Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> افغان مہاجرین نوں گھلن توں پہلاں بلوچستان وچ مردم شماریاں نشتہ۔ میرحاصل بزنجو

افغان مہاجرین نوں گھلن توں پہلاں بلوچستان وچ مردم شماریاں نشتہ۔ میرحاصل بزنجو

وچار ڈیسک
December 21st, 2016

میرحاصل بزنجو اک لمیرے چر توں آپدے والد میرغوث بخش بزنجو وانگ جمہوریت اتے قومیتی حقاں لئی جدوجہد کر رہے نیں۔ اوہ بلوچاں دی سب توں وڈی سیاسی جماعت’’ نیشنل پارٹی ‘‘دے پردھان وی نیں۔ اوہناں کدی وی بلوچستان وچ وسن والے پختوناں خلاف گل نہیں کیتی۔ پر افغان مہاجرین دے مسئلہ نوں پختوناں دا مسئلہ نہیں بنانا چاہیدا کہ جو محمود اچکزئی کر رہے نیں۔ میرحاصل بزنجو ہوراں اوہی گل کیتی ہے جیہڑی کدی خود اچکزئی اتے ولی خان وی آکھدے سن۔ 1980 دی دہائی وچ ایہو دونوں پختون لیڈر افغان مہاجرین نوں آپوں ’’افغان بھگوڑے‘‘ آکھدے سن اتے انہاں نوں آپدے وطناں نوں گھلن دے مطالبے کردے سن۔ پر اج وٹاں نوں ودھان لئی انہاں آپدی پرانی لائن بدل لِتی ہے۔ جیہڑی تقریر نکے اچکزئی آپدے والد اتے بلوچستانی پختوناں دے وڈے لیڈرعبداصمد اچکزئی ہوراں دی برسی تے کیتی سی اس وچ انہاں افغان مہاجرین نوں پاکستان دی شہریت ہی نہیں سگوں وکھرا صوبہ دین دی گل وی کیتی سی۔ پنجاب توں پچھے بغیر اوہ پنجاب وچ اک پٹھان صوبہ بناون دی گل کیتی اتے جے اجہی گل کوئی پنجابی خیبر پی کے یا سندھ بارے کرے تے دہائیاں پئے جانیاں سن۔اوہ اجہی جھگڑالو پالیسیاں راہیں ہن نہ پختوناں نوں چکر دے سکدے نیں اتے نہ ہی مسلیاں نوں حل کر سکدے نیں۔ اچکزئی ہوری جاندے نیں پئی پٹھاناں وانگ پنجابی وی پاکستان دے باڈر دے آرپار رہندے نیں اتے بلوچ وی۔ ایران دا تے اک وڈا صوبہ (سیستان)ہے ہی بلوچاں نال بھریاہوا۔ اساں اک وطنی ریاست وچ رہ رہے اتے گلوبلائزیشن پاروں ہن دنیا لڑائیاں بعدوں باڈر ٹینشناں مکاون ول ٹر رہی ہے اتے باڈراں نوں نرم کرن دی گلاں ہو رہیاں نیں۔ اوہ پختوناں دے صوبے یا ملک بناون دے ’’خبطاں‘‘ وچوں نکلن اتے نرم باڈراں راہیں لوکائی نوں جوڑن ول دھیان دین۔ ایہہ ویلہ Conectivityدا ہے۔افغان مہاجرین نوں تے افغانستان وی واپس لینا چاہندا ہے۔ ہن جداں سب دھڑے ایس تے تیارنیں تے اچکزئی کیوں اڑچناں پا رہے نیں۔ اچکزئی جاندے نے پئی افغان مہاجرین دے آون نال بلوچستان تے کراچی سب توں ودھ شکار ہوئے۔ بلوچستان دی آبادی وچ 1979 بعدوں جس تیزیاں نال اضافہ ہویا اوہ سب جاندے نیں۔ غریب تے مہاتڑ افغان مہاجرین دا وی فیدہ ایس وچ ہے پئی اوہ واپس وطناں نوں ٹر جاون۔ دنیا جاندی ہے پئی مہاجرین نوں ہمیشہ اَت گرد ورتدے نیں کیونجے اوہ بے آسرا ہوندے نیں۔ جے افغان مہاجرین واپس جاون گے تاں پاک افغان تعلقاں وچ وی بہتریاں آون گیاں۔ اچکزئی آپدی نک توں اگے ویکھن اتے میر حاصل بزنجو نال رَل کے بلوچستان دے مستقبل بارے سوچن۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels