Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> مرواد تاجے مہاراج: روس سی پیک وچ آپدا وزن چین ول پا دتا۔ ٹائمز آف انڈیا

مرواد تاجے مہاراج: روس سی پیک وچ آپدا وزن چین ول پا دتا۔ ٹائمز آف انڈیا

وچار ڈیسک
December 19th, 2016

دلی: اج ٹائمز آف انڈیا دی سرخی ہی کافی جے پئی ایہہ جانن لئی کہ سی پیک کنج خطہ وچ نویں تیزی نال بدلدی صورتحال دا ’’انجن‘‘ ثابت ہورہیاں ہے ۔ہر کوئی آپدا ڈبہ سی پیک دی ٹرین مگر لانا چاہندا ہے پر مودی دی پھرتیاں پاروں انڈیا ہلے تیک ایس توں باہر ہے۔ خطہ وچ نواں بنن والا کارویہاری تال میل سب لئی فیدہ مند ہے اتے روس ایس دا وڈا سپوٹر جے۔ ٹائمز آف انڈیا دل پتھر رکھ کے ایہہ خبرپاکستان وچ روسی سفیر ’’ایلکسے وائے ڈیڈوو‘‘ دے حوالے نال چھاپی ہے۔اخبار ایہہ جگت وی کرائی ہے پئی اوہ بھارتی پالیسی ساز جہیڑے پاکستان نوں ات گردیاں دے الزاماں پاروں دنیا وچ اکلّا کرنا چاہندے سن ہنانہاں دی آپدی نیندراں حرام نیں۔ جے انڈیا 1990 دے دہا کے وچ گجرال فارمولے تے عمل کیتا ہوندا تاں ایہہ دن نہ ویکھنے پیندے۔ ہن اخبار نوں چاہیدا ہے پئی انڈین خفیہ ایجنسی ’’را‘‘ دے سابق پردھان بی رامن نوں پچھے کیونجے انہاں آکھیا سی ’’اساں گجرال فارمولے تے 15 فیصدی توں وادھو عمل نہ ہون دتا سی‘‘۔ایس نوں ہی تے سیانے آکھدے نیں ’’ہور چو پو‘‘۔جدوں معشیتاں تے فارن پالیسیاں خفیہ ایجنسیاں دے ہتھ ہون گیاں تاں فیر ایہو رزلٹ نکلدے نیں۔ ٹائمز آف انڈیا آپدی رپورٹ وچ لکھیا پئی بھارتی ریاست لئی سی پیک اک bugbear یعنی خوف نال بھریا خطرہ ثابت ہویا ہے۔
ٹائمز آف انڈیا دی خبر وچ سارا گلہ روس نال ہے اتے رپورٹ کیتا گیا ہے پئی روس تے آپدے وڈے معاشی پروگرام ای ای یو (یوریشین اکنامک یونین) نوں وی سی پیک نال جوڑن دا اعلان کر چھڈیا جے۔ آپدی پریشانیاں پاروں اخبار لکھدا ہے ’’روس تے سرکاری سطح تے سی پیک وچ نہ رلن بارے بیان دتے سن۔ ذرا ویکھو پئی سی پیک ریاست جموں کشمیر ورگے متنازعہ علاقے توں لنگ رہیا ہے پر کوئی ایس مسئلہ نوں چکدا ہی نہیں‘‘۔ انڈیا دے دفاعی ماہر برہما چیلانے آکھیا ہے پئی ہن بھارت تے روس دے تعلقات وچ دڑاڑ آرہی ہے۔ اخبار ایہہ گل نہیں کرنا چاہندا پئی گجرال فارمولے نوں ڈکن اتے امریکہ نال یاریاں پاون والی پالیسیاں پاروں اج بھارت پھس گیا ہے۔ پاکستان وچ بیٹھے ہرکاریاں نوں وی ایہہ سمجھنا ہوسی پئی جبرالڑ یا کارگل نال اوہ انڈیا دا کجھ وگاڑ نہیں سکے سن، سگوں پاکستان نوں بدنامیاں بھگتنیاں پیّاں سن۔ پر اک سی پیک ورگے معاشی پروگرام کنج پاکستان نوں خطہ وچ غزتاں دتیاں۔ پاکستان وچ اجہے بندے سیاستاں تے میڈیا وچ موجود نیں جیہڑے اج وی سی پیک خلاف صبح شام کھپ پاندے نیں پر ہن انہاں نوں وی سرت آجائے گی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels