے پر ایس خبر نوں 18 دناں بعدوں مڑ اہمیتاںں مل ہی گیاں۔کیوں؟ایہہ نہ پچھو!
1974 وچ اک آئینی ترمیم پاروں پاکستان دے آئین وچ احمدیاں نوں غیر مسلم قرار دتا گیا سی۔ پر کجھ دناں دی ٹینشناں بعدوں حالات نارمل طریق نال چلدے رہے سن۔ کیونجے برادری وی اک سی اتے خونی رشتے وی سن تاں مارے اک دوجے نوں برداشت کرکے کم چلاندے رہے۔ 1996 وچ (ڈان دی خبر دے مطابق) اک ہجوم منیر شاہ دی قیادتاں وچ آیا اتے اوس نے زیر تعمیر امام باڑہ اتے احمدیاں دی آخری رسماں دی تھاواں نوں ڈھا دتا۔ ایس نال دلمیاں وچ حالات وگڑے۔ اک دوجے دا سوشل بائیکاٹ وی ہویا پر میل ملاپ وی رہیا۔ پر جیہڑے جھیڑے دسمبر12 نوں ہوئے اوس نے پنڈ دی وسوں نوں اکا تڑوڑ مروڑ دتا ہے۔ جے پنڈ وچ کوئی مصالحتی کردار ادا کرن والا ادارہ ہوندا تاں فیر کسے نہ کسی پدر تے اجہے مسئلے حل ہوجانے سن۔
پنڈ توں احمدیاں دے خاندان ٹر گئے نیں پر مسعودہ بیگم آپدا گھر چھڈن توں انکاری ہے۔ مسعودہ بیگم68 سالاں دی زنانی ہے اتے آپدے گھر والیاں دے آکھے نہیں لگی اتے اوس پنڈ وچ ہی رہن دا فیصلہ کیتا ہے۔ مسعودہ بیگم سنی گھرانے دی دھی سی جدوں اس دا ویاہ اک احمدی خاندان وچ ہویاسی۔ اس دور وچ ترمیم نہیں آئی سی تاں مارے اجہی شادیاں ہو جاندی سن۔ دلمیاں کوئی اکلا پنڈنہیں نہ ہی ایہہ کوئی اک برادری دا مسئلہ ہے۔ ایہہ سارا مسئلہ دھرمی جھیڑیاں دا نہیں سگوں روا داریاں دے گھٹن دا ہے۔ اساں آپدی ہزاراں سالہ صوفی جوگی ریت تو وانجھے ہوئے ہاں۔ اوس ریت وچ اختلافاں پاروں لوکی لڑدے نہیں سن۔ قومی ایکشن پلان دا وڈا ٹیچا وی ایہو جے پئی رل مل ملک نوں تگڑا کرنا جے۔ 20 کروڑ دے ملک پاکستان وچ اک کڑوڑ (جے 5 فیصدی والی گل نوں من وی لتا جائے) غیر مسلم رہندے نیں۔ فوجی علاقے وچ اجہے جھیڑے اک ہور وڈا مسئلہ ہے۔ اجہے مسلیاں تے ساری پارٹیاں اتے اداریاں نوں اک صفحہ تے نظر آونا چاہیدا ہے۔ ایہوں نیشنل ایکشن پلان دی سپرٹ ہے۔ جے اساں دلمیاں ورگی تھاواں تیک ایس پلان نوں لیجاواں گے تاں جاکے ملک تگڑا ہوسی۔ پچھلے دناں توں سندھ اسمبلی دے قنون بارے جو بحثاں چل رہیاں نیں اوس نوں حل ہونا لوڑی دا ہے۔ جمہوری ریت وی ایہو ہے پئی سب اک دوجے نوں برداشت کرن ۔ چیتے رہے ،سوال روداریاں دا ہے نہ کہ دھرمی ونڈ دا، اتے سانوں ہمیشہ رواداریاں تے قنون دی حکمرانیاں نوں ہی اگے رکھ کے مسئلیاں نوں چکنا چاہیدا جے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels