Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> آف شور دا کجھ نہیں ہونا ایف بی آر 444 وچوں 336 نوں نوٹس جاری کیتے، 57 جواب دتا؟

آف شور دا کجھ نہیں ہونا ایف بی آر 444 وچوں 336 نوں نوٹس جاری کیتے، 57 جواب دتا؟

December 27th, 2016

اسلام آباد: آف شور رقماں والیاں نوں قنون دے کینڈے وچ لیاون دی تھاں جدوں ایس مسئلہ نوں نرا حکومت نوں ڈیگن لئی ورتو گے تاں آف شور والے موجاں کرن گے۔ اتے اج دی خبر موجب ایہو نظر وی آرہیا ہے۔ ادھی توں وادھو کمپنیاں جہناں آف شور ’’جنتاں‘‘ وچ نے اوہ برطانیہ دی ملکیت نیں۔ ایس توں پتہ چلدا ہے پئی پاکستانی اشرفیہ والے دن رات لندن دی حکمرانی دی تعریفاں کیوں کردے نیں اتے سیاسی فیصلیاں وچ لندن کیوں پردھان ہوندا ہے۔اساں تے سمجھدے سان ایہہ نوآبادیاتی تفاخراں پاروں ہوندا ہے پر ہن پتہ چلیا پئی ایہہ سب آف شور دی ’’برکات‘‘ نیں۔ پانامہ تے بہاماس لیکس وچ تے 600 توں وادھو پاکستانیاں دے ناں سن پر ایف بی آر نرے 444 لوکاں نوں ہی نوٹس دے سکی۔ پانامہ لیکس تے مئی 2016 وچ آئیاں سن اتے ایف بی آر نوں 8 مہینیاں وچ انہاں 444 وچوں 57 بندیاں ہی دا جواب دتا ہے۔ انہاں 57 وچوں وی 23 نے آکھیا ہے پئی اوہ پاکستانی شہریت نہیں رکھدے اتے 39 آکھیا ہے انہاں دا پانامہ والی آف شور کمپنیاں نال کوئی تعلق نہیں۔ہورے انہاں دا ناں لکویاں آف شوراں وچ ہوئے گا۔ گیارہ بندے مرچکے نیں اتے انہاں دے وارثاں نے ایہہ نوٹس وصولے نیں۔ 37 بندیاں نے نوٹس وصولے ہی نہیں اتے مختلف وجوہات پاروں 31 لوکاں نال تفتیشاں نہیں ہوسکدیاں۔ ایہہ کل مل ملا کے 100 بندے بندے نیں۔ 14 اجہے وی نے جہناں آکھیا ہے انہاں دا ناں ورتیا گیا ہے۔
بہاماس لیکس وچ 150 پاکستانیاں دے ناں آئے سن پر ایف بی آر نوں انہاں وچوں 108 بندے ہی مل سکے نیں۔ ایف بی آر 69 لوکاں نوں مڑتوں نوٹس گھلے نیں۔ اخباری خبراں پاروں سیف اللہ خاندان دی 40 آف شور کمپنیاں نیں اتے ایس نوں منیا وی ہویا ہے پر ایف بی آر والیاں سیف اللہ خاندان نوں نوٹس دین دی گل ہی نہیں کیتی۔جنج کراچی پلس تے رینجر والے انیس قیم خانی نوں نہیں لبھ سکدے اینج ہی ایف بی آر والے سیف اللہ نوں لبھن وچ ناکام۔ایہہ سب نتیجہ ہے اس خلافتی لہر دا جس پاروں پانامہ ڈرامہ نوں حکومت بدلن لئی ورتیا جا رہیا ہے۔ جے آف شور رقماں والیاں نوں ٹیکس نیٹ وچ لیاون لئی میڈیا تے اپوزیشن والے کھپ پاندے تاں اج بہوں سارے لوک نوٹساں دے جواب دے کے رقماں وی جمع کروانا شروع ہوگئے ہوندے۔ جن 444 بندیاں نوں نوٹس جاری کیتے گئے نے انہاں وچ274 آف شور کمپنیاں نرے ترے جنریریاں وچ نے اتے اوہ برطانیہ دی ملکیت نیں۔ جے ایس وچ Cayman تے برمودا نوں وی رلا لوتاں فیر ہورے تر سو توں وادھو آف شور رقماں دا کھرا لندن ول نکلدا ہے۔ نرا الطاف حسین ہی ’’لندنی‘‘ نہیں سگوں ساڈی اشرافیہ دا وڈا حصہ وی ’’لندن‘‘ نال جڑیا ہویا ہے۔ جدوں ڈیوڈکیمرون دی تریفاں ہون یا برطانیہ دی قنوناں نوں سہلایا جائے تے تساں سمجھ جایا کرو پئی مایا دے لمے لمے ہتھ۔ انہاں دولتمنداں نوں بچاون وچ سب ہی ’’لین حاضر‘‘ نیں کیونجے ایہہ رقماں وی ونڈہے۔ آف شور دی ’’صف‘‘ تے جرنیل ، بیوروکریٹ، کارو باری تے بیوپاری سب اک صفحہ تے نیں پئی گھجل پرگرام جاری رکھو تانجے آف شور بارے گل گواچی رہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels