Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> آئی جی سندھ دا مسئلہ: نویں ٹاکریاں لئی میدان تیار

آئی جی سندھ دا مسئلہ: نویں ٹاکریاں لئی میدان تیار

وچار ڈیسک
December 28th, 2016

کراچی: سندھ ہائیکورٹ نے سندھ دے آئی جی پلس اللہ دینو خواجہ (اے ڈی خواجہ) نوں ٹرانسفر کرن تے سٹے دے کے میڈیائی کھڈاریاں نوں وادھو مواد دے چھڈیا ہے۔ ذرا غور کرو، جیہڑے لوکاں سندھ سرکار دے ایس حکمنامے نوں عدالتاں وچ چیلنج کیتا انہاں وچ گلوکار شہزاد رائے وی پیش پیش نیں۔طاقت دی کھیڈ وچ ’’گلوکار‘‘ دا کیہہ کم، ایہہ تسی آپوں فیصلہ کرو۔ خواجہ ہوری اج کل چھٹی تے نیں اتے 30دسمبر نوں انہاں دی چھٹی مکے گی۔ پر عدالتاں سٹے دے کے اگلی تریخ 12 جنوری پادتی ہے۔ ہن ایس مسئلہ تے سندھ سرکار، پی پی پی، وفاق اتے پلس وچ اک نواں ٹاکرا شروع ہو جاسی۔ خبراں وچ دسیا گیا ہے پئی عدالتاں وچ 7 پٹیشناں آئیاں سن۔ ہن ایہہ وی میڈیا دسے پئی شہزاد رائے توں علاوہ کون کون ایس وچ رلتی نیں۔ کیہ کسی وی سرکاری ملازم نوں نوکری توں ٹرانسفر کرن دا اختیار حکومت کول نہیں؟کل نوں کسے افسر نوں وزیراعظم ٹرانسفر کر دا ہے تے پھیرایہو ہو سی۔ جے خواجہ ہوری بہوں چنگے آفیسر نے تاں فیر انہاں توں لاون والی سرکار دی تریفاں کیوں نہیں ہوندیاں۔ جے سندھ سرکار ایڈی بھیڑی سی تاں فیر انہاں اک چنگے افسر نوں کیوں لایا۔ عدالتاں والے سٹے دتے بغیر وی ایس مقدمے نوں سن سکدے سن۔ اینج غیر ضروری لڑائیاں وی نہ ہوندیاں تے مسئلہ وی حل ہون ول ودھ جاندا۔ اجہے ٹاکرایاں وچ ہن 30دسمبر بعدوں خواجہ ہوری واپس سیٹ تے بہہ جاون گے۔ ایس ات گردی دے ماحول وچ اجہے فیصلے اتے ٹاکرے ات گرداں نوں ہی فیدے دیندے نیں۔ جے چیف منسٹر تے آئی جی پلس اک صفحہ تے نہیں تاں ایہہ کوئی چنگا کم نہیں۔ اگ تے تیل سٹن دا کوئی وی کم نکی موٹی سیاستاں اتے بریکنگ نیوز لئی تے چنگا ہوندا ہے پر ایس نال گوریننس وچ فرق آجاندا ہے۔ جے عدالتاں وچ کوئی آندا ہے تے اس دے ثبوت ویکھن تو بعد سٹے آنا چاہیدا ہے۔ عدالتاں انصاف ضرور کرن پر سیاسی دنگل توں پراں رہن دا تاثر وی عدالتاں ہی دینا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels